ប្លែក! កូន​​គោ​បៅ​ដោះ​សុនខ​នៅ​ស្រុក​អង្គស្នួល​ខេត្ត​កណ្ដាល

ព្រឹកថ្ងៃសៅរ៍ ទី៤ ខែកុម្ភៈ ឆ្នាំ២០១៧ យើងបានចុះទៅភូមិឈើបួន ឃុំម្កាក់ ស្រុកអង្គស្នួល ខេត្តកណ្ដាល ដើម្បីថតវីដេអូអំពីជីវភាពពលរដ្ឋឡើងត្នោតធ្វើស្ករនៅទីនោះ។ នៅក្នុងភូមិនេះ គ្រួសារមួយបានប្រាប់រឿងចម្លែកមួយ គឺកូនគោរបស់ពួកគេបៅដោះសត្វសុនខ ដែលនៅផ្ទះជាមួយគ្នា។

រឿងរ៉ាវគឺដូច្នេះ ... 

នៅពេលកូនគោស្ថិតនៅក្នុងពោះ មេរបស់វាកើតជំងឺអុតក្ដាម ដូច្នេះ ពេលកើតវាមក ក៏គ្មានទឹកដោះឲ្យបៅ។ ម្ចាស់គោរវល់តែទៅស្រែព្រលឹមព្រលប់ជាច្រើនថ្ងៃ មិនបានចាប់អារម្មណ៍ថា មេគោគ្មានទឹកដោះនោះទេ ហើយក៏មិនបានដឹងថា កូនគោគ្មានអាហារចូលពោះសូម្បីបន្តិចបីបួនថ្ងៃ។ 

ពេលនោះ ដើរប្រទះអ្វីបឺតជញ្ជក់ហ្នឹង។ ជួបគោគ្នាវា វាក៏បឺតជញ្ជក់ដែរ តែត្រូវគោគ្នាវាធាក់ចេញ។ ប៉ុន្តែ បឺតជញ្ជក់ចំមេសុនខដែលនៅផ្ទះជាមួយគ្នា វាក៏នៅស្ងៀមរហូត។ 

ទំនាក់ទំនងជិតស្និទ្ធដូចមេនិងកូននេះបន្តដល់សព្វថ្ងៃ។ ឥឡូវនេះ កូនគោអាយុបានពីរខែហើយ ម្ចាស់របស់វាបញ្ចុកទឹកដោះសម្រាប់សត្វ និងបបរដល់វា ខណៈដែលវាបន្តបៅសត្វសុនខដដែល៕