សំណួរសួរថា ចុះបើ ជំងឺកូវីដ១៩នៅតែបន្តរីករាតត្បាតអូសបន្លាយយូរយ៉ាងដូច្នេះ តើស្ថានភាពសុខភាពសេដ្ឋកិច្ចនៅក្នុងតំបន់អាស៊ីនឹងមានការវិវត្តន៍យ៉ាងដូចម្ត៉េចខ្លះនៅឆ្នាំ២០២១?
ជាការពិតណាស់សេដ្ឋកិច្ចបណ្តាប្រទេសកំពុងអភិវឌ្ឍន៍ និងមានឧស្សាហកម្មថ្មីៗនៅក្នុងតំបន់អាស៊ី ត្រូវបានធនាគាអភិវឌ្ឍន៍អាស៊ីព្យាករថ្មីៗនេះថា នឹងកើនឡើងដល់ ៧,៣% នៅឆ្នាំ២០២១នេះ បើទោះបីជាមានការរីករាលដាលនៃវិបត្តិមេរោគកូវីដ-១៩ បាននឹងកំពុងបន្ដកើតមានក៏ដោយចុះ។
របាយការណ៍ចក្ខុវិស័យអភិវឌ្ឍន៍អាស៊ីឆ្នាំ២០២១ របស់ធនាគារអភិវឌ្ឍអាស៊ី (ADB)ដែលបានចេញផ្សាយថ្ងៃពុធសប្ដាហ៍នេះ បានឲ្យដឹងថា ប្រទេសកំពុងអភិវឌ្ឍនៅអាស៊ី ដែលរួមមានប្រទេសចំនួន៤៥ នឹងត្រូវបានគាំទ្រដោយការងើបឡើងវិញជាសកលនៃវិស័យសុខាភិបាល និងដំណើរការនៃការចាក់វ៉ាក់សាំងប្រឆាំងកូវីដ-១៩។ របាយការណ៍ដដែលនេះ បានឲ្យដឹងទៀតថា តាមការសន្មត ការផ្ទុះឡើងជាថ្មីនៃមេរោគកូវីដ-១៩ នឹងត្រូវគ្រប់គ្រងបាន ហើយតម្រូវការប្រើប្រាស់ក្នុងស្រុក និងសកម្មភាពសេដ្ឋកិច្ចនឹងបន្ដពង្រឹងឡើងវិញនៅក្នុងឆ្នាំនេះ និងឆ្នាំក្រោយ។ ជាមួយគ្នានោះ ការនាំចេញគ្រឿងអេឡិចត្រូនិក និងផលិតផលទាក់ទងនឹងសម្ភារប្រើប្រាស់ការពារនឹងមេរោគកូវីដ១៩ ក៏បានជួយជំរុញដល់ការងើបឡើងវិញនៃសេដ្ឋកិច្ចក្នុងតំបន់ផងដែរ។
អត្ថបទទាក់ទង!
របាយការណ៍របស់ធនាគារអភិវឌ្ឍន៍អាស៊ី ក៏បានលើកឡើងពីការធ្លាក់ចុះនៃភាពគ្មានការធ្វើ ដែលមានកម្រិតខុសៗគ្នាតាមបណ្ដាប្រទេសនីមួយៗ ក៏ដូចជាសញ្ញានៃការធ្លាក់ចុះអត្រាអតិផរណាផងដែរ។
តាមការព្យាករពីធនាគារអភិវឌ្ឍន៍អាស៊ីដដែលនេះ បានឲ្យដឹង ចំពោះកំណើននៃប្រទេសនៅតំបន់អាស៊ានវិញ នៅឆ្នាំ២០២១នេះ ឃើញថាប្រទេសវៀតណាម គឺឈរលំដាប់កំណើនខ្ពស់នាំមុខគេដោយមានកំណើន ៦,៧% បន្ទាប់មកគឺម៉ាឡេស៊ី និងសិង្ហបុរី មានណើនប្រហែលគ្នាគឺ៦%។
ការស្ទុះងើបឡើងវិញពីការធ្លាក់ចុះដែលបណ្តាលមកពីជំងឺរាតត្បាតនៅឆ្នាំនេះ ត្រូវបានគេរំពឹងថា នឹងត្រូវជំរុញដោយការស្ទុះងើបឡើងវិញនៃសេដ្ឋកិច្ចក្នុងប្រទេសចិន និងឥណ្ឌា ដែលជាប្រទេសមហាយក្សសេដ្ឋកិច្ចរបស់ពិភពលោក។ ក្នុងនោះ ប្រទេសចិនត្រូវបានព្យាករថា នឹងមានកំណើនជាង ៨%នៅឆ្នាំនេះ ខណៈឥណ្ឌារំពឹងកំណើន ១១%។ ទោះយ៉ាងណា ចំពោះប្រទេសឥណ្ឌា កំពុងស្ថិតក្នុងស្ថានភាពមិនច្បាស់លាស់នៅឡើយទេ ចំពោះការឈានទៅសម្រេចបានកំណើន២ខ្ទង់នៅឆ្នាំនេះ ដ្បិតថា ឥណ្ឌាកំពុងទទួលរងនូវការវាយប្រហារយ៉ាងខ្លាំងពីរលកឆ្លងកូវីដ-១៩ ដែលថ្មីៗនេះ មានអ្នកឆ្លងក្នុងមួយថ្ងៃជាង៣២ម៉ឺនាក់ និងអ្នកស្លាប់វិញមានរាប់ពាន់ផងដែរ។ សរុបមកទល់ថ្ងៃទី ២៨ ខែមេសា ចំនួនអ្នកឆ្លងសរុបនៅឥណ្ឌាកើនដល់ទៅប្រមាណ ១៧លាននាក់ហើយ ខណៈអ្នកស្លាប់វិញមានជាង២០ម៉ឺននាក់ឯណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
