ហេតុអ្វីធនាគារនៅអាស៊ីអាចប្រឈមនឹងការលំបាកក្នុងការជំរុញដើមទុន តាមរយៈការចេញលក់មូលបត្របំណុល?

ស្ថាប័នហិរញ្ញវត្ថុ Citigroup បានអះអាងថា បញ្ហាប្រឈមនឹងមានកាន់តែស្រួចស្រាល់ ជាពិសេសសម្រាប់ធនាគារតូចៗមួយចំនួនធំនៅអាស៊ី ដែលពឹងផ្អែកខ្លាំងលើការបំពេញប្រភពទុនតាមការចេញលក់បណ្ណបំណុល AT1 បើធៀបនឹងធនាគារដែលជាជាដៃគូមកពីបស្ចិមប្រទេសផ្សេងៗទៀត ដោយសារតែរនិយ័តករមានការតម្រូវឲ្យមានការបង្កើននូវសាច់ប្រាក់ងាយស្រួល ឬទុនបង្វិល។ បណ្ណបំណុល Additional Tier-1 ឫហៅកាត់ថា AT1 គឺជា ទម្រង់នៃបណ្ណបំណុលដែលអាច បំប្លែងទៅជាភាគហ៊ុនបាន ហើយវាត្រូវបានគេបង្កើតឡើងបន្ទាប់ពីវិបត្តិសេដ្ឋកិច្ចសកលកាលពីអំឡុងឆ្នាំ២០០៧-២០០៨ ដើម្បីការពារតម្រូវការ សម្រាប់មូលនិធិរដ្ឋាភិបាល ដែលធានាលើធនាគារដែលកំពុងមានបញ្ហា។

យ៉ាងណាមិញ នៅក្រោមកិច្ចព្រមព្រៀងទិញយកភាគហ៊ុនធនាគារ Credit Suisse និយតករស្វីសបានកំណត់ថាមូលបត្របំណុលប្រភេទ AT1 របស់ធនាគារ Credit Suisse ដែលមានតម្លៃសរុបជាង ១៧ពាន់លានដុល្លាអាមេរិក គឺត្រូវរំសាយចោល ដែលការសម្រេចចិត្តនេះហើយគឺជាអ្វីដែលនឹងធ្វើឱ្យទីផ្សារឥណទានពិភពលោក ពិសេសនៅអាស៊ីស្រឡាំងកាំង ហើយធ្វើឱ្យម្ចាស់ភាគហ៊ុន និងដៃគូជាច្រើនមានការខឹងសម្បារ។

មកដល់ពេលនេះគេដឹងថា មូលបត្របំណុល AT1 អាចត្រូវបានបំប្លែងទៅជាភាគហ៊ុន ដែលមានតម្លៃខ្ពស់ជាងសន្ទស្សន៍ភាគហ៊ុននៅក្នុងរចនាសម្ព័ន្ធដើមទុនរបស់ធនាគារ ហើយប្រសិនបើធនាគារមានបញ្ហា ម្ចាស់ប័ណ្ណបំណុលជាធម្មតានឹងមានអាទិភាពមកមុនម្ចាស់ភាគហ៊ុន ក្នុងលក្ខខណ្ឌនៃការទទួលបានប្រាក់របស់ពួកគេត្រឡប់មកវិញ។

អ្នកជំនាញបានអះអាងថា ធនាគារនៅអាស៊ី ដែលពឹងផ្អែកលើប្រភពទុនពីការលក់បណ្ណបំណូលប្រភេទ AT1 អាចជួបបញ្ហារអាក់រអួលនៅក្នុងការការពង្រីកតារាងតុល្យការរបស់ពួកគេ ហើយវាក៏អាចនឹងជះឥទ្ធិពលលើ បញ្ហា អត្រាការប្រាក់ផងដែរ ប៉ុន្តែទោះបីជាយ៉ាងណាក៏ដោយក៏គេនៅតែមានសុទិដ្ឋិនិយមថា ផលប៉ះពាល់នៃ ប្រភពទុន AT1s មិនបង្កផលប៉ះពាល់រយៈពេលវែងនោះឡើយ ៕

អត្ថបទ ៖ សុខ ជា