ការជំរុញការនាំចេញគ្រាប់ពោតទៅកាន់ទីផ្សារចិននេះដែរ គឺធ្វើឡើង នៅគ្រាដែលទីផ្សារប្រទេសថៃ ដែលជាទីផ្សារធំសម្រាប់ការនាំចេញគ្រាប់ពោតរបស់កម្ពុជានោះ នាពេលនេះ កំពុងតែដាក់លក្ខខណ្ឌតម្រូវថ្មី លើការនាំចូលពោតពីកម្ពុជា ដែលកត្តានេះ ត្រូវបានក្រសួងកសិកម្មអះអាងថា នឹងធ្វើឱ្យតម្លៃគ្រាប់ពោតកើនឡើងមួយកម្រិតទៀត ហើយវាក៏អាចប៉ះពាល់ដល់ការនាំចេញពោតរបស់កម្ពុជាទៅកាន់ប្រទេសថៃផងដែរ។ នេះបើតាមសេចក្តីប្រកាសព័ត៌មានរបស់ក្រសួងកសិកម្ម នាថ្ងៃទី ២១ ខែកក្កដា ឆ្នាំ២០២២។
ការនាំចេញគ្រាប់ពោតទៅកាន់ប្រទេសថៃ ត្រូវបានភាគីថៃដាក់លក្ខខណ្ឌតម្រូវថ្មី ដោយតម្រូវឱ្យស្នើសុំលិខិតអនុញ្ញាតនាំចូលជាមុន និងគ្រាប់ពោតត្រូវធ្វើធូបនកម្ម (Fumigation) នៅមុនពេលនាំចេញដោយប្រើថ្នាំ មែសុល ប្រូម៉ាយ (Methyl bromide) ដែលថ្នាំប្រភេទនេះមានតម្លៃថ្លៃ និងស្ថិតក្នុងបញ្ជីថ្នាំកសិកម្ម ដែលអាចអនុញ្ញាតឱ្យប្រើប្រាស់ដោយមានលក្ខខណ្ឌជាក់លាក់ណាមួយតែប៉ុណ្ណោះ ដោយក្រោមការត្រួតពិនិត្យផ្ទាល់ពីសមត្ថកិច្ចរបស់ក្រសួងកសិកម្ម រុក្ខាប្រមាញ់ និងនេសាទ ពីព្រោះវាជាប្រភេទថ្នាំធ្វើឱ្យប៉ះពាល់ដល់ស្រទាប់អូហ្សូនផងដែរ។នេះបើតាមការគូសបញ្ជាក់របស់ក្រសួងកសិកម្មកម្ពុជា។
បើតាមក្រសួងកសិកម្ម បច្ចុប្បន្ននៅប្រទេសកម្ពុជា ក៏មានក្រុមហ៊ុនដែលបានចុះបញ្ជីនៅក្រសួងមានលទ្ធភាពផ្តល់សេវាធូបនកម្ម (Fumigation) លើថ្នាំប្រភេទនេះផងដែរ ប៉ុន្តែដោយសារថ្នាំនេះមានតម្លៃថ្លៃ នោះ វានឹងធ្វើឱ្យតម្លៃគ្រាប់ពោតនាំចេញនឹងត្រូវកើនឡើងមួយកម្រិតទៀត ហើយវាអាចនឹងធ្វើឲ្យប៉ះពាល់ដល់ការនាំចេញគ្រាប់ពោតទៅកាន់ទីផ្សារប្រទេសថៃ។ ក្នុងបរិការណ៍នេះ ក្រសួងកសិកម្ម រុក្ខាប្រមាញ់ និងនេសាទ ក៏បានធ្វើការចរចាជាមួយភាគីថៃជាច្រើនលើកច្រើនសាដោយស្នើសុំភាគីថៃដកលក្ខខណ្ឌប្រើប្រាស់ថ្នាំ មែសុល ប្រូម៉ាយ ចេញនិងជំនួសវិញដោយថ្នាំ ផូសភីន (Phosphine)វិញ។ ប៉ុន្តែភាគីថៃមិនយល់ព្រមតាមការស្នើសុំរបស់ភាគីកម្ពុជាឡើយ ដោយបញ្ជាក់ថា លក្ខខណ្ឌនេះត្រូវបានដាក់ចំពោះគ្រប់ប្រទេសនាំចូលគ្រាប់ពោតទៅកាន់ប្រទេសថៃ ពោលគឺមិនចំពោះតែប្រទេសកម្ពុជាទេ។ ទោះជាយ៉ាងនេះក្តី កម្ពុជាក៏នៅតែបន្ដមានការនាំចេញគ្រាប់ពោតជាផ្លូវការទៅកាន់ប្រទេសថៃជាហូរហែរដែរ ក្រោមការគោរពតាមលក្ខខណ្ឌតម្រូវថ្មីនេះ បានចំនួន ៣៧.៥០០តោន បើគិតត្រឹមថ្ងៃទី២១ ខែកក្កដា ឆ្នាំ២០២២។
ដោយឡែក ចំពោះដំណាំពោតដែលបានធ្វើការដាំដុះសម្រាប់នាំចេញធ្វើជាចំណីសត្វ គឺមិនតម្រូវឱ្យមានការចុះបញ្ជីជាចម្ការអនុវត្តកសិកម្មល្អ (GAP) ឡើយ។
អត្ថបទគួរអាន
ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ ក៏បានចុះបញ្ជីឈ្មោះក្រុមហ៊ុននាំចេញគ្រាប់ពោតទៅកាន់ប្រទេសចិន និងបានធ្វើការត្រួតពិនិត្យស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញគ្រាប់ពោតកម្ពុជាទៅកាន់ប្រទេសចិនតាមរយៈអគ្គរដ្ឋបាលគយនៃសាធារណរដ្ឋប្រជាមានិតចិនរួចរាល់ផងដែរ ដោយនៅរង់ចាំតែការអនុម័តពីអគ្គរដ្ឋបាលគយនៃសាធារណរដ្ឋប្រជាមានិតចិនសម្រាប់ការនាំចេញតែប៉ុណ្ណោះ។
គួរបញ្ជាក់ដែរថា ពោតក្រហម គឺជាដំណាំឧស្សាហកម្មមួយប្រភេទ ដែលមានសក្តានុពលទីផ្សារខ្ពស់សម្រាប់យកទៅកែច្នៃធ្វើជាចំណីសត្វសម្រាប់ផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។ ផ្អែកតាមការស្រង់ស្ថិតិដោយក្រុមការងាររបស់ក្រសួងពាណិជ្ជកម្ម កាលពីថ្ងៃទី១៩ ខែកក្កដា ឆ្នាំ២០២២ បច្ចុប្បន្នផ្ទៃដីដាំដុះពោតក្រហមមានចំនួនប្រមាណជាង ១៤ម៉ឺន ហិកតា និងមានទីផ្សារនាំចេញទៅក្រៅប្រទេស ដូចជាប្រទេស ថៃ វៀតណាម កូរ៉េ និងបង់ក្លាដេស ដោយនាំចេញទៅតាមច្រករបៀងទៅប្រទេសជិតខាង។ ដោយឡែក តាមរយៈពិធីចុះអនុស្សរណៈយោគយល់គ្នារវាង ក្រុមហ៊ុនស៊ី ភី ខេមបូឌា ចំកាត់ និងតំណាងសៃឡូនៅប៉ៃលិនកាលពីពេលថ្មីៗនេះ ពោតក្រហមជាច្រើនរយពាន់ហិតតាត្រូវបានប្រជាកសិករត្រៀមដាំដុះដោយហេតុថា ក្រុមហ៊ុននឹងដាក់ការបញ្ជារទិញពោតក្រហម ក្នុងតម្លៃប្រមាណ ៦៣៦ រៀលក្នុងមួយគីឡូក្រាម សម្រាប់ពោតស្នូលសំណើម៣០% និងតម្លៃ ៦៤៧ រៀលក្នុងមួយគីឡូក្រាម សម្រាប់ពោតស្នូលសំណើម ២៩%។ នេះបើតាមបាយការណ៍បង្ហាញរបស់ក្រសួងពាណិជ្ជកម្ម៕
