សិង្ហបុរី ក្លាយជាគោលដៅទាក់ទាញបំផុតនៅលើពិភពលោកសម្រាប់ការរក្សាទុកទ្រព្យសម្បត្តិ និងផ្លាស់ប្តូរទីលំនៅរបស់អ្នកវិនិយោគ

របាយការណ៍របស់ធនាគារ HSBC បានបង្ហាញថា ប្រទេសសិង្ហបុរី បានក្លាយជាគោលដៅកំពូលនៅលើពិភពលោកសម្រាប់ផ្លាស់ប្តូរទ្រព្យសម្បត្តិ និងទីលំនៅរបស់អ្នកវិនិយោគ។ នៅក្នុងរបាយការណ៍ស្ដីពីទ្រព្យសម្បត្តិសហគ្រិនសកលឆ្នាំ២០២៥ របស់ធនាគារ HSBC បានបង្ហាញថា សហគ្រិន១៥% បានចាត់ទុកសិង្ហបុរី ជាគោលដៅកំពូលសម្រាប់រក្សាទុកទ្រព្យសម្បត្តិរបស់ពួកគេ ដោយនាំមុខប្រទេសអង់គ្លេស និងប្រទេស្វីស។ ជាមួយគ្នានេះ អ្នកឆ្លើយ១២% បានចាត់ទុកសិង្ហបុរី ជាទិសដៅកំពូលសម្រាប់ការផ្លាស់ទីលំនៅរបស់សហគ្រិន។

ក្នុងចំណោមសហគ្រិនដែលកំពុងស្នាក់នៅសិង្ហបុរី គឺមានតែម្នាក់ប៉ុណ្ណោះក្នុងចំណោម៥នាក់ដែលកំពុងពិចារណាផ្លាស់ប្តូរទ្រព្យសម្បត្តិចេញពីសិង្ហបុរី ទៅប្រទេសផ្សេង ហើយសហគ្រិនក៏មានអត្រាទាបសម្រាប់ការសញ្ជឹងគិតអំពីការផ្លាស់ប្តូរទីលំនៅផ្ទាល់ខ្លួនពីសិង្ហបុរី ទៅប្រទេសផ្សេងផងដែរ។

ធនាគារ HSBC បានគូសបញ្ជាក់ថា សិង្ហបុរី ក៏បានទាក់ទាញរំហូរចូលដ៏ធំបំផុតនៃទ្រព្យសម្បត្តិពីប្រទេសជិតខាងផងដែរ ជាពិសេសពីប្រទេសឥណ្ឌូនេស៊ី និងម៉ាឡេស៊ី៕

ដោយ៖ សុខ មង្គល