ដេប៉ូ និងស្ថានីយដែលធ្វើអាជីវកម្មមិនសុចរិតទាំងនេះ អាចប្រឈមនឹងការព្យួរ ដកហូត ឬលុបអាជ្ញាបណ្ណប្រសិនបើមន្ត្រី ក.ប.ប.បន្តរកឃើញធ្វើអាជីវកម្មមិនសុចរិតម្ដងទៀត បន្ទាប់ពីការព្រមាននិងពិន័យអន្តរការណ៍រួចហើយ ព្រោះទង្វើនេះបានធ្វើឲ្យប៉ះពាល់ដល់ជីវភាពប្រជាពលរដ្ឋ និងការប្រកួតប្រជែងដោយស្មោះត្រង់។ នេះបើតាមការគូសបញ្ជាក់របស់ថ្នាក់ដឹកនាំ ក.ប.ប។
ឯកឧត្តម ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំបានគូសបញ្ជាប់ប្រាប់ខេមបូណូមីសតាមតេឡេក្រាមថា នៅក្នុងរយៈពេល៦ខែឆ្នាំ២០២២ មន្ត្រីនៃអគ្គនាយកដ្ឋាន ក.ប.ប រកឃើញស្ថានីយ និងដេប៉ូប្រេងឥន្ធនៈចំនួន៧៤៥ បានលក់ប្រេងមិនគ្រប់ចំនួនលីត្រ និងបន្លំគុណភាព។ សម្រាប់ឯកឧត្តម ការធ្វើអាជីវកម្មមិនសុចរិតពីសំណាក់ម្ចាស់ដេប៉ូ និងស្ថានីយប្រេងឥន្ធនៈមួយចំនួននេះមិនត្រឹមតែធ្វើឲ្យប៉ះពាល់ការការប្រកួតប្រែងប៉ុណ្ណោះទេ តែវាបានធ្វើឲ្យប៉ះពាល់ដល់ជីវភាពរបស់ប្រជាពលរដ្ឋតែម្តង។
ឯកឧត្តម បានបញ្ជាក់យ៉ាងដូច្នេះថា៖«ការធ្វើអាជីវកម្មមិនសុចរិតពាក់ព័ន្ធនឹងប្រេងឥន្ធនៈបានធ្វើឲ្យប៉ះពាល់ដល់ជីវភាពរស់នៅរបស់ប្រជាពលរដ្ឋ ពិសេសប៉ះពាល់ដល់គោលនយោបាយកាត់បន្ថយភាពក្រីក្ររបស់រាជរដ្ឋាភិបាល និងប៉ះពាល់ដល់ការប្រកួតប្រជែងដោយស្មោះត្រង់ក្នុងពាណិជ្ជកម្ម»។
អត្ថបទគួរអាន
បើតាមការគូសបញ្ជាក់របស់ឯកឧត្តម ផាន អូន ក្រោយរកឃើញការធ្វើអាជីវកម្មមិនត្រឹមត្រូវមន្ត្រីជំនាញនៃ ក.ប.ប បានព្រមាន និងពិន័យអន្តរការណ៍ដល់ម្ចាស់ដេប៉ូនិងស្ថានីយទាំងនោះផងដែរ ហើយក្នុងករណីមិនរាងចាល ម្ចាស់ដេប៉ូទាំងនោះនឹងត្រូវប្រឈមនឹងការព្យួរ ដកហូត ឬលុបចោលវិញ្ញាបនបត្រចុះបញ្ជីពាណិជ្ជកម្ម ឬអាជ្ញាបណ្ណអាជីវកម្មតែម្តង។ នេះបើតាមការគូសបញ្ជាក់របស់ឯកឧត្តម ផាន អូន។
ទន្ទឹមនឹងនេះ ឯកឧត្តមបានគូសបញ្ជាក់ថា ដើម្បីលុបបំបាត់ការធ្វើអាជីវកម្មមិនសុចរិតលើប្រេងឥន្ធនៈ ដែលកំពុងមានតម្លៃខ្ពស់ អគ្គនាយកដ្ឋានក.ប.ប.នឹងបន្តចុះត្រួតពិនិត្យ និងចាត់វិធានការស្របតាមច្បាប់ និងឯកសារគតិយុត្តជាធរមាន ចំពោះស្ថានីយ និងដេប៉ូប្រេងឥន្ធនៈទាំងឡាយណាដែលធ្វើអាជីវកម្មមិនសុចរិត ដើម្បីការពារផលប្រយោជន៍របស់ប្រជាពលរដ្ឋដែលជាអ្នកប្រើប្រាស់៕
