លោក Patrick Healy ដែលជាក្រុមប្រឹក្សាភិបាលរបស់ក្រុមហ៊ុនមេ Swire Pacific និង ជាប្រធានផ្នែកអាជីវកម្ម Coca Cola បាននិយាយថា ការទិញយកភាគហ៊ុនក្រុមហ៊ុនវេចខ្ចប់ និងចែកចាយដបកូកាកូឡានៅក្នុងប្រទេសវៀតណាម និង ប្រទេសកម្ពុជា គឺជាព្រឹត្តិការណ៍ដ៏សំខាន់មួយសម្រាប់ក្រុមហ៊ុន Swire Coca Cola របស់ខ្លួន ខណៈការពង្រីកសក្តានុពលនូវដំណើរការប្រតិបត្តិការរបស់ក្រុមហ៊ុននេះ គឺដើម្បីបម្រើដល់តម្រូវការប្រជាជនជាច្រើនក្នុងតំបន់ថ្មីមួយទៀត។ លោកបានបន្ថែមថា ការពង្រីកទីតាំងនេះ គឺជាផ្នែកមួយនៃយុទ្ធសាស្រ្តដ៏ទូលំទូលាយ ដើម្បីពង្រីកទំហំ បរិមាណ និង ប្រាក់ចំណូលជាសកលនៃអាជីវកម្មរបស់ខ្លួន។
យោងតាមឯកសារនៅទីផ្សារភាគហ៊ុនហុងកុង ប្រាក់ចំណេញក្រោយបង់ពន្ធរួច នៃប្រតិបត្តិការក្រុមហ៊ុនកូកាកូឡានៅក្នុងប្រទេសវៀតណាមមានចំនួន ៣២ លានដុល្លារ ធ្លាក់ចុះ១២% ខណៈនៅប្រទេសកម្ពុជាប្រាក់ចំណេញមានជិត៤លានដុល្លារធ្លាក់ចុះ ៦៥%។
ក្រុមហ៊ុន Swire គឺជាក្រុមហុនវេចខ្ចប់ និងចែកចាយដបសម្រាប់ កូកា កូឡា ធំជាងគេទីប្រាំនៅលើពិភពលោក។ ក្រុមហ៊ុននេះ បានក្លាយជាក្រុមហ៊ុនសម្រាប់យីហោភេសជ្ជៈកូកា កូឡា អាមេរិកដ៏ល្បីល្បាញចាប់តាំងពីឆ្នាំ ១៩៦៥មកម្ល៉េះ គឺនៅពេលដែលក្រុមហ៊ុននេះ បានទិញយកភាគហ៊ុនភាគច្រើននៅក្នុងប្រតិបត្តិការនៅទីក្រុងហុងកុង។
អត្ថបទគួរអាន
តាមរយៈការទិញយកប្រតិបត្តិការនៅក្នុងប្រទេសវៀតណាម និងកម្ពុជា ក្រុមហ៊ុន Swire នឹងទទួលបានចំនួនអ្នកចែកចាយបន្ត កើនឡើង ១៥% បន្ថែមទៀត ដោយវានឹងបំពេញតម្រូវការដល់មនុស្សប្រហែលជាង ៨៧៦ លាននាក់នៅទូទាំងពិភពលោក។
មែនទែនទៅ អាជីវកម្ម កូកាកូឡា គឺជាអាជីវកម្មដ៏មានសក្តានុពលមួយនៅក្នុងផលប័ត្រអាជីវកម្មរបស់ Swire ខណៈក្រុមហ៊ុនអាកាសចរណ៍ Cathay Pacific ដែលជាបទសម្ព័នរបស់ខ្លួនបាននឹងកំពុងធ្លាក់ចុះដល់កម្រិតទាបបំផុតក្នុងរយៈពេល ២ ឆ្នាំចុងក្រោយនេះ ដោយសារតែជំងឺរាតត្បាតកូវីត ១៩ រួមទាំង អង្គភាពផ្គត់ផ្គង់ប្រេងនៅឯនាយសមុទ្ររបស់ក្រុមហ៊ុននេះត្រូវបានលក់ចេញកាលពីខែមីនាផងដែរ។
គួរជម្រាបថា លោក Guy Bradley ប្រធានក្រុមហ៊ុន Swire បានប្រាប់អ្នកយកព័ត៌មាននៅឯសន្និសីទសង្ខេបប្រាក់ចំណូលប្រចាំឆ្នាំក្នុងខែមីនាថា ខ្លួនកំពុងវិនិយោគទឹកប្រាក់ជាង ១៣៤ លានដុល្លារ នៅក្នុងរោងចក្រថ្មីមួយនៅក្នុងខេត្ត Henan ភាគកណ្តាលប្រទេសចិន ហើយក្រុមហ៊ុននឹងបន្តវិនិយោគនៅក្នុង ក្រុមហ៊ុន Swire Coca Cola ដើម្បីបង្កើតអាជីវកម្មដ៏រឹងមាំ និងនិរន្តរភាពផងដែរ៕
