យោងតាមប្រភពបានឱ្យដឹងថា លោក រ៉ានីល វីកគ្រីមេសសីង មានអាយុ ៧៣ ឆ្នាំមកពីគណបក្សប្រឆាំង United National ដែលមានអាសនៈត្រឹមតែ ១ អាសនៈប៉ុណ្ណោះ ក្នុងចំណោម ២២៥ អាសនៈនៅក្នុងសភារបស់ប្រទេសស្រីលង្ការ ។ ការស្បថចូលកាន់តំណែងជានាយករដ្ឋមន្ត្រីរបស់លោក Ranil មិនបានបើកចំហដល់ប្រព័ន្ធផ្សព្វផ្សាយទេ ដោយសារខ្លាចមានប្រតិកម្មជាសាធារណៈ ខណៈការតែងតាំងនេះធ្វើឡើងបន្ទាប់ពីការលាលែងរបស់លោក Mahinda Rajapaksa កាលពីថ្ងៃចន្ទ។
ប្រធានាធិបតីស្រីលង្កាលោក Gotabaya និង លោក Ranil បានបើកកិច្ចពិភាក្សាបិទទ្វារមួយ ដែលបានពិភាក្សាគ្នាអំពីដោះស្រាយជាច្រើន ជុំវិញវិបត្តិសេដ្ឋកិច្ចរបស់ប្រទេសស្រីលង្កា ដោយផ្តោតលើការកង្វះខាតប្រេងឥន្ធនៈ និង សម្ភារៈសំខាន់ៗផ្សេងទៀត ការដាច់ចរន្តអគ្គិសនី និង បញ្ហាទុនបម្រុងអន្តរជាតិនៅសល់តិចជាង ៥០លានដុល្លារជាដើម។
ក៏ប៉ុន្តែ នៅប៉ុន្មានម៉ោងមុនការស្បថចូលកាន់តំណែងរបស់នាយករដ្ឋមន្ត្រីថ្មី មេដឹកនាំសាសនាដ៏លេចធ្លោ ២ រូបបានប្រឆាំងនឹងការតែងតាំងររបស់ប្រធានាធិបតីលោក Gotabayaនេះ ។ បូជាចារ្យព្រះពុទ្ធសាសនាលោក អូម៉ាល សូប៊ីថា ធឺរ៉ូ (Omalpe Sobitha Thero) និង ប្រធានព្រះវិហារកាតូលិកនៃប្រទេសស្រីលង្កាលោក ចាឌីនណល ម៉ាល់ខម រ៉ែនជីត (Cardinal Malcolm Ranjith) បានប្រាប់សន្និសីទសារព័ត៌មានថា ការតែងតាំងបែបនេះមិនមែនជាដំណោះស្រាយ ដែលប្រជាជនចង់បាននោះទេ។
គួរបញ្ចាក់ថា បើទោះបីជាលោក Ranil មកពីគណបក្សប្រឆាំងក្តី ប៉ុន្តែទំនាក់ទំនងរបស់ប្រធានាធិបតី និង នាយករដ្ឋមន្រ្តីថ្មីនេះ ត្រូវបានគេមើលឃើញថាជាសម្ព័ន្ធមិត្តនយោបាយជាមួយគ្នាយ៉ាងជិតស្និទ្ធ។ លោក Ranil ត្រូវបានចោទប្រកាន់ពីបទអំពើពុករលួយជាច្រើន និង សំណុំរឿងព្រហ្មទណ្ឌផ្សេងទៀតពាក់ព័ន្ធជាមួយនឹងគ្រួសារលោកប្រធានាធិបតីស្រីលង្កា Gotabaya នៅពេលលោក Ranil នៅធ្វើជានាយករដ្ឋមន្ត្រីពីឆ្នាំ ២០១៥ ដល់ឆ្នាំ ២០១៩។
អត្ថបទគួរអាន
មេធាវីនាំមុខខាងសិទ្ធិមនុស្ស និងជាអ្នកតស៊ូមតិលោកស្រី Ambika បាននិយាយថា ការតែងតាំងនាយករដ្ឋមន្ត្រីនេះបង្ហាញថា ទោះបីជាមានការតវ៉ា និង ការទាមទារជាសាធារណៈឲ្យប្រធានាធិបតីស្រីលង្កាចុះចេញពីតំណែងក៏ដោយ ក៏ប្រធានាធិបតីមិនមានចេតនាចង់ចុះចេញពីតំណែងឡើយ ហើយកាន់តែព្យាយាមខ្លាំងឡើង ដើម្បីការពារអំណាចរបស់ខ្លួន ខណៈការឡើងកាន់តំណែងជានាយករដ្ឋមន្រ្តីថ្មី លោក Ranil នេះគឺជាការចុះកិច្ចព្រមព្រៀង ដើម្បីការពារផលប្រយោជន៍របស់លោក Gotabayaតែប៉ុណ្ណោះ។ នេះបើតាមការលើកឡើងរបស់មេធាវីនាំមុខខាងសិទ្ធិមនុស្ស និងជាអ្នកតស៊ូមតិលោកស្រី Ambika។
ទោះយ៉ាងណា ឯកអគ្គរដ្ឋទូតសហរដ្ឋអាមេរិកប្រចាំប្រទេសស្រីលង្កាលោកស្រី Julie Chung បានមានប្រសាសន៍ថា សហរដ្ឋអាមេរិកទន្ទឹងរង់ចាំធ្វើការជាមួយនាយករដ្ឋមន្ត្រីថ្មី ហើយការតែងតាំងលោក Ranil ជានាយករដ្ឋមន្ត្រីយ៉ាងឆាប់រហ័សនេះ គឺជាជំហានដំបូងក្នុងការដោះស្រាយវិបត្តិ និងការលើកកម្ពស់ស្ថិរភាពសេដ្ឋកិច្ចក្នុងប្រទេស។
គួររំលឹកថា សេដ្ឋកិច្ចរបស់ប្រទេសស្រីលង្កាបានធ្លាក់ចូលទៅក្នុងភាពចលាចលយ៉ាងធ្ងន់ធ្ងរ បន្ទាប់ពីប្រទេសនេះខ្វះខាតទុនបម្រុងបរទេសដើម្បីនាំចូលប្រេងឥន្ទនៈ និង ស្បៀងអាហារសំខាន់ៗ ខណៈរដ្ឋាភិបាលប្រទេសដីកោះមួយនេះក៏មានជំពាក់បំណុលបរទេសជាច្រើនសន្ទឹកសន្ទាប់ផងដែរ។
សូមបញ្ជាក់ថា កាលពីថ្ងៃច័ន្ទ លោក Mahinda Rajapaksa ដែលជាបងប្រុសបង្កើតរបស់លោក ប្រធានាធិបតី Gotabaya បានដាក់ពាក្យលាលែងពីតំណែង បន្ទាប់ពីក្រុមបាតុករបានចូលរួមតវ៉ា ជាច្រើនកោះករនៅមុខផ្ទះរបស់លោក ហើយហ្វូងប៉ូលីសបានវាយប្រហារក្រុមបាតុករដែលកំពុងទាមទារឲ្យមេដឹកនាំប្រទេសដែលជាបងប្អូនគ្នាបង្កើតទាំងពីរនាក់នេះចុះចេញពីតំណែង។ ទន្ទឹមនឹងនេះ ប្រធានធនាគារកណ្តាលស្រីលង្កា បានគំរាមលាលែងពីតំណែង បន្ទាប់ពីបានព្រមានថា សេដ្ឋកិច្ចរបស់ប្រទេសនេះនឹង ដួលរលំទាំងស្រុង ប្រសិនបើស្ថិរភាពនយោបាយមិនត្រូវបានធានា ហើយរដ្ឋាភិបាលថ្មីមិនត្រូវបានតែងតាំងក្នុងពេលឆាប់ៗនេះទេនោះ៕
អត្ថបទ៖ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
