អគ្គនាយកដ្ឋានពន្ធដារ កាលពីថ្ងៃទី៦ កក្កដា បានចេញសេចក្ដីជូនដំណឹងព្យួរការអនុវត្តអាករលើតម្លៃបន្ថែម ១០% លើសេវាហិរញ្ញវត្ថុជាបណ្ដោះអាសន្ន រហូតដល់មានការជូនដំណឹងជាថ្មី។
នៅក្នុងសេចក្ដីជូនដំណឹងនោះផងដែរ អគ្គនាយកដ្ឋានពន្ធដារនឹងបន្តកិច្ចសហប្រតិបត្តិការជាមួយវិស័យឯកជន ដើម្បីសិក្សាលម្អិតឡើងវិញនូវនិយមន័យនៃពាក្យ “សេវាមូលដ្ឋានខាងហិរញ្ញវត្ថុ” និងការអនុវត្តអាករលើតម្លៃបន្ថែម VAT លើសេវាមិនមែនជាមូលដ្ឋានខាងហិរញ្ញវត្ថុក្នុងគោលដៅធានាបាននូវសង្គតិភាពក្នុងការអនុវត្តច្បាប់ និងបទប្បញ្ញត្តិស្តីពីសារពើពន្ធ។
សូមបញ្ជាក់ថា ពាក្យ“សេវាមូលដ្ឋានខាងហិរញ្ញវត្ថុ” នេះ ត្រូវបានច្បាប់កំណត់ឲ្យលើកលែងសម្រាប់ការបង់អាករបន្ថែម១០% ប៉ុន្ដែ ពាក្យមួយឃ្លានេះ ត្រូវបានបកស្រាយអត្ថន័យមិនទាន់ច្បាស់លាស់នៅឡើយរវាងភាគីរាជរដ្ឋាភិបាល និងវិស័យឯកជនផ្នែកហិរញ្ញវត្ថុ ដែលបានបង្កឲ្យមានការភ័ន្ដច្រឡំរហូតមកទល់ពេលនេះ។
អត្ថបទទាក់ទង!
សូមបញ្ជាក់ដែរថា ជុំវិញបញ្ហាដ៏រសើបលើការកំណត់យកអាករលើតម្លៃបន្ថែម ១០% លើសេវាហិរញ្ញវត្ថុនេះ ត្រូវបានគេមើលឃើញថា ជាបន្ទុកមួយទៀតសម្រាប់គ្រឹះស្ថានធនាគារនិងគ្រឹះស្ថានមីក្រូហិរញ្ញវត្ថុ បន្ទាប់ពីស្ថាប័នហិរញ្ញវត្ថុទាំងនេះ ទើបតែត្រូវបានធនាគារជាតិនៃកម្ពុជាដាក់កំហិតលើការកំណត់យកអត្រាការប្រាក់ឥណទាន មិនឲ្យលើសពី ១៨%ក្នុងមួយឆ្នាំ។
យ៉ាងណាក៏ដោយ ចំពោះការពន្យារពេលនៃការអនុវត្តសេវាហិរញ្ញវត្ថុ១០%នេះ ក៏ជាបន្ធូរបន្ថយស្ថានការណ៍បន្តិចដែរ សម្រាប់វិស័យឯកជននៃផ្នែកហិរញ្ញវត្ថុ ប៉ុន្ដែ ការកំណត់យកដំណោះស្រាយជាផ្លូវការយ៉ាងណានោះ យើងនឹងរង់ចាំមើលទាំងអស់គ្នាបន្តទៀត៕
