វិស័យ​ការបរទេស

​តើការដើរកម្សាន្តតាមផ្លូវរបស់មេដឹកនាំ​បារាំង ​​​ប៊ុលហ្គារី​​ និងអាម៉េនី​​ នៅកម្ពុជា អាចជួយស្តារទំនុកចិត្តភ្ញៀវទេសចរបរទេសយ៉ាងណាដែរ?


នៅក្នុងអំឡុងពេលចូលរួមក្នុងកិច្ចប្រជុំកំពូល ហ្រ្វង់កូហ្វូនី នៅរាជធានីភ្នំពេញ ដែលទើបបិទបញ្ចប់ថ្មីៗនេះ ប្រធានា​ធិបតីបារាំង ​​​ប៊ុលហ្គារី​ និងនាយករដ្ឋមន្រ្តីប្រទេស ​​អាម៉េនី​ និងប្រតិភូមួយចំនួនទៀត បានដើរ ជិះកង់ និងជិះ​ម៉ូតូកង់៣ តាមផ្លូវ​យ៉ាងសាមញ្ញ​ដោយមិនបារម្ភពី​សន្តិសុខផ្ទាល់ខ្លួន។ សកម្មភាពដ៏មានអត្ថន័យនេះមិនត្រឹមតែបង្ហាញពីសុខសន្តិភាព និងសន្តិសុខសុវត្ថិភាពពេញលេញរបស់កម្ពុជា នោះទេ ប៉ុន្តែថែមទាំងជាសារដ៏មានឥទ្ធិពលក្នុងការលុបបំបាត់រាល់ការឃោសនាអកុសលពីមជ្ឈដ្ឋានខាងក្រៅយ៉ាងមានប្រសិទ្ធភាពផងដែរ។​
​តើការដើរកម្សាន្តតាមផ្លូវរបស់មេដឹកនាំ​បារាំង ​​​ប៊ុលហ្គារី​​ និងអាម៉េនី​​ នៅកម្ពុជា អាចជួយស្តារទំនុកចិត្តភ្ញៀវទេសចរបរទេសយ៉ាងណាដែរ?
ដោយ

លោកបណ្ឌិត ឈឹម ផាន់ណា អ្នកស្រាវជ្រាវផ្នែកសេដ្ឋកិច្ច និងទេសចរណ៍នៃរាជបណ្ឌិត្យសភាកម្ពុជា បានចាត់ទុកសកម្មភាពរបស់ថ្នាក់ដឹកនាំប្រទេសបារាំង ប៊ុលហ្គារី អាម៉េនី និងប្រតិភូមួយចំនួនទៀត ដែលបានដើរ ជិះកង់ និងជិះម៉ូតូកង់៣តាមផ្លូវមួយចំនួននៅរាជធានីភ្នំពេញ គឺបានបង្ហាញឱ្យឃើញថា កម្ពុជាមានសន្តិសុខសុវត្ថិភាពពេញលេញ ដោយមិនបារម្ភពីសន្តិសុខផ្ទាល់ខ្លួន។ សម្រាប់អ្នកជំនាញរូបនេះ សកម្មភាពដើរកម្សាន្តរបស់ថ្នាក់ដឹកនាំទាំងនេះបានបង្ហាញប្រាប់ដល់ពិភពលោកពីភាពវិជ្ជមានក្នុងការធ្វើដំណើរ និងអាចលុបបំបាត់នូវការឃោសនាអកុសលនានា ដែលបានផ្សព្វផ្សាយបង្ខូចឈ្មោះរបស់កម្ពុជា នាពេលកន្លងមក។ ការណ៍នេះធ្វើឱ្យលោកបណ្ឌិត មានជំនឿយ៉ាងមុតមាំថា នឹងធ្វើឱ្យកម្ពុជាអាចស្ដារមុខមាត់ និងទាក់ទាញអ្នកទេសចរ ព្រមទាំងវិនិយោគិនបរទេសឱ្យមានភាពប្រសើរឡើងវិញ។

ដោយឡែកលោក ប្រាយអិន ស៊ីណាក់ អោក អ្នកគ្រប់គ្រងប្រចាំប្រទេស នៃក្រុមហ៊ុនទេសចរណ៍ See Asia Differently យល់ឃើញថា ការរៀបចំរបស់រដ្ឋាភិបាលបានផ្ដល់នូវភាពកក់ក្ដៅដល់ថ្នាក់ដឹកនាំ និងប្រតិភូរបស់បណ្ដាប្រទេសនានា ដែលមកបំពេញទស្សនកិច្ចនៅកម្ពុជា។ អ្នកជំនាញរូបនេះចាត់ទុកសកម្មភាពនៅតាមដងផ្លូវរបស់ថ្នាក់ដឹកនាំប្រទេសនានានៅកម្ពុជា គឺជាសារដ៏មានឥទ្ធិពលក្នុងការបង្ហាញដល់ពិភពលោកឱ្យបានស្គាល់ពីសន្តិសុខ និងសុវត្ថិភាពពេលមកកម្សាន្តនៅកម្ពុជា ដែលជាផ្នែកមួយក្នុងការរួមចំណែកជួយបន្សាបការផ្សព្វផ្សាយអវិជ្ជមានមកលើកម្ពុជានាពេលកន្លងមក។

សូមរំលឹកថា នៅក្នុងអំឡុងពេលបំពេញទស្សនកិច្ច និងចូលរួមកិច្ចប្រជុំកំពូលហ្វ្រង់កូហ្វូនី នៅកម្ពុជា ដែលទើបបញ្ចប់កាលពីពេលថ្មីៗនេះ ប្រធានាធិបតីបារាំង ប្រធានាធិបតីប៊ុលហ្គារី នាយករដ្ឋមន្ត្រីអាម៉េនី និងប្រតិភូជាន់ខ្ពស់មកពីបណ្តាប្រទេសជាច្រើនទៀត ត្រូវបានគេប្រទះឃើញចុះដើរ ជិះកង់ និងជិះម៉ូតូកង់បីយ៉ាងសប្បាយរីករាយ និងមានសុវត្ថិភាពពេញលេញតាមដងផ្លូវក្នុងរាជធានីភ្នំពេញ។ សកម្មភាពទាំងនេះទទួលបានការចាប់អារម្មណ៍ និងកោតសរសើរយ៉ាងខ្លាំងពីមជ្ឈដ្ឋានជាតិ និងអន្តរជាតិ ដែលនេះ គឺជាការឆ្លើយតបយ៉ាងស្ងៀមស្ងាត់ប៉ុន្តែមានឥទ្ធិពលចំពោះការវាយប្រហារ និងការផ្សព្វផ្សាយអវិជ្ជមានពីសំណាក់ប្រព័ន្ធផ្សព្វផ្សាយបរទេសមួយចំនួនពាក់ព័ន្ធនឹងបញ្ហាសន្តិសុខ សណ្តាប់ធ្នាប់ និងបទល្មើសអនឡាញកន្លងមក៕

អត្ថបទ៖ បូ ដូឡា




អត្ថបទបន្ទាប់


តើកម្ពុជា ទទួលបានអត្ថប្រយោជន៍អ្វីខ្លះពីការធ្វើជាម្ចាស់ផ្ទះនៃកិច្ចប្រជុំ ហ្វ្រង់កូហ្វូនី និងព្រឹត្តិការណ៍អម?

ក្រុមអ្នកជំនាញបានចាត់ទុកព្រឹត្តិការណ៍ ហ្វ្រង់កូហ្វូនី ដែលកម្ពុជា ធ្វើជាម្ចាស់ផ្ទះជាប្រវត្តិសាស្ត្រ ដែលទើបបិទបញ្ចប់កាលពីពេលថ្មីៗមិនត្រឹមតែជួយលើ…

​តើការប្រកាសជំហររបស់ហ្វ្រង់កូហ្វូនី អាស៊ាន និង AIPA ជុំវិញជម្លោះព្រំដែនអាចទាញថៃ ឱ្យមករកតុចរចាជាមួយកម្ពុជា បានកម្រិតណា?

សម្ពាធពីសហគមន៍អន្តរជាតិ មេដឹកនាំប្រទេសសំខាន់ៗ និងមតិសាធារណៈក្នុងប្រទេសថៃ កំពុងក្លាយជាកត្តាជំរុញឱ្យរដ្ឋាភិបាលទីក្រុងបាងកក ក្រោមការដឹកនាំ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ