កម្ពុជាកំពុងចរចាកិច្ចព្រមព្រៀងចៀសវាងការយកពន្ធត្រួតគ្នាជាមួយប្រទេស៥បន្ថែម

បណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានគូសបញ្ជាក់ថា ការចុះកិច្ចព្រមព្រៀងចៀសវាងការយកពន្ធត្រួតគ្នា រវាងកម្ពុជា និងបណ្ដាប្រទេសដទៃ ពិតជាចាំបាច់ណាស់ក្នុងទំនាក់ទំនងពាណិជ្ជកម្មទ្វេភាគី និងបង្កើនឱកាសវិនិយោគនៅក្នុងស្រុក។ បើតាមបណ្ឌិត ហុង វណ្ណៈ កិច្ចព្រមព្រៀង នឹងជួយឱ្យទំនិញមានថ្លៃដើមទាប ហើយកាលណាទំនិញមានថ្លៃដើមទាប ការចរាចរណ៍ទំនិញនៅលើទីផ្សារក៏មានតម្លៃសមរម្យដែរ។ អ្នកជំនាញសេដ្ឋកិច្ចរូបនេះបន្ថែមថា សម្រាប់កម្ពុជា ដែលជាប្រទេសកំពុងមានតម្រូវការផ្នែកវិនិយោគ ដូច្នេះ ចាំបាច់ណាស់ ក្នុងការចុះកិច្ចព្រមព្រៀងចៀសវាងការយកពន្ធត្រួតគ្នា ជាមួយបណ្ដាប្រទេសដទៃ ព្រោះវាក៏ជាផ្នែកមួយជួយជំរុញឱ្យវិនិយោគិនមកវិនិយោគនៅកម្ពុជា។ 

បើតាមរបាយការណ៍អគ្គនាយកដ្ឋានពន្ធដារ កម្ពុជា ចាប់ពីឆ្នាំ២០១៤ រហូតដល់ឆ្នាំ២០២១ កម្ពុជា បានចុះកិច្ចព្រមព្រៀងចៀសវាងការយកពន្ធត្រួតគ្នា(DTA) ជាបន្តបន្ទាប់ជាមួយនឹងប្រទេស និងដែនដីចំនួន ១០ រួមមាន សិង្ហបុរី ថៃ ចិន  ប៊្រុយណេ វៀតណាម ហុងកុង ម៉ាកាវ ឥណ្ឌូនេស៊ី ម៉ាឡេស៊ី និងប្រទេសកូរ៉េខាងត្បូង។

បច្ចុប្បន្ន កម្ពុជាក៏បាននិងកំពុងចរចាកិច្ចព្រមព្រៀងជៀសវាងការយកពន្ធត្រួតគ្នា ជាមួយប្រទេសជាច្រើនផ្សេងទៀតដែរ រួមមាន ប្រទេសហ្វីលីពីន ប្រទេសឡាវ ប្រទេសជប៉ុន ប្រទេសទួរគី និងប្រទេសអេមីរ៉ាតអារ៉ាប់រួមជាដើម។ នេះបើតាមរបាយការណ៍ពីអគ្គនាយកដ្ឋានពន្ធដារ៕