វិនិយោគិនហុងកុងរូបនេះមានមហិច្ឆតាកសាងខុនដូប្រណីតនិងតម្លៃសមរម្យបំផុត សម្រាប់ប្រជាជនកម្ពុជា

លោក Ben Li (បិន លី) អាយុ ៣៧ឆ្នាំ កើតនៅទីក្រុងហុងកុង ក្នុងគ្រួសារសហគ្រិនមួយ ដែលមានទំនាក់ទំនងរយៈពេលជិត ៣ទសវត្សរ៍ជាមួយប្រទេសកម្ពុជា ។ តាមពិតទៅ គ្រួសាររបស់លោកបានមកវិនិយោគនិងរកស៊ីនៅក្នុងវិស័យកាត់ដេរនៅកម្ពុជា តាំងពីដើមទសវត្សរ៍ឆ្នាំ៩០មកម្ល៉េះ គឺជិត ៣០ឆ្នាំហើយ។

លោក លី រៀននៅសាកលវិទ្យាល័យច្បាប់នៅចក្រភពអង់គ្លេស ហើយបន្ទាប់ពីបញ្ចប់ការសិក្សា លោកបានធ្វើការរយៈពេល ៥ឆ្នាំ នៅក្នុងក្រុមហ៊ុនគណនេយ្យនិងសវនកម្មដ៏ធំលំដាប់ពិភពលោកមួយ ឈ្មោះថា PricewaterhouseCoopers(PwC) ។

បន្ទាប់ពីធ្វើការ៥ឆ្នាំឲ្យក្រុមហ៊ុនលំដាប់ពិភពលោកនេះ នៅទីបំផុត រូបលោកក៏បានសម្រេចចិត្តធ្វើការឲ្យក្រុមហ៊ុនគ្រួសាររបស់លោក នៅប្រទេសកម្ពុជា វិញ ដែលវិនិយោគទៅលើរោងចក្រផលិតសម្លៀកបំពាក់ម៉ាកល្បីៗ ដូចជា Zara, Superdry, C&A, Marks & Spencer និង Uniqlo សម្រាប់ការនាំចេញ ។

បច្ចុប្បន្ន វិនិយោគិនហុងកុងវ័យក្មេងនេះ បានងាកមកផ្ដោតការវិនិយោគលើវិស័យអចលនទ្រព្យ ពោលគឺ វិស័យខុនដូ នៅកម្ពុជា ។

លោក លី អះអាងថា លោកមានមហិច្ឆតាអភិវឌ្ឍគម្រោងខុនដូ ដែលផ្ដល់នូវលំនៅដ្ឋានបែបប្រណីត ប៉ុន្តែ ក្នុងតម្លៃមួយធូរថ្លៃបំផុត ដើម្បីផ្ដល់លទ្ធភាពឲ្យយុវជនកម្ពុជា ជំនាន់ទីពីរ ជំនាន់ទីបី អាចមានផ្ទះផ្ទាល់ខ្លួន ខណៈដែលគេចេញពីសាលា និងចាប់ផ្ដើមការងារអាជីពដំបូងៗរបស់ខ្លួន។

លោក បិន លី និយាយទាំងញញឹម ថា «គឺកម្ពុជានេះហើយ ដែលបានធ្វើឲ្យសុបិនយើងក្លាយជាការពិត ។ ដូច្នេះហើយ ទើបយើងត្រូវចូលរួមចំណែកក្នុងការកសាងកម្ពុជា» ៕