ប្រទេសកម្ពុជាបាននាំចូលសារធាតុគីមី ឬហៅថា ថ្នាំពុលកសិកម្ម មកពីប្រទេសជិតខាងមានចំនួនប្រមាណ ៣ម៉ឺនតោន ក្នុងមួយឆ្នាំៗ សម្រាប់បម្រើក្នុងវិស័យកសិកម្មកម្ពុជា។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
កាលពីឆ្នាំ២០១៦ កើនឡើងដល់ជាង ៣ម៉ឺនតោន ធៀបនឹងឆ្នាំ២០១៥ មានប្រមាណជិត ៣ម៉ឺនតោន និងឆ្នាំ២០១៤ មាន ២ម៉ឺន ៥ពាន់តោន។ ឃើញថា ទិន្នន័យការនាំចូលសារធាតុគីមី ឬថ្នាំពុលកសិកម្ម ពីក្រសួងកសិកម្ម បានបង្ហាញពីការកើនឡើងជារៀងរាល់ឆ្នាំ ដើម្បីជាការឆ្លើយតបទៅនឹងតម្រូវការចាំបាច់នៅក្នុងវិស័យកសិកម្មកម្ពុជា។
សួរថា តើកម្ពុជាពិតជាចាំបាច់ត្រូវការប្រើប្រាស់សារធាតុគីមី ឬថ្នាំពុល ដើម្បីបម្រើនៅក្នុងវិស័យកសិកម្ម មែន ឬទេ? អ្នកជំនាញនៅក្នុងវិស័យកសិកម្ម បានបកស្រាយខុសៗគ្នាថា ការប្រើប្រាស់សារធាតុគីមី ឬថ្នាំ ពុលច្រើន បានធ្វើឲ្យប៉ះពាល់ដល់សុខភាពប្រជាពលរដ្ឋ និងធ្វើឲ្យប៉ះពាល់ដល់ទិន្នផលដំណាំធ្លាក់ចុះ ព្រមទាំងធ្វើឲ្យខូចគុណភាពដី។
អ្នកជំនាញកសិកម្មមួយចំនួនទៀតអះអាងថា បើមិនប្រើប្រាស់សារធាតុពុលសម្លាប់សត្វល្អិតទេនោះ ការប្រកបរបរកសិកម្មមិនទទួលបានផ្លែផ្កានោះទេ។ យ៉ាងណាក៏ដោយ ការប្រើប្រាស់និងនាំចូលសារធាតុគីមី ឬថ្នាំពុលច្រើននេះ បានបង្កផលប៉ះពាល់ជាច្រើនដល់សុខភាពពលរដ្ឋនិងបរិស្ថាន។ អ្នកជំនាញកសិកម្មបានណែនាំឲ្យពលរដ្ឋប្រើប្រាស់សារធាតុពុលផលិតពីធម្មជាតិវិញ។
ជុំវិញទៅនឹងបញ្ហានេះដែរ មន្ត្រីក្រសួងកសិកម្មមួយរូបដែលទទួលបន្ទុករួមនាយកដ្ឋាននីតិកម្មកសិកម្ម បានប្រាប់ឲ្យដឹងថា ការប្រើប្រាស់ថ្នាំពុលសម្លាប់សត្វល្អិតផ្សេងៗ នៅលើដំណាំមិនធ្វើឲ្យប៉ះពាល់ដល់ទិន្នផលដំណាំធ្លាក់ចុះទេ ដរាបណាដែលយើងចេះប្រើប្រាស់ត្រឹមត្រូវតាមបច្ចេកទេស។ ប៉ុន្តែ មន្ត្រីជាន់ខ្ពស់ដដែល ទទួលស្គាល់ថា ការប្រើប្រាស់សារធាតុពុលច្រើន បានបង្កផលប៉ះពាល់ដល់បរិស្ថានជាច្រើន។
មន្ត្រីដដែលបានប្រាប់ឲ្យដឹងទៀតថា នៅរយៈពេលពេញមួយឆ្នាំ២០១៦ កម្ពុជាបាននាំចូលសារធាតុពុល ឬថ្នាំពុលមកចរាចរលក់នៅលើទីផ្សារកម្ពុជាចំនួនប្រមាណជា ៣ម៉ឺន ៣ពាន់តោន។ លោកថា តម្រូវការប្រើប្រាស់ថ្នាំពុលហាក់កើនឡើងច្រើន នៅដើមឆ្នាំនេះ ដោយសារតែបញ្ហាសត្វល្អិតកើតឡើងច្រើន៕
