លោក ផាត់ដារាឆៃ តាវីវង់ (Phattarachai Taweewong) នាយកផ្នែកស្រាវជ្រាវ និងទំនាក់ទំនងនៅក្រុមហ៊ុនកាណាដា សាខាប្រទេសថៃ Colliers International (Thailand) បានទម្លាយឱ្យដឹងកាលពីសប្ដាហ៍មុនថា ចំណាប់អារម្មណ៍របស់ជនបរទេសដែលចង់ទិញផ្ទះនៅភូកេត បានជំរុញឱ្យតម្លៃផ្ទះឡើងដល់កម្រិតកំណត់ត្រា ក្នុងឆ្នាំ២០២៣ កន្លងទៅ ហើយតម្លៃដីធ្លីក៏បានហក់ឡើងខ្ពស់ដែររហូតដល់ចន្លោះពីប្រមាណ៧សែនដុល្លារអាម៉េរិក ទៅប្រមាណ២លាន ៨សែនដុល្លារ ក្នុងផ្ទៃមួយ១រ៉ៃ ឬប្រមាណ១.៦០០ម៉ែត្រការ៉េ។
ការបើកលក់គម្រោងខុនដូ និងផ្ទះលម្ហែបានឈានដល់កម្រិតកំណត់ត្រា ពោលគឺមានចំនួនច្រើនបំផុតមិនធ្លាប់មានជាប្រវត្តិសាស្ត្រ ដោយមានតម្លៃសរុបដល់ទៅប្រមាណ២ពាន់៨រយលានដុល្លា។ បច្ចុប្បន្នមានគម្រោងខុនដូចំនួន៣៦ ដែលមានជាង៨ពាន់៧០០យូនីត ជាមួយនឹងតម្លៃសរុបលើសពី១ពាន់៣រយលានដុល្លារ កំពុងត្រូវបានដាក់លក់បើធៀបនឹងចំនួនជាមធ្យមចន្លោះពី២ពាន់ ទៅ៣ពាន់យូនីត ដែលត្រូវបានដាក់លក់ក្នុងមួយឆ្នាំ។ បណ្ដាក្រុមហ៊ុនអភិវឌ្ឍន៍ធំៗដែលទាំងទៅពីទីក្រុងបាងកក និងក្រុមហ៊ុននៅភូកេត រួមមានក្រុមហ៊ុន Sansiri ក្រុមហ៊ុន Asset Wise ក្រុមហ៊ុន Origin Property និងក្រុមហ៊ុន Habitat Group។
ហើយសម្រាប់ឆ្នាំ២០២៤ នេះ មានការរំពឹងទុកថានឹងមានផ្ទះចំនួន៤បាន់៥០០យូនីតបន្ថែមទៀតត្រូវបានដាក់លក់។ អតិថិជនចាប់អារម្មណ៍ច្រើនជាងគេលើគម្រោងអភិវឌ្ឍន៍នៅភាគខាងលិចនៃភូកេត ដែលផ្ទះក្នុងមួយយូនីត មានតម្លៃចន្លោះពី១៤ម៉ឺនដុល្លារ ទៅជិត២៨ម៉ឺនដុល្លារ។ ដោយឡែកទីផ្សារផ្ទះលម្ហែក៏មានការរីកចម្រើនយ៉ាងឆាប់រហ័សផងដែរ។ បច្ចុប្បន្នមានគម្រោងរហូតដល់៦១ជាមួយនឹងជាង១ពាន់១០០យូនីតត្រូវបានដាក់លក់បាន ជាមួយនឹងតម្លៃសរុបជាង១ពាន់៤រយលានដុល្លារ ដែលជាតួលេខខ្ពស់បំផុតមិនធ្លាប់មាន។
អចលនទ្រព្យទាំងនេះភាគច្រើនមានទីតាំងនៅផ្នែកខាងលិចនៃកោះភូកេត។ បណ្ដាក្រុមហ៊ុនអភិវឌ្ឍន៍ដែលចូលរួមក្នុងគម្រោងទាំងនេះរួមមានក្រុមហ៊ុន Laguna Resorts and Hotels ក្រុមហ៊ុន Sansiri ក្រុមហ៊ុន Asset Wise ក្រុមហ៊ុន Origin Property ក្រុមហ៊ុន Habitat Group និងក្រុមហ៊ុន Siamese Estate។ ហើយគម្រោងជាច្រើនទៀតក៏ទទួលបានការចាប់អារម្មណ៍ខ្លាំងពីអ្នកទិញផងដែរ៕
