តើកម្ពុជានៅមានសមត្ថភាពប៉ុនណាទៀត ដើម្បីដោះស្រាយបញ្ហាកូវីដ-១៩នេះ? ហើយកម្ពុជាអាចបន្ដទ្រទ្រង់ស្ថានការណ៍ដ៏លំបាកនេះ បានដល់ពេលណា?
ថ្លែងនៅក្នុងកិច្ចប្រជុំបណ្ដារដ្ឋមន្ត្រីហិរញ្ញវត្ថុ លើកទី ២៥ និងកិច្ចប្រជុំហិរញ្ញវត្ថុ និងទេសាភិបាលធនាគារកណ្ដាលអាស៊ានលើកទី ៧ នាពេលថ្មីៗនេះ ឯកឧត្តម វង្សី វិស្សុតរដ្ឋមន្ត្រីប្រតិភូអម នាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា រាជរដ្ឋាភិបាលកម្ពុជាមានការខិតខំប្រឹងប្រែងយ៉ាងខ្លាំងក្នុងការអនុវត្តវិធានការទប់ស្កាត់ការរាតត្បាតនៃជំងឺកូវីដ-១៩ និងគ្រប់គ្រងផលប៉ះពាល់មកលើវិស័យសំខាន់ៗនៃសេដ្ឋកិច្ចកម្ពុជា តាមរយៈការដាក់ចេញនូវវិធានការណ៍អន្តរាគមន៍ចំនួន៨ជុំ ដែលសរុបជាទឹកប្រាក់ ដែលរដ្ឋបានចំណាយមានជាង១ពាន់១រយលានដុល្លារនៅឆ្នាំ២០២០ ហើយឆ្នាំ២០២១នេះ នឹងបន្ថែមប្រមាណ ជាង៧០០លានដុល្លារទៀត សរុបទៅ នៅ២ឆ្នាំនេះ កម្ពុជាចំណាយជាង១ពាន់៨រយលានដុល្លារអាមេរិក។
ឯកឧត្តម វង្សី វិស្សុត បន្ថែមទៀតថា រាជរដ្ឋាភិបាលកម្ពុជា ក៏កំពុងរៀបចំដាក់ចេញនូវផែនការស្តារសេដ្ឋកិច្ចក្រោយវិបត្តិជំងឺកូវីដ-១៩ ឆ្នាំ២០២១-២០២៣ ដោយផ្តោតសំខាន់លើអភិក្រមចំនួន ៣ រួមមាន៖
១, ការងើបឡើងវិញ និងការរស់រាន (Revival and Survival)៖ ការកសាងមូលដ្ឋានគ្រឹះរឹងមាំដើម្បីស្តារឡើងវិញនូវកំណើនសេដ្ឋកិច្ច
២, ការកែទម្រង់ (Reform)៖ ប្រែក្លាយវិបត្តិទៅជាកាលានុវត្តភាព ដោយផ្តោតលើការធ្វើពិពិធកម្ម និងពង្រឹងការប្រកួតប្រជែងសេដ្ឋកិច្ច
៣, ការលើកកម្ពស់ភាពធន់ (Resilience)៖ ពង្រឹងការត្រៀមខ្លួនរបស់កម្ពុជា ទៅនឹងវិបត្តិដែលនឹងអាចកើតឡើងនាពេលអនាគត។
អត្ថបទទាក់ទង
ចំពោះសមត្ថភាពនៃការគ្រប់គ្រងជំងឺឆ្លងកូវីដ-១៩ ឯកឧត្តមវង្សី វិស្សុត បានអះអាងថា ដ្បិតតែកម្ពុជាជាប្រទេសក្រីក្រមែនពិត ប៉ុន្ដែកម្ពុជាមានសមត្ថភាពគ្រប់គ្រាន់ មានលុយគ្រប់គ្រាន់ដើម្បីបញ្ជាទិញវ៉ាក់សាំងសម្រាប់ចាក់ជូនប្រជាពលរដ្ឋរបស់ខ្លួន។ អ្វីដែលបារម្ភនោះ គឺខ្លាចតែមិនមានវ៉ាក់សាំងគ្រប់គ្រាន់ដើម្បីទិញយកមកចាក់ជូនពលរដ្ឋតែប៉ុណ្ណោះ។ ឯកឧត្តម បានគូសបញ្ជាក់ទៀតថា នៅដំណាច់ឆ្នាំ២០២១នេះ កម្ពុជានឹងមានវ៉ាក់សាំងមិនតិចជាង១០លានដូសនោះទេ ដែលត្រូវចាក់ជូនប្រជាពលរដ្ឋកម្ពុជា។
ទោះជាយ៉ាងណា រលកឆ្លងថ្មីនៃមេរោគកូវីដ-១៩ នៅកម្ពុជា កំពុងតែបង្កជាហានិភ័យធំមួយសម្រាប់សេដ្ឋកិច្ចកម្ពុជានៅឆ្នាំ២០២១ ដោយក្រុមអ្នកជំនាញសេដ្ឋកិច្ចមួយចំនួនបានអះអាងថា កំណើនសេដ្ឋកិច្ចកម្ពុជានៅឆ្នាំ២០២១ អាចនឹងប្រឈមនឹងការថមថយចុះជាងអ្វីដែលបានព្យាករថានឹងកើន ៤%។
ជុំវិញទៅនឹងបញ្ហានេះ ឯកឧត្តម វង្សី វិស្សុត បានគូសបញ្ជាក់ដែរថា ចំពោះបញ្ហារលកឆ្លងព្រឹត្តិការណ៍សហគមន៍២០កុម្ភៈនេះ ជាការពិត បើសិនជាវាអូសបន្លាយយូរជាងនេះទៀត វាអាចនឹងធ្វើឲ្យប៉ះពាល់ទៅដល់កំណើនសេដ្ឋកិច្ចរបស់កម្ពុជាកាន់តែខ្លាំង ដែលវាអាចនឹងធ្វើឲ្យកំណើនមានទាបជាងអ្វីដែលរាជរដ្ឋាភិបាលព្យាករទុក។
ឯកឧត្តម វង្សី វិស្សុត បានសង្កត់ធ្ងន់ថា បើសិនជាបញ្ហាកូវីដ-១៩ នៅបន្ដរាលដាលនៅឆ្នាំនេះ និងឆ្នាំក្រោយទៀត នោះកម្ពុជាអាចនឹងនៅមានសមត្ថភាពធនធានគ្រប់គ្រាន់ដើម្បីទប់ទល់ ប៉ុន្ដែបើនៅបន្ដអូសបន្លាយយូរជាងនេះទៀត នោះឯកឧត្តមមិនហ៊ានសន្និដ្ឋានទេ។
សូមបញ្ជាក់ថា បើតាមរបាយការណ៍ថ្មីចុងក្រោយមួយរបស់ធនាគារពិភពលោក បានព្យាករថា នៅឆ្នាំ២០២១នេះកម្ពុជានឹងមានកំណើនសេដ្ឋកិច្ច ៤%និងបន្ដកើនឡើង ៥,២% នៅឆ្នាំ២០២២ បន្ទាប់ពីបានធ្លាក់ចុះដល់ទៅជាង-៣% កាលពីឆ្នាំ២០២០៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
