បើតាមថ្នាក់ដឹកនាំសមាគមលើកកម្ពស់ម្រេចកំពត មកទល់ពេលនេះកសិករដាំដំណាំម្រេច GI បានបិទបញ្ចប់ការប្រមូលផលរបស់ខ្លួនជាបណ្តើរៗហើយ ប៉ុន្តែពួកគេហាក់បារម្ភពីបញ្ហាប្រឈមអាកាសធាតុបង្កឡើងដោយបាតុភូតអែលនីណូ ក្នុងការធ្វើឱ្យប៉ះពាល់ដល់ការបង្កបង្កើនផលនៅរដូវកាលក្រោយ ដ្បិតជាបទពិសោធកន្លងមកកាលណាអាកាសធាតុក្តៅខ្លាំង ដំណាំម្រេចងាយរងផលប៉ះពាល់ខ្លាំង និងធ្លាក់ចុះទិន្នផល។
លោក កាន់ ស៊ីណុច ប្រធានក្រុមប្រឹក្សាភិបាលសមាគមលើកកម្ពស់ម្រេចកំពត បានឱ្យដឹងថា ការប្រមូលផលម្រេចកំពតរបស់ប្រជាកសិករបានចាប់ផ្តើមបិទបញ្ចប់ជាបណ្តើរៗហើយមកទល់ពេលនេះ ដោយរំពឹងថា ទិន្នផលសរុបនៅឆ្នាំនេះ នឹងទទួលបានក្នុងរង្វង់ប្រមាណ១២០តោនសម្រាប់នាំចេញទៅកាន់ទីផ្សារអន្តរជាតិ កើនឡើងប្រមាណ២០តោន បើធៀបនឹងឆ្នាំ២០២៥។ បើតាមថ្នាក់ដឹកនាំសមាគមរូបនេះ បើទោះបីជាការប្រមូលផលម្រេចកំពត នៅឆ្នាំនេះហាក់ទទួលបានទិន្នផលខ្ពស់ ប៉ុន្តែលោកព្រួយបារម្ភថា បញ្ហាអាកាសធាតុក្តៅហួតហែង ដោយសារបាតុភូតអែលនីណូ នឹងបង្កប៉ះពាល់ដល់ទិន្នផលនៅឆ្នាំក្រោយ ដ្បិតជាបទពិសាធកាលពីប៉ុន្មានឆ្នាំកន្លងទៅ ដោយសារបញ្ហាអាកាសធាតុនេះបានធ្វើឱ្យទិន្នផលម្រេចធ្លាក់ចុះប្រមាណ៧០% ឯណោះ។ ដើម្បីទប់ស្តាត់បញ្ហាប្រឈមនេះសមាគមបានសហការជាមួយដៃគូពាក់ព័ន្ធរៀបចំជីកអណ្ដូង និងប្រព័ន្ធសូឡាបូមទឹកដល់សមាជិក ដែលងាយរងគ្រោះ ដើម្បីរក្សាទឹកសម្រាប់ស្រោចស្រព។
បើតាមការបញ្ជាក់របស់លោក កាន់ ស៊ីណុច កម្ពុជា នាំចេញម្រេចកំពត បានជិត៥០តោននៅក្នុងរយៈពេល៧ខែឆ្នាំនេះ ខណៈតម្រូវការបញ្ជាទិញផលិតផល GI មួយនេះមានសម្ទុះកើនឡើងពីមួយឆ្នាំទៅឆ្នាំ ដោយលើសពីសមត្ថភាពអាចផ្គត់ផ្គង់បាន។
គួរជម្រាបថា តម្លៃម្រេចកំពត នៅឆ្នាំនេះ ហាក់ខ្ពស់ជាងឆ្នាំមុនៗ ពោលគឺម្រេចខ្មៅលក់ចេញក្នុងតម្លៃ២០ដុល្លារ ម្រេចក្រហម៣០ដុល្លារ និងម្រេចស៣៣ដុល្លារក្នុង១គីឡូក្រាមកើនឡើងប្រមាណ៣ដុល្លារក្នុង១គីឡូក្រាម បើធៀបនឹងតម្លៃកាលពីឆ្នាំមុន៕
