បើតាមការបញ្ជាក់អះអាងនៅក្នុងសេចក្ដីប្រកាសព័ត៌មានរបស់ធនាគារ JTrust បានឲ្យដឹងថា ភាគហ៊ុន ៥៥% ដែលខ្លួនបានទិញពីធនាគារ ANZ Royal នោះ មានចំនួនហ៊ុនសរុបជាង ៤១២.៥០០ ហ៊ុន ដែលមានតម្លៃជាទឹកប្រាក់សរុបជាង ៨២,៤ លានដុល្លារអាមេរិក។
ធនាគារ JTrust ក៏បានប្រកាសដែរថា បន្ទាប់ពីទទួលបានភាគហ៊ុន ៥៥%របស់ ANZ Royal ឈ្មោះធនាគារ ANZ Royal ក៏នឹងត្រូវធ្វើការផ្លាស់ប្ដូរថ្មីផងដែរ។ ទោះយ៉ាងណា អាជីវកម្មបច្ចុប្បន្នរបស់ ANZ Royal នៅតែបន្តមានការអភិវឌ្ឍដដែល តាមរយៈការពង្រីកលើពាណិជ្ជកម្មហិរញ្ញវត្ថុលក់រាយ និងគោលដៅពង្រីកទីផ្សារ និងក្នុងការបង្កើនចីរភាពជាដើម។ មិនតែប៉ុណ្ណោះ ក្រោមការកាច់ចង្កូតរបស់ JTrust ក៏នឹងយក ធនាគារ ANZ Royal ធ្វើជា Platform មួយ សម្រាប់ការពង្រីកខ្លួនចូលទៅក្នុងទីផ្សារតំបន់ទន្លេមេគង្គ ដូចជាប្រទេស មីយ៉ាន់ម៉ា និងឡាវជាដើម។
នៅក្នុងសេចក្ដីប្រកាសព័ត៌ដដែល ធនាគារ JTurst បានលើកឡើងពីការយល់ឃើញរបស់ខ្លួនមកលើទីផ្សារកម្ពុជាថា កម្ពុជាគឺជាប្រទេសមួយក្នុងចំណោមប្រទេស ដែលមានកំណើនសេដ្ឋកិច្ចលូតលាស់លឿនជាងគេនៅក្នុងតំបន់អាស៊ី។ ក្នុងនោះ វិស័យហិរញ្ញវត្ថុក៏មានកំណើនខ្ពស់ផងដែរ ជាក់ស្ដែង ទឹកប្រាក់កម្ចីក្នុងវិស័យធនាគារ និងហិរញ្ញវត្ថុ មានកំណើនប្រមាណជាមធ្យម ២៦% ក្នុងរយៈពេល៥ឆ្នាំកន្លងមកនេះ។
ដោយឡែក បើតាមសេចក្ដីប្រកាសព័ត៌មានរបស់ធនាគារ ANZ បានឲ្យដឹងដែរថា ធនាគារនេះ នឹងនៅអាចបន្តកាន់កាប់ភាគហ៊ុន ៥៥% និងគ្រប់គ្រងអាជីវកម្មរបស់ខ្លួន រហូតដល់ត្រឹមរយៈពេល ១២ខែ ក្រោយពីការប្រកាសនេះ ពោលគឺនឹងដកខ្លួនចេញពីប្រតិបត្តិការនៅខែ ឧសភា ឆ្នាំ២០១៩ ខាងមុខ ហើយ ANZ នឹងធ្វើការយ៉ាងជិតស្និទជាមួយនឹងធនាគារ JTrust ដើម្បីធានាឲ្យមានភាពផ្លាស់ប្តូរនៃភាពជាម្ចាស់កម្មសិទ្ធិដោយរលូន។ ជាមួយគ្នានេះ សម្រាប់ដំណើរការនៃចំណាយនានា ជុំវិញការទិញលក់ និងផ្ទេរសិទ្ធិកាន់កាប់ភាគហ៊ុននេះ អាចនឹងចំណាយទឹកប្រាក់អស់ប្រមាណជាង ២២,៥៩ លានដុល្លារអាមេរិក។
អត្ថបទគួរឲ្យចាប់អារម្មណ៍!
គិតត្រឹមចុងឆ្នាំ២០១៧នៃឆ្នាំសារពើពន្ធ ធនាគារ ANZ Royal មានទ្រព្យសកម្មសរុបប្រមាណជាង ១ពាន់លានដុល្លារអាមេរិក ខណៈដែលប្រាក់ចំណូលសុទ្ធមានជាង ២០លានដុល្លារអាមេរិក និងមានដើមទុនសរុបប្រមាណ ៧៥លានដុល្លារអាមេរិក។
សូមជម្រាបថា ធនាគារ ANZ Royal ត្រូវបានវិនិយោគរួមគ្នាដោយធនាគារ ANZ Group ដែលមានមូលដ្ឋាននៅប្រទេសអូស្ត្រាលី ជាមួយនឹងក្រុមហ៊ុន Royal Group របស់អ្នកឧកញ៉ា គិត ម៉េង ដែលក្នុងនោះ ភាគហ៊ុនរបស់ធនាគារ ANZ Group មាន៥៥% និង ក្រុមហ៊ុន Royal Group មាន៤៥%។ ហើយការលក់ភាគហ៊ុននេះ គឺលក់តែភាគហ៊ុនរបស់ ANZ Group ៥៥% ប៉ុណ្ណោះ ខណៈដែលក្រុមហ៊ុន Royal Group នៅតែមានភាគហ៊ុនរបស់ខ្លួន ៤៥% នៅក្នុងធនាគារ ANZ Royal ដដែល។ គិតមកទល់ពេលនេះ ធនាគារ ANZ Royal មានវត្តមាននៅកម្ពុជាអស់រយៈពេល១៣ឆ្នាំមកហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
