សាជីវកម្មក្ស័យធននៅជប៉ុន បានឈានដល់កម្រិតខ្ពស់បំផុតនៅក្នុងរយៈពេល៩ឆ្នាំចុងក្រោយ

បើយោងតាមការចុះផ្សាយរបស់សារព័ត៌មាន Nikkei គិតត្រឹមឆ្នាំ២០២៣ មានសាជីវកម្មរហូតដល់ជាង៩ពាន់ក្រុមហ៊ុនត្រូវបានជប៉ុនចុះក្នុងបញ្ជីក្ស័យធន ដែលជាកម្រិតមួយខ្ពស់បំផុតមិនធ្លាប់មានក្នុងរយៈពេល៩ឆ្នាំកន្លងមកនេះ។ ហើយប្រសិនបើបូកទាំងក្រុមហ៊ុន ដែលទទួលបានការឧបត្ថម្ភធន និងការលើកលែងខ្លះក្រោមគោលនយោបាយគាំពារអំឡុងពេលរាតត្បាតនៃមេរោគកូវីដ-១៩ បន្ថែមទៀតនោះ ចំនួនសហគ្រាសដែលក្ស័យធននៅជប៉ុន បានឈានជាង១ម៉ឺនក្រុមហ៊ុនឯណោះ។

ក្រុមហ៊ុនស្រាវជ្រាវ Tokyo Shoko បានឲ្យដឹងថា ដោយសារតម្លៃសម្ភារឡើងថ្លៃបានធ្វើឲ្យសហគ្រាសសំណង់ ដែលក្ស័យធនបានកើតឡើងដល់លើស៣៩% ឫស្មើនឹង១ពាន់៧រយ ក្រុមហ៊ុន ខណៈដែលសាជីវកម្មលក់រាយក្ស័យធនកើនដល់២៧% ស្មើនឹងជាង១ពាន់ក្រុមហ៊ុន ។ ប្រភពខាងលើបានឱ្យដឹងថា សាជីវកម្មដែលជួបបញ្ហាក្ស័យធនបានរីករាលដាលពាសពេញតំបន់ទាំងអស់នៅក្នុងប្រទេសជប៉ុន។

លោក ណូប៊ូអូ តូមូដា (Nobuo Tomoda ) នាយកគ្រប់គ្រងក្រុមហ៊ុន Tokyo Shoko Research បាននិយាយថា ការកើនឡើងនៃថ្លៃដឹកជញ្ជូន បញ្ហាកង្វះកម្លាំងពលកម្មនៅក្នុងឧស្សាហកម្ម និងបញ្ហាភស្តុភារ ជាមូលហេតុដែលជះឥទ្ធិពលយ៉ាងខ្លាំងដល់ឧស្សាហកម្ម និងនិរន្តភាពនៃក្រុមហ៊ុនសាជីវកម្មនានានៅក្នុងប្រទេសជប៉ុន។

ដោយៈ សរ សុជាតិ