[វីដេអូ] អេស៊ីលីដា រំពឹងបានអ្នកទិញភាគហ៊ុន ជាឯកត្តបុគ្គល ១០០% ខណៈការបោះផ្សាយលក់ភាគហ៊ុនកាន់តែខិតចូលមកដល់

នៅឆ្នាំ២០២០នេះ ធនាគារអេស៊ីលីដា នឹងបើកនូវសករាជថ្មីរបស់ខ្លួនក្នុងវិថីហិរញ្ញវត្ថុនៅកម្ពុជា ហើយក៏ត្រូវបានគេមើលឃើញថា នឹងអាចក្លាយជាធនាគារគំរូមួយផងដែរ ក្នុងការបោះជំហានជើងចូលក្នុងទីផ្សារភាគហ៊ុននៅក្នុងពេលឆាប់ៗដ៏ខ្លីខាងមុខនេះ។ ស្របពេលដែល ធនាគារដ៏ធំមួយនេះ នឹងបោះផ្សាយលក់ភាគហ៊ុននោះ ប្រាក់ចំណេញរបស់ធនាគារអេស៊ីលីដា ក៏ត្រូវបានរំពឹងដែរថា នឹងហក់កើនឡើងលើស ១០០លានដុល្លារអាមេរិកនៅឆ្នាំ២០២០។ នេះបើតាមការអះអាងរបស់ថ្នាក់ដឹកនាំជាន់ខ្ពស់របស់ធនាគារ ដែលប្រាប់សារព័ត៌មានខេមបូណូមីសនាពេលថ្មីៗនេះ។

លោក បណ្ឌិត អ៊ិន ចាន់នី ប្រធាននាយក​ប្រតិបត្តិ​ធនាគារ​អេស៊ីលីដា បាន​អះអាង​ប្រាប់​សារព័ត៌មាន​ខេបូណូមីសថា សម្រាប់​ឆ្នាំ២០២០នេះ ធនាគារអេស៊ីលីដា រំពឹង​ប្រាក់ចំណេញ​នឹងកើនឡើង​លើសឆ្នាំ២០១៩ទៅទៀត ដោយយ៉ាងហោចណាស់​ក៏មានកំណើន​១០%ដែរ ខណៈដែល​កាលពីឆ្នាំ២០១៩​ប្រាក់ចំណេញ​របស់អេស៊ីលី ធ្លាប់បាន​រំពឹងថានឹង​មាន​ប្រមាណ ១០០ លាន​ដុល្លារអាមេរិក។