ថៃ និងចិនប្រារព្ធខួបលើកទី៥០ឆ្នាំនៃការបង្កើតចំណងការទូត ខណៈចិនបដិសេធថា មិនបានរផ្ដល់សព្វាវុធដល់កម្ពុជា

រដ្ឋមន្ត្រីការបរទេសថៃលោក ស៊ីហាសាក់ ភួងកេតកែវ បានជួបពិភាក្សាជាមួយឯកអគ្គរដ្ឋទូតចិនប្រចាំប្រទេសថៃលោក ចាង ជៀនវ៉េ អស់រយៈពេលជាងមួយម៉ោង ដើម្បីរំលឹកដល់ការចូលកាន់តំណែងរបស់ឯកអគ្គរដ្ឋទូត និងដើម្បីអបអរសាទរខួបទី៥០ឆ្នាំនៃទំនាក់ទំនងការទូតរវាងថៃ និងចិន។ ភាគីទាំងពីរបានពិភាក្សាអំពីសកម្មភាពនានា ដើម្បីពង្រឹងភាពជាដៃគូយុទ្ធសាស្ត្របន្ថែមទៀត។

នៅក្នុងជំនួបខាងលើ លោក ស៊ីហាសាក់ ភួងកេតកែវ បានលើកឡើងពីរបាយការណ៍មួយថា ប្រទេសចិនបានផ្គត់ផ្គង់សព្វាវុធដល់កម្ពុជាសម្រាប់ប្រើប្រាស់ក្នុងការប៉ះទង្គិចព្រំដែនជាមួយប្រទេសថៃ។ លោក ចាង បានឆ្លើយបំភ្លឺថា ចិនមិនដែលបានផ្គត់ផ្គង់អាវុធដល់កម្ពុជាសម្រាប់ការវាយប្រហារថៃឡើយ និងបានសម្តែងការគាំទ្រចំពោះការចរចាដោយសន្តិវិធីរវាងថៃ និងកម្ពុជា។

លោក ចាង បានធានាជាថ្មីថា ប្រទេសចិននៅតែប្តេជ្ញាចិត្តចំពោះអព្យាក្រឹតភាព និងយុត្តិធម៌ក្នុងស្ថានភាពព្រំដែនកម្ពុជា-ថៃ ដោយលោកបានគូសបញ្ជាក់ថា សព្វាវុធទាំងឡាយដែលកម្ពុជាកាន់កាប់ គឺជាផ្នែកមួយនៃកិច្ចព្រមព្រៀងសហប្រតិបត្តិការយោធាដែលមានស្រាប់ គឺមិនមែនជាអាវុធ ដែលទើបតែបានផ្គត់ផ្គង់នោះឡើយ៕​

ដោយ៖ សុខ មង្គល