កញ្ញា សុខ ស្រីល័ក្ខ អាយុ២៩ឆ្នាំ ដែលកំពុងអង្គុយលក់មួកត្នោត បានប្រាប់ ខេមបូណូមីស ថា នៅព្រឹកថ្ងៃទីមួយនេះនៃពិធីបុណ្យអុំទូក ថា កញ្ញាលក់ដាច់គ្រាន់បើដែរ ទោះបីមេឃមិនក្តៅខ្លាំងក៏ដោយ។
ជាអ្នកខេត្តកណ្តាល ស្រីល័ក្ខ បានរៀបរាប់ថា៖ «ខ្ញុំរំពឹងថា ថ្ងៃទីមួយនេះ ខ្ញុំនឹងអាចលក់មួកដាច់បាន១០០មួក ព្រោះឆ្នាំទៅ ខ្ញុំក៏លក់ដាច់បានប៉ុណ្ណឹងដែរ»។
បើតាមកញ្ញា សុខ ស្រីល័ក្ខ មួកត្នោតទាំងនេះ កញ្ញាទិញពីម៉ូយនៅស្រុកឧដុង្គខេត្តកំពង់ស្ពឺ ក្នុងមួក១មានតម្លៃ១៥០០រៀល។ កញ្ញារម្លឹកថា បុណ្យអុំទូកកាលពីឆ្នាំមុន កញ្ញាទទួលបានចំណូល៣០ម៉ឺនរៀល ពោល គឺកញ្ញាយកមួកត្នោតត្រឹមតែ២០០ប៉ុណ្ណោះ ដើម្បីដាក់លក់ក្នុងពិធីបុណ្យជាតិដ៏ធំមួយនេះ។
អ្នកដើរលេងបុណ្យអុំទូក ទិញមួកត្នោតពាក់ការពារកម្ដៅ ធ្វើឲ្យរបរងាយមួយនេះកាក់កបគួរសម។
(រូបភាព៖ សូរ ចាន់ណា)
តើអ្នកបានអានអត្ថបទនេះ ឬនៅ?
កញ្ញាសង្ឃឹមថា នៅឆ្នាំនេះ កញ្ញានឹងអាចលក់មួកត្នោតអស់ប្រហែល៣០០មួក ដែលអាចរកប្រាក់ចំណេញបានប្រហែលជាង ១០០ដុល្លារ។
នៅព្រឹកថ្ងៃទី១នៃពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ពលរដ្ឋនៅតាមបណ្តាខេត្តបាននិងកំពុងសម្រុកចូលមករាជធានីភ្នំពេញ ដើម្បីមកទស្សនាការប្រណាំងទូក។ ទន្ទឹមគ្នានេះ កំដៅថ្ងៃ ក៏បានបញ្ចេញពន្លឺដែលធ្វើឲ្យអាជីវកម្មលក់មួកត្នោត ចាប់ផ្តើមមានប្រជាប្រិយភាពខ្លាំង។
អ្នកស្រី ឈន សុខងូត អាយុ៥៨ឆ្នាំ ជាអ្នកលក់មួកត្នោត មកពីស្រុកឧដុង្គ ខេត្តកំពង់ស្ពឺ បានបញ្ជាក់ថា នៅឆ្នាំនេះ អ្នកស្រីទិញមួកពីកន្លែងផលិតចំនួន៥០០មួក ដោយអង្គុយលក់មួកដោយខ្លួនឯងផង និងបោះដុំឲ្យអ្នកដែលចង់ទិញយកលក់បន្តផងដែរ។
អ្នកលក់មួកត្នោត សង្ឃឹមថា នឹងលក់បានច្រើននៅឆ្នាំនេះ។
(រូបភាព៖ សូរ ចាន់ណា)
តើអ្នកបានអានអត្ថបទនេះឬនៅ?
អ្នកស្រី បញ្ជាក់យ៉ាងដូច្នេះថា៖ «បើមេឃក្តៅ អាចលក់អស់១០០មួក តែបើមេឃត្រជាក់លក់មិនអស់ទេ តែមីង បោះដុំឲ្យគេដែរហ្នឹង។ ឆ្នាំទៅ មីងលក់អស់ជាង៣០០មួក តែឆ្នាំនេះទិញមួកមកច្រើន»។
ការលក់មួកត្នោត ជាមុខរបរងាយស្រួល និងលក់ដាច់ខ្លាំងតែក្នុងកន្លែងពិធីបុណ្យទានធំៗ និងមានកំដៅថ្ងៃខ្លាំង។
របរមួយនេះ ក៏អាចផ្តល់ប្រាក់ចំណូលដល់សិស្សនិស្សិតយ៉ាងសម្បើមផងដែរ ប្រសិនបើពួកគេឆ្លៀតយកពិធីបុណ្យនេះ ដើម្បីលក់មួកត្នោត ពីព្រោះ វាជារបរងាយស្រួល ដែលមិនត្រូវការសម្ភារ និងភាពច្នៃប្រឌិតអ្វីច្រើនឡើយ គឺគ្រាន់តែចេះពពាយនាយ ឬអង្គុយលក់តែប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
