កំពង់ផែទេសចរណ៍ខេត្តកែប-កោះទន្សាយ តម្លៃជាង១លានដុល្លារបញ្ចប់ការសាងសង់និងសម្ពោធដាក់ឱ្យប្រើប្រាស់ជាផ្លូវការ

ថ្លែងនាឱកាសដាក់ឱ្យប្រើប្រាស់ជាផ្លូវការ នៅថ្ងៃទី១៩ ខែមករា ឯកឧត្តម ស៊ុន ចាន់ថុល ទេសរដ្ឋមន្រ្តី និងជារដ្ឋមន្រ្តីក្រសួងសាធារណៈការ និងដឹកជញ្ជូន បានគូសបញ្ជាក់ថា កំពង់ផែទេសចរណ៍កែប-កោះទន្សាយនេះ នឹងដើរតួនាទីយ៉ាងសំខាន់ក្នុងការផ្តល់សេវាដឹកជញ្ជូនភ្ញៀវទេសចរ បង្កើតឱកាសការងារ និងបង្កើនជីវភាពរស់នៅដល់ប្រជាពលរដ្ឋ នៅក្នុងខេត្តកែប ទាំងមូលផងដែរ។ បើតាមឯកឧត្តម ស៊ុន ចាន់ថុល ស្ថិតក្នុងបរិបទនៃការរាតត្បាតជំងឺកូវីដ១៩ លំហូរភ្ញៀវទេសចរបរទេសមកកម្សាន្តនៅកម្ពុជា បានថយចុះគួរឱ្យកត់សម្គាល់ ដូច្នេះ ដើម្បីអាចស្រូបទាញទេសចរអន្តរជាតិឡើងវិញ កំពង់ផែមួយនេះ នឹងដើរតួនាទីយ៉ាងសំខាន់ក្នុងការបម្រើដល់វិស័យទេសចរណ៍។

ឯកឧត្តម សោម ពិសិដ្ឋ អភិបាលខេត្តកែប បានគូសបញ្ជាក់ថា កំពង់ផែទេសចរណ៍កែប-កោះទន្សាយនេះ មានរចនាបទទំនើប និងអាចទទួលនាវាទេសចរណ៍ធំៗ ចំនួន៣គ្រឿង ដែលបានសាងសង់លើផ្ទៃដី ជិត៤ពាន់ម៉ែត្រការ៉េ។ គោលបំណងសំខាន់ក្នុងការសាងសង់កំពង់ផែទេសចរណ៍កែប គឺដើម្បីពង្រីកសក្ដានុពលទេសចរណ៍ខេត្តកែប ក៏ដូចជា បម្រើដល់វិស័យទេសចរណ៍ក្នុងស្រុក។ អភិបាលខេត្តកែប សង្កត់ធ្ងន់ទៀតថា កំពង់ផែទេសចរថ្មីនេះ នឹងទាក់ទាញភ្ញៀវទេសចរបរទេស តាមរយៈការដឹកជញ្ជូនពីប្រទេសជិតខាងផងដែរ។ 

សូមបញ្ជាក់ថា កោះទន្សាយ ជាកោះទេសចរណ៍សក្ដានុពលមួយរបស់ខេត្តកែប បច្ចុប្បន្ន ក៏កំពុងមានមានការអភិវឌ្ឍន៍កែប្រែនូវមុខមាត់ថ្មី ដោយថ្មីៗនេះ កោះទេសចរណ៍មួយនេះ ទើបទទួលបានការវិនិយោគដោយក្រុមហ៊ុនក្នុងស្រុកធំមួយ ដែលគេស្គាល់ថាជារបស់ឧកញ៉ា ទ្រី ភាព ក្នុងតម្លៃវិនិយោគ១៣០លានដុល្លារអាមេរិក។ ក្រុមហ៊ុននេះ ក៏ទើបតែបានបើកការដ្ឋានសាងសង់កាលពីថ្ងៃទី២២ខែកញ្ញាឆ្នាំ២០២១កន្លងទៅនេះ។ មុនផ្តល់អាជ្ញាបណ្ណឲ្យក្រុមហ៊ុន ទ្រី ភាព គ្រុប រាជរដ្ឋាភិបាលក៏ធ្លាប់បានប្រគល់សិទ្ធិអភិវឌ្ឍន៍ដល់ក្រុមចំនួនពីររួចមកហើយលើការអភិវឌ្ឍកោះទន្សាយនេះ ប៉ុន្តែក៏ត្រូវបានរាជរដ្ឋាភិបាលដកហូតសិទ្ធិមកវិញ ដោយសារក្រុមហ៊ុនទាំងនោះពុំមានសកម្មភាពអ្វីនោះឡើយ ក្រោយបានទទួលសិទ្ធិពីរដ្ឋ៕