អាជ្ញាធរថៃ បានរកឃើញថា យ៉ាងហោចណាស់មានក្រុមហ៊ុន ចំនួន៨ ត្រូវបានរកឃើញលួចនាំចូលសាច់ជ្រូកបង្កកដោយខុសច្បាប់យកមកចរាចរណ៍ដាក់លក់ក្នុងទីផ្សារប្រទេសថៃ។ បើតាមការវាយតម្លៃរបស់អាជ្ញាធរថៃ ប្រាក់ចំណេញដែលទទួលបានពីការនាំចូលសាច់បង្កកខុសច្បាប់នេះមានតម្លៃប្រមាណជា១ពាន់លានបាត ឫជាង២៨លានដុល្លារ។
របាយការណ៍ស៊ើបអង្កេតមួយបានឲ្យដឹងថា ក្នុងចំណោមក្រុមហ៊ុនទាំង៨ ដែលបានលួចនាំចូលសាច់បង្កកខុសច្បាប់នេះ ក្រុមហ៊ុន Rainbow Group Co Ltd ត្រូវបានគេចោទប្រកាន់ថា បានលួចនាំចូលសត្វជ្រូកបង្កកច្រើនជាងគេ ខណៈដែលទំហំប្រាក់ចំណូលដែលគេរកឃើញ គឺមានដល់ទៅជាង៩៣៨ពាន់លានបាត ហើយអាចរកប្រាក់ចំណេញសុទ្ធប្រមាណជា១ពាន់លានបាត ឫប្រមាណជា២៨លានដុល្លារ ។
ក្រោយផ្ទុះករណីនេះលោក ស្រ៊ីថា ថាវេស៊ីន នាយករដ្ឋមន្រ្តីថៃ បានចេញសេចក្តីណែនាំឱ្យសមត្ថកិច្ចប៉ូលីស និងទីភ្នាក់ងាររដ្ឋាភិបាលថៃពាក់ព័ន្ធចាត់វិធានការបន្ទាន់លើករណីនេះ។ នាយករដ្ឋមន្ត្រីថៃ យល់ឃើញថា បញ្ហារត់ពន្ធសាច់ជ្រូកបង្កកនេះមានឥទ្ធិពលអាក្រក់ណាស់ដល់ការបាត់បង់តម្លៃរបស់ជ្រូកកសិករចិញ្ចឹមនៅក្នុងស្រុក។ ជាមួយគ្នានេះ លោក ក៏បានបញ្ជាឱ្យក្រសួងយុត្តិធម៌ និងនាយកដ្ឋានស៊ើបអង្កេតពិសេស ឲ្យស្រាវជ្រាវរកបណ្តាញអ្នករត់ពន្ធជ្រូក និងត្រីបន្ថែមទៀត ហើយចាត់វិធានការទៅតាមផ្លូវច្បាប់។ មកដល់ពេលនេះជនសង្ស័យសរុបចំនួន៦នាក់ហើយដែលបានចាប់ខ្លួន ដោយពួកគេភាគច្រើន គឺសុទ្ធតែជាអ្នកដឹកនាំនៅក្នុងស្ថាប័នក្រុមហ៊ុន៕
ដោយៈ សរ សុជាតិ
