ផ្សារទំនើបនេះ ជាផ្នែកមួយនៃអគារ The Peak ដែលជាការអភិវឌ្ឍរួមគ្នារវាងក្រុមហ៊ុនអភិវឌ្ឍន៍គម្រោងអចលនទ្រព្យ Oxley ដែលមានមូលដ្ឋាននៅប្រទេសសិង្ហបុរី និងដៃគូកម្ពុជា ក្រុមហ៊ុន WorldBridge Land របស់ឧកញ៉ា សៀ ឫទ្ធី ដែលល្បីល្បាញខាងមុខជំនួញ logistics អចលនទ្រព្យ និងជំនួញធំៗជាច្រើនទៀត នៅកម្ពុជា។
អគារ The Peak ដែលសព្វថ្ងៃកំពុងសាងសង់យ៉ាងមមាញឹក មានទីតាំងស្ថិតនៅក្នុងខណ្ឌចម្ការមន នៅចំកណ្ដាលរាជធានីភ្នំពេញ។ អគារកម្ពស់ ៥៥ជាន់នេះ ជាបណ្ដុំនៃការិយាល័យធ្វើការ លំនៅដ្ឋានបែបប្រណីតជាលក្ខណៈអាផាតមិន ចំនួនជាង ១ពាន់យូនីត ផ្សារទំនើប និងសណ្ឋាគារប្រណីត Shangri-La។ គម្រោងអគារស្កឹមស្កៃនេះ គ្រោងនឹងបញ្ចប់ការសាងសង់និងបើកឲ្យដំណើរការនៅឆ្នាំ២០២០។
ក្រុមហ៊ុនសិង្ហបុរី CapitaLand នៅក្រោមកិច្ចព្រមព្រៀងជាមួយក្រុមហ៊ុនកម្ពុជា WorldBridge Land របស់លោកឧកញ៉ា សៀ ឫទ្ធី នឹងទទួលខុសត្រូវគ្រប់គ្រងទៅលើការធ្វើផែនការទ្រព្យ ការរៀបចំនៅមុនពេលបើក និងប្រតិបត្តិការលក់រាយរបស់ផ្សារទំនើបដែលមាន ៥ជាន់ នៅលើអគារ The Peak សរុបផ្ទៃក្រឡាជិត ១សែន ៣ម៉ឺនម៉ែត្រការ៉េ។
រូបភាពគំរូនៃអគារ ៥៥ជាន់ The Peak។
តើអ្នកបានអានអត្ថបទនេះ ឬនៅ?
នាយកប្រតិបត្តិផ្នែកផ្សារនិងអាជីវកម្មលក់រាយរបស់ CapitaLand លោក Wilson Tan មានប្រសាសន៍នៅក្នុងប្រកាសព័ត៌មាន ថា «ជាមួយនឹងទីតាំងយុទ្ធសាស្ត្រស្ថិតនៅកណ្ដាលរាជធានីភ្នំពេញ ព្រមទាំងភាពទំនើបនិងគុណភាពខ្ពស់នៃអគារ The Peak នេះ ផ្សារទំនើបរបស់យើងប្រាកដជាបំពេញបានទៅតាមតម្រូវការរបស់អ្នកទីក្រុងភ្នំពេញ ដែលចង់បាននូវទំនិញដែលមានគុណភាពខ្ពស់ និងផាសុកភាពនៃការដើរផ្សារទិញទំនិញ»។
ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន Oxley Holdings ដែលចាប់ដៃគូជាមួយក្រុមហ៊ុនកម្ពុជា WorldBridge Land អភិវឌ្ឍអគារខ្ពស់ស្កឹមស្កៃ The Peak លោក Ching Chiat Kwong មានថ្លែងថា «ដោយមាន CapitaLand ជាអ្នកគ្រប់គ្រងផ្សារទំនើបរបស់យើង យើងមានភាពជឿជាក់ខ្លាំងក្នុងការបង្កើនប្រាក់ចំណេញសម្រាប់គម្រោង The Peak ដោយផ្ដោតសំខាន់ទៅលើកិច្ចការស្នូលរបស់យើងក្នុងការអភិវឌ្ឍ និងផ្សព្វផ្សាយទីផ្សារសម្រាប់គម្រោងនេះ។ ដោយសារក្រុមហ៊ុន Oxley មានវត្តមាននិងជំនួញធំៗនៅបណ្ដាប្រទេសនានានៅលើពិភពលោក ដូចជា សិង្ហបុរី ចក្រភពអង់គ្លេស អៀរឡង់ ចិន ឥណ្ឌូនេស៊ី និងសហភាពមីយ៉ាន់ម៉ា យើងសម្លឹងឃើញលទ្ធភាពនៃការធ្វើកិច្ចសហប្រតិបត្តិកាន់តែស៊ីជម្រៅថែមទៀតជាមួយក្រុមហ៊ុន CapitaLand នាពេលអនាគត»។
គួររំឭកថា ទាំងក្រុមហ៊ុន CapitaLand និងក្រុមហ៊ុន Oxley សុទ្ធតែជាក្រុមហ៊ុនធំ ដែលមានវត្តមាននៅលើទីផ្សារហ៊ុននៅសិង្ហបុរី ហើយក្រុមហ៊ុន Oxley បានចាប់ដៃគូជាមួយក្រុមហ៊ុនកម្ពុជា WorldBridge Land អភិវឌ្ឍគម្រោងអគារ ៥៥ជាន់ The Peak៕
