ឧកញ៉ា សៀ ឫទ្ធី បោះទុនជាង១០០លានដុល្លារលើគម្រោងបុរីលំនៅដ្ឋានប្រណីត

បន្ទាប់ពីទទួលបានភាពជោគជ័យនិងមានការគាំទ្រយ៉ាងខ្លាំងពីសាធារណជនដែលជាអថិតិជននៅក្នុងគម្រោងអគារលំនៅដ្ឋាន ខុនដូរខ្ពស់ៗទំនើបៗនៅក្នុងទីក្រុងភ្នំពេញកន្លងមក នៅពេលនេះដែរ លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើលប្រ៊ីដ គ្រុប កំពុងចាប់ផ្តើមគម្រោងអភិវឌ្ឍន៍បុរីលំនៅដ្ឋានដ៏ប្រណីតមួយទៀតនៅតាមមាត់ទន្លេ។

គម្រោងបុរីលំនៅដ្ឋានប្រណីត The Palm តាមបែបនៅសិង្ហបុរី និងកាតា នឹងបង្ហាញខ្លួននៅកម្ពុជាឆាប់ៗនេះ។

គម្រោងនោះមានឈ្មោះថា The Palm គឺជាគម្រោងអភិវឌ្ឍន៍លំនៅដ្ឋានដ៏ប្រណីតប្លែកពីគេ មិនធ្លាប់មាននៅកម្ពុជា ដោយមានការសហការជាមួយដៃគូវិនិយោគមកពីប្រទេសសិង្ហបុរី។ គម្រោងនេះ នឹងចាប់ផ្តើមដំណើរសាងសង់ជាផ្លូវការនៅក្នុងត្រីមាសទី៣ ឆ្នាំនេះហើយ ដែលនឹងចំណាយទុនវិនិយោគសាងសង់ប្រមាណ ១១០លានដុល្លារអាមេរិក។

លោកឧកញ៉ាបានបញ្ជាក់យ៉ាងដូច្នេះថា ៖ «ខ្ញុំសុំធ្វើការកែតម្រូវតួលេខទឹកប្រាក់វិនិយោគបន្តិច ដែលសារព័ត៌មានមួយចំនួនចុះផ្សាយខុសដោយមិនបានសាកសួរ ថា ខ្ញុំចំណាយទុនវិនិយោគ ៣០លានដុល្លារអាមេរិក គ្រាន់តែដីវាគ្រប់បាត់ទៅហើយ។ ការពិតគម្រោងនេះ យើងចំណាយទុនវិនិយោគសរុប ប្រមាណ ១១០លានដុល្លារអាមេរិកឯណោះ»។

លោកឧកញ៉ាបន្តថា គម្រោងនេះនឹងចាប់ផ្តើមបើកលក់ក្នុងរយៈពេល ១ខែ ២ខែឲ្យអតិថិជនខាងមុខនេះ។ បន្ថែមលើសពីនេះទៅទៀត នៅថ្ងៃទី១៨ ក្នុងខែនេះ យើងនឹងមានការរៀបចំកម្មវិធីមួយជួបជុំ មិត្តភក្តិយើងអតិថិជនយើង ដែលតែងតែតាមទិញគម្រោងរបស់យើង ដូចជា The Bridge The Peak កន្លងមក គឺយើងផ្តល់អាទិភាពជូនពួកគាត់មុនគេតែម្តង។

លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុនវើលប្រ៊ីដ គ្រុប បានមានប្រសាសន៍ថា គម្រោងនេះមានលក្ខណៈពិសេសដូចគ្នាទៅនឹងគម្រោង ឌឹ ផាម (The Palm) នៅប្រទេសកាតា និងសិង្ហបុរី អ៊ីចឹងដែរ ដែលសាងសង់មានសណ្ឋានរូបរាងដូចជាដើមត្នោត។

លោកឧកញ៉ាបន្តថា គម្រោង The Palm នេះ សាងសង់នៅលើផ្ទៃដីចំនួន ៣,៧ហិកតា ដែលបានបោះទុនវិនិយោគរាប់រយលានដុល្លារអាមេរិក។ គម្រោងនេះខុសប្លែកពីគម្រោងទី១ និងគម្រោងទី២ ដែលក្រុមហ៊ុន វើល ប្រ៊ីដ បានអភិវឌ្ឍសាងសង់រួចមកហើយ ដូចជាគម្រោងសាងសង់អគារពាណិជ្ជកម្ម និងលំនៅដ្ឋានកម្ពស់ ៤៥ជាន់ The Bridge និងអគារពាណិជ្ជកម្មលំនៅដ្ឋាន សណ្ឋាគារ ដែលមានឈ្មោះថា The Peak។ ហើយគម្រោងទាំងពីរនេះទទួលបានការគាំទ្រនិងមានភាពជោគជ័យយ៉ាងខ្លាំង។

គម្រោងអភិវឌ្ឍន៍ បុរី ឌឹ ផាម នឹងមានការសាងសង់វីឡាកូនកាត់ចំនួន ២០៤វីឡាជាលក្ខណៈបឹងកាឡូ ១៦វីឡា និងមានកន្លែងចតអូប័រ ជាពិសេស សម្រាប់អ្នកដែលទិញវីឡាបឹងកាឡូ។ ហើយវីឡាទាំងអស់សុទ្ធតែអាចមើលឃើញផ្ទៃទន្លេទាំងអស់ ហើយផ្ទះមានជណ្តើរយន្តសម្រាប់មនុស្សចាស់ផងដែរ។

ផ្ទះគំរូ នៃគម្រោងបុរីលំនៅដ្ឋានប្រណីត ឌឹ ផាម

គម្រោងបុរីលំនៅដ្ឋានលក្ខណៈជា រីស៊ត The Palm ស្ថិតនៅតាមបណ្តោយផ្លូវជាតិលេខ១ ចម្ងាយប្រមាណ ៤គីឡូម៉ែត្រ ពីគល់ស្ពានព្រះមុនីវង្ស ដែលតភ្ជាប់រហូតដល់មាត់ទន្លេ ក្នុងភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

មូលហេតុដែលឧកញ៉ា សៀ ឫទ្ធី សម្រេចចិត្តអភិវឌ្ឍន៍បុរីលំនៅដ្ឋាន The Palm នៅតំបន់នោះ ដោយសារតែមើលឃើញថា តំបន់នោះមានប្រព័ន្ធហេដ្ឋារចនាសម័្ពន្ធល្អ ផ្លូវជាតិធំទូលាយ មានស្ពានពីរតភា្ជប់ និងទីតាំងអភិវឌ្ឍន៍នៅជិតមាត់ទន្លេ ដែលបង្កលក្ខណៈពិសេសសម្រាប់ការអភិវឌ្ឍគម្រោងលំនៅដ្ឋាន ឌឹ ផាម នេះ ឲ្យក្លាយជា រីស៊ត ដ៏ប្រណីត។

យ៉ាងណាក៏ដោយឧកញ៉ា សៀ ឫទ្ធី មិនទាន់អាចប្រាប់ពីតម្លៃផ្ទះលក់ចេញនៅឡើយទេ ប៉ុន្តែ លោកអះអាងថា តម្លៃនឹងលក់ទៅតាមទីផ្សារបច្ចុប្បន្ន មិនខ្ពស់ជាងគេពេកនោះទេ។ ហើយអថិតិជនរបស់យើងគឺជាប្រភេទអតិថិជនថ្នាក់ខ្ពស់ និងថ្នាក់មធ្យម។

ពាក់ព័ន្ធទៅនឹងគម្រោងសាងសង់ក្នុងអាណត្តិបោះឆ្នោតជាតិ លោកឧកញ៉ា សៀ ឫទ្ធី មិនមានការព្រួយបារម្ភអ្វីនោះទេ។ សម្រាប់លោកជាអ្នកវិនិយោគត្រូវតែឆ្លៀតឱកាស ឆក់យកឱកាសដែលល្អដើម្បីធ្វើការអភិវឌ្ឍ និងវិនិយោគ បើសិនអ្នកទាំងអស់ខ្លាច យើងក៏ខ្លាច នោះយើងនឹងបាត់បង់ឱកាសហើយ។ ប៉ុន្តែ យើងដឹងច្បាស់ យើងមិនខ្លាច នោះហើយជាភាពជោគជ័យរបស់យើង។

លោកឧកញ៉ាថា ការរកស៊ីសំខាន់ គឺត្រូវមានភាពមុតស្រួច និងមានការសម្រេចចិត្តឲ្យទាន់ពេលវេលា។ លោកឧកញ៉ា សៀ ឫទ្ធី បានបញ្ជាក់អះអាងលោកនៅមានគម្រោងអភិវឌ្ឍសាងសង់អគារពាណិជ្ជកម្ម និងលំនៅដ្ឋានពីរ បីទៀត ដែលនឹងប្រកាសសាងសង់ជាផ្លូវការនៅពេលឆាប់ៗខាងមុខនេះ៕