ប្រធានសភាពាណិជ្ជកម្មអាម៉េរិកប្រចាំកម្ពុជា លោក Casey Barnett បានលើកឡើងយ៉ាងដូច្នេះ នៅក្នុងលិខិតមួយ ដែលបាន ផ្ញើជូនលោកស្រី Bridgette Walker ភារធារីនៃស្ថានទូតអាម៉េរិក ប្រចាំនៅភ្នំពេញ នៅថ្ងៃទី ១៥ ខែធ្នូ ឆ្នាំ ២០២៥ ដើម្បីស្នើឱ្យស្ថានទូត បញ្ជូនសារទៅរដ្ឋាភិបាលអាម៉េរិក ឱ្យបានឆាប់ អំពីក្ដីបារម្ភរបស់ក្រុមហ៊ុនអាម៉េរិក ចំពោះស្ថានការដែលកំពុងតានតឹងខ្លាំងនាពេលនេះ។
បើតាមការគូសបញ្ជាក់របស់លោក Barnett បច្ចុប្បន្នមានអាជីវកម្ម ដែលគ្រប់គ្រងដោយជនជាតិអាម៉េរិក និងបានចុះបញ្ចីនៅកម្ពុជា សរុប ចំនួន ៨៦៥ ក្រុមហ៊ុន ហើយក្រុមហ៊ុនរាប់រយទៀតកំពុងធ្វើការជាមួយនឹងក្រុមហ៊ុនផលិតរបស់កម្ពុជា ដើម្បីផលិតទំនិញសម្រាប់ម៉ាកយីហោអាម៉េរិក។ ក្រុមហ៊ុនទាំងនេះ បានវិនិយោគរាប់ពាន់លានដុល្លារ នៅក្នុងប្រទេសកម្ពុជា និងបានផ្គត់ផ្គង់ផលិតផល និងសេវាកម្ម ដែលមានគុណភាពខ្ពស់ តម្លៃសមរម្យ សម្រាប់អ្នកប្រើប្រាស់ជាប្រជាជនអាម៉េរិកកាំង រួមទាំងកម្ពុជា ផងដែរ។
ប្រធានសភាពាណិជ្ជកម្មអាម៉េរិក ប្រចាំកម្ពុជា រូបនេះ ក៏បានគូសរំលេចអំពីទំនាក់ទំនងរវាងសហរដ្ឋអាម៉េរិក និងកម្ពុជា ដែលបាននិងកំពុងរីកចម្រើនយ៉ាងខ្លាំងនៅប៉ុន្មានឆ្នាំចុងក្រោយនេះ ជាពិសេសនៅក្នុងឆ្នាំ ២០២៥ ដោយប្រទេសទាំងពីរមានការចុះហត្ថលេខាលើកិច្ចព្រមព្រៀងស្ដីពី ពាណិជ្ជកម្មបដិការ ជាមួយគ្នា។ បន្ថែមពីនេះ ក៏មានជនជាតិអាម៉េរិករាប់ពាន់នាក់កំពុងរស់នៅក្នុងប្រទេសកម្ពុជា ជាមួយគ្រួសារ កូនៗ និងមនុស្សជាទីស្រលាញ់របស់ពួកគេ។ ជនជាតិអាម៉េរិក បានបង្កើតសាលារៀន និងសេវាថែទាំសុខភាពមួយចំនួននៅក្នុងប្រទេសកម្ពុជា ផងដែរ។
អត្ថបទគួរអាន
ដូច្នេះហើយ លោក Barnett ពិតជាមានក្ដីបារម្ភជាពន់ពេក ចំពោះសេចក្តីថ្លែងការណ៍របស់យោធាថៃ កាលពីថ្ងៃទី១៤ ខែធ្នូ ឆ្នាំ២០២៥ ដោយគំរាមកំហែងនឹងកំណត់កំពង់ផែរបស់កម្ពុជាថា ជាហានិភ័យខ្ពស់ និងបិទផ្លូវដឹកជញ្ជូនប្រេងឥន្ធនៈ និងទំនិញផ្សេងទៀតតាមសមុទ្រ។
លោក Barnett បាននិយាយថា៖ «ការបិទផ្លូវប្រេងឥន្ធនៈនឹងមានផលវិបាកយ៉ាងធ្ងន់ធ្ងរដល់គ្រួសារ និងអាជីវកម្មអាម៉េរិកនៅក្នុងប្រទេសកម្ពុជា។ អាជីវកម្មអាម៉េរិកនឹងបិទទ្វារ គ្រួសារអាម៉េរិកនឹងប្រឈមមុខនឹងបញ្ហាក្នុងការបំពេញតម្រូវការដឹកជញ្ជូន និងថាមពលប្រចាំថ្ងៃជាមូលដ្ឋាន រួមទាំងសម្រាប់សាលារៀន និងការព្យាបាលវេជ្ជសាស្ត្រផងដែរ ហើយ ជនស៊ីវិលអាម៉េរិកនឹងរងទុក្ខ»។
យោងតាមលោក Barnett ពាណិជ្ជកម្មភាគច្រើនរវាងសហរដ្ឋអាម៉េរិក និងកម្ពុជា ត្រូវបានធ្វើឡើងតាមរយៈការដឹកជញ្ជូនតាមសមុទ្រ។ ការកំណត់កំពង់ផែស៊ីវិលរបស់កម្ពុជាថា ជាហានិភ័យខ្ពស់នឹងធ្វើឱ្យថ្លៃធានារ៉ាប់រង និងការដឹកជញ្ជូនមិនអាចមានលទ្ធភាពទិញបាន ដែលនឹងបំផ្លាញពាណិជ្ជកម្មដែលកំពុងរីកចម្រើនរវាងសហរដ្ឋអាម៉េរិក និងកម្ពុជា។
របាយការណ៍ពីអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ក្នុងរយៈពេល១១ខែ ឆ្នាំ២០២៥ គិតចាប់ពីខែមករា ដល់ខែវិច្ឆិកា ឆ្នាំ២០២៥ ពាណិជ្ជកម្មរវាងកម្ពុជា និងសហរដ្ឋអាម៉េរិក មានទំហំជាង ជិត ១២ពាន់លានដុល្លារ កើនឡើងជិត ២៨% ធៀបនឹងរយៈពេលដូចគ្នាកាលពីឆ្នាំ២០២៤។ ក្នុងនោះ កម្ពុជាបាននាំចេញទៅអាម៉េរិក ក្នុងតម្លៃជាទឹកប្រាក់សរុបជាង ១១ ពាន់លានដុល្លារអាម៉េរិក បានកើនឡើងជាង ២៧% ខណៈនាំចូលពីសហរដ្ឋអាម៉េរិកមកវិញ មានតម្លៃជាង ៣៦៧លានដុល្លារ កើនឡើងជាង ៥០% បើធៀបនឹងរយៈពេលដូចគ្នាកាលពីឆ្នាំ២០២៤៕
