អ្នកជំនាញពន្យល់ពីមូលហេតុដែលសេវាដឹកជញ្ជូននៅកម្ពុជាមានតម្លៃថ្លៃ

ក្រៅពីតម្លៃអគ្គិសនីមានតម្លៃថ្លៃខ្ពស់ជាងប្រទេសជិតខាង តម្លៃសេវាដឹកជញ្ជូននៅកម្ពុជាក៏ត្រូវបានអ្នកជំនាញសេដ្ឋកិច្ចជាច្រើនបានអះអាងថា នៅតែមានតម្លៃខ្ពស់ផងដែរ ហើយវាក៏ជាកត្តារាំងស្ទះមួយសម្រាប់ការលូតលាស់ផ្នែកសេដ្ឋកិច្ច ក៏ដូចជាការប្រកួតប្រជែងរបស់កម្ពុជា ជាមួយបណ្ដាប្រទេសក្នុងតំបន់ផងដែរ។

ហេតុអ្វីតម្លៃសេវាដឹកជញ្ជូនទំនិញនៅកម្ពុជា នៅតែមានតម្លៃខ្ពស់?

ក្នុងន័យសេដ្ឋកិច្ច ការដឹកជញ្ជូនគឺប្រៀបបាននឹងសរសេរឈាមដ៏សំខាន់មួយក្នុងការជំរុញការលូតលាស់ ក៏ដូចជាសន្ទុះសេដ្ឋកិច្ចក្នុងប្រទេសនីមួយៗ។ កាលណា ប្រព័ន្ធហេដ្ឋារចនាសម្ព័ន្ធ មិនត្រូវបានអភិវឌ្ឍពេញលេញ នោះសមត្ថភាពនៃការផ្ដល់សេវាដឹកជញ្ជូននឹងត្រូវប្រឈមនឹងបញ្ហា ពិសេសគឺតម្លៃមានកាន់តែខ្ពស់ ដែលធ្វើឲ្យតម្លៃផលិតផលនានានឹងកើនតម្លៃខ្ពស់ ជាហេតុធ្វើឲ្យបាត់បង់ភាពប្រកួតប្រជែង។

ជុំវិញបញ្ហានេះដែរ លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានលើកឡើងថា មានកត្តាសំខាន់ៗមួយចំនួន ដែលបានធ្វើឲ្យតម្លៃនៃសេវាដឹកជញ្ជូនរបស់កម្ពុជា នៅតែមានខ្ពស់ជាងប្រទេសជិតខាង។ លើសពីនេះ វាក៏ជាកត្តាប្រឈមមួយរបស់អ្នករកស៊ីជាច្រើន តែងតែរអ៊ូរទាំជារឿយៗផងដែរ។ ក្នុងនោះ រួមមាន៖

១, តម្លៃសេវាក្រៅផ្លូវការ៖ ការយកសេវាក្រៅផ្លូវការនានា នៅតែជាកត្តាចោទមួយ ដែលធ្វើឲ្យវិស័យដឹកជញ្ជូនរបស់កម្ពុជានៅតែមានតម្លៃខ្ពស់។ តែយ៉ាងណា បច្ចុប្បន្ន បើតាមការប្រកាសរបស់រាជរដ្ឋាភិបាលនាពេលកន្លង ខាងរាជរដ្ឋាភិបាលក៏បាននិងកំពុងដុតដៃដុតជើង លុបបំបាត់សេវាទាំងអស់នេះផងដែ។

២, ប្រតិបត្តិការពាណិជ្ជកម្ម៖ បច្ចុប្បន្ន ការដោះដូរពាណិជ្ជកម្មរបស់កម្ពុជា នៅមានការដឹកជញ្ជូនមួយចំនួនធ្វើឡើងលក្ខណៈផ្លូវតែមួយ (One Way Trade) ពោលគឺដឹកទំនិញចេញទៅហើយ ត្រូវបើកឡានទទេរមកវិញ ដោយមិនមានទិញទំនិញដឹកមកវិញនោះឡើយ ដូច្នេះ វាធ្វើឲ្យការចំណាយលើថ្លៃដឹកជញ្ជូនមានខ្ពស់។

៣, ទំហំផ្លូវនៅចង្អៀតនៅឡើយ៖ សម្រាប់ការដឹកជញ្ជូនធុនធ្ងន់ បច្ចុប្បន្ន ទំហំផ្លូវរបស់កម្ពុជាហាក់នៅមិនទាន់មានគ្រប់គ្រាន់នៅឡើយទេ ដែលធ្វើឲ្យការបើកបរត្រូវចំណាយពេលវេលាយូរ ជាងផ្លូវ Express Way ដែលមានផ្លូវធំ និងបើកបរមានខ្សែបន្ទាត់ច្រើនសម្រាប់ការបើកបរ។

យ៉ាងណាក៏ដោយចុះ លោក ស៊ិន ចន្ធី បានគូសបញ្ជាក់ដែរថា នៅឆាប់ៗនេះដែរ ផែនការមេនៃវិស័យដឹកជញ្ជូនរបស់កម្ពុជា (Master Plan of Logistics) ដែលរាជរដ្ឋាភិបាលបានខិតខំយកចិត្តទុកដាក់សិក្សា ស្រាវជ្រាវជាយូរមកហើយនោះ ក៏នឹងត្រូវដាក់ចេញជាផ្លូវការ នៅខែមីនានេះដែរ។ បើតាមការអះអាងពីអ្នកជំនាញផ្នែកដឹកជញ្ជូនរូបនេះ ផែនការមេនៃវិស័យដឹកជញ្ជូននេះ ពិតជាមានសារសំខាន់ណាស់ ក្នុងការអភិវឌ្ឍ សំដៅធ្វើយ៉ាងណាឲ្យតម្លៃសេវាដឹកជញ្ជូនមានតម្លៃថោក និងប្រកបដោយភាពប្រកួតប្រជែង។

ក្នុងនោះដែរ បើតាមការសិក្សារបស់ជប៉ុនដែលជាអ្នកសិក្សាស្រាវជ្រាវលើផែនការមេនៃវិស័យដឹកជញ្ជូនរបស់កម្ពុជា បានឲ្យដឹងថា គិតត្រឹមឆ្នាំ២០២៥ តម្រូវការនៃវិស័យពាណិជ្ជកម្ម និងការដឹកជញ្ជូនរបស់កម្ពុជា នឹងកើនឡើងជិត៣ដងឯណោះ ហើយកម្ពុជាក៏បាននិងកំពុងត្រៀមខ្លួនសម្រាប់ទទួលយកការលូតលាស់នេះផងដែរ។

លោក ស៊ិន ចន្ធី បានគូសបញ្ជាក់ទៀតថា លោកទទួលស្គាល់ចំពោះការលើកឡើងថា តម្លៃដឹកជញ្ជូនរបស់កម្ពុជាហាក់នៅមានខ្ពស់ បើធៀបនឹងបណ្ដាប្រទេសជិតខាង។ យ៉ាងណាក៏ដោយចុះ លោកថា បច្ចុប្បន្ន រាជរដ្ឋាភិបាលកម្ពុជាក៏បាននិងកំពុងដុតដៃដុតជើងយ៉ាងខ្លាំង ក្នុងការអភិវឌ្ឍហេដ្ឋារចនាសម្ព័ន្ធទាំងផ្នែករឹង និងផ្នែកទន់ ដូចជាការពង្រីកកំពង់ផែ និងការតភ្ជាប់ផ្លូវគោក ផ្លូវដែក និងផ្លូវអាកាស ព្រមជាមួយនឹងការសម្រួលដល់ប្រព័ន្ធផ្លូវច្បាប់មួយចំនួនផងដែរ។

ជាផ្នែកមួយនៃផែនការមេរបស់វិស័យដឹកជញ្ជូននេះដែរ លោក ចន្ធី បានសង្កត់ធ្ងន់ថា បច្ចុប្បន្ន សមាគមបាននិងកំពុងធ្វើការដោះស្រាយបញ្ហាមួយចំនួន លើវិស័យដឹកជញ្ជូនជាមួយរាជរដ្ឋាភិបាល ដោយធ្វើការជាមួយស្ថាប័នគយ និងកាំកុងត្រូល លើសេវាកម្មនាំចេញ-នាំចូល ដោយពន្លឿននូវការបញ្ចេញលិខិតនាំចេញបានធ្វើបាន ៨០ភាគរយ និងជាងនេះទៀតបានជួយពន្លឿននៃការបញ្ចេញទំនិញក្នុងកំពង់ផែបានកាន់តែលឿនជាមុន។

លោកប្រធានសមាគមភ្នាក់ងារបញ្ជូនទំនិញកម្ពុជារូបនេះ បានបញ្ជាក់ថា នៅឆ្នាំ២០១៨នេះ សមាគមនឹងពន្លឿននូវដំណើរការប្រព័ន្ធស្វ័យប្រវត្តិកម្មគយ ដែលគ្រោងនឹងដាក់ឲ្យដំណើរការនៅក្នុងខែមីនា និងសង្ឃឹមថា នឹងអាចកាត់បន្ថយការចំណាយក្រៅផ្លូវការយ៉ាងមានប្រសិទ្ធភាព។

គួរបញ្ជាក់ថា សមាគមភ្នាក់ងារបញ្ជូនទំនិញកម្ពុជាមានសមាជិកប្រមាណ ៧៨ ក្រុមហ៊ុន ខណៈការចុះបញ្ជីក្រុមហ៊ុននេះមានចំនួនជិត ៥០០ក្រុមហ៊ុន។ បើតាមសមាគមបច្ចុប្បន្ន មានរថយន្តកុងត័រន័រ ប្រមាណ ៥ពាន់គ្រឿង កំពុងចរាចរដឹកជញ្ជូនទំនិញនៅកម្ពុជា។ ក្រុមហ៊ុននិងភ្នាក់ងារកប៉ាល់ ដែលបានទំនាក់ទំនងមកកម្ពុជា មានជិត ២០ក្រុមហ៊ុន ក្រុមហ៊ុនអាកាសចរណ៍មានជាង ៤៤ ខណៈដែលជើងហោះហើរត្រង់មានជាង ២០ក្រុមហ៊ុន ហើយក៏មានក្រុមហ៊ុនអាកាចរណ៍ថ្មីៗចំនួន ៥ ទៅ ៦ក្រុមហ៊ុនទៀត ក៏កំពុងត្រៀមខ្លួនចុះបញ្ជីផ្លូវការនៅកម្ពុជាផងដែរ៕