ក្រសួងផែនការ និងវិនិយោគវៀតណាម បានគូសបញ្ជាក់ថា កញ្ចប់គោលនយោបាយសន្តិសុខសង្គម ត្រូវបានបែងចែកប្រមាណ ២,២ពាន់លានដុល្លារ អាមេរិក សម្រាប់ជួយដល់ បុគ្គល និងអាជីវកម្មចំនួន ៦ប្រភេទផ្សេងៗគ្នា រួមមាន ប្រជាជនដែលបម្រើសេវានានា ពាក់ព័ន្ធនឹងការប្រយុទ្ធប្រឆាំងមេរោគកូវីដ១៩ ប្រជាជនក្រីក្រ និងកម្មកររងគ្រោះ ដោយឡែក ទឺកប្រាក់នៅសល់ប្រមាណ ៤០០លានដុល្លារអាមេរិកទៀត សម្រាប់ជួយដល់ អាជីវកម្ម ដែលកំពុងរងគ្រោះ ជួបនឹងផលលំបាក។
នៅក្នុងកញ្ចប់គាំទ្ររបស់វៀតណាមនេះ ទឹកប្រាក់ជាង ១,៥ពាន់លានដុល្លារអាមេរិក គឺបានមកពី រដ្ឋាភិបាលវៀតណាម ហើយទឹកប្រាក់ប្រមាណ ៧០០លានដុល្លារអាមេរិកទៀត គឺបានមកពី ធនាគារកណ្តាលវៀតណាមសម្រាប់គោលនយោបាយសង្គម។
អាជីវកម្មណាមួយ ដែលមានបុគ្គលិកឆ្លងមេរោគកូវីដ១៩ ត្រូវបានអនុញ្ញាតឲ្យ ខ្ចីប្រាក់ពី ធនាគារកណ្តាលវៀតណាមសម្រាប់គោលនយោបាយសង្គម ក្នុងអត្រាការប្រាក់ សូន្យ សម្រាប់ការបើកប្រាក់ខែបុគ្គលិក រយៈពេល ៣ខែ ក៏ប៉ុន្តែកម្ចីនេះ គឺផ្តល់ក្នុងកម្រិតអតិបរមា ៥០% នៃប្រាក់ឈ្នួលអប្បបរមាក្នុងស្រុក ហើយនៅខ្វះខាតប៉ុនណា ខាងម្ចាស់អាជីវកម្មជាអ្នកបំពេញបន្ថែម។
អត្ថបទគួរអាន
គួរជម្រាបដែរថា ក្នុងត្រីមាសទី ១ ឆ្នាំ ២០២០នេះ GDP របស់ប្រទេសវៀតណាម បានសម្រេចនូវ កំណើន ៣,៨% ដែលស្ថិតក្នុងកម្រិតទាប មិនធ្លាប់មានតាំងពីឆ្នាំ ២០១០មកម្ល៉េះ ហើយរដ្ឋាភិបាលវៀតណាម តាមរយៈក្រសួងផែនការ និងវិនិយោគវៀតណាម បានធ្វើការព្យាករណ៍ថា វីរុសកូវីដ១៩ នឹងទាញទម្លាក់កំណើនសេដ្ឋកិច្ចជាតិ ឲ្យមកនៅត្រឹម ៥,៩៦% ក្នុងឆ្នាំ២០២០នេះ ខណៈ ឆ្នាំ២០១៩កន្លងទៅ វៀតណាមសម្រេចបានកំណើន ៧,០២%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
