CDC បានអនុម័តគម្រោងវិនិយោគថ្មីៗចំនួ៤៧គម្រោង ជាមួយទុនវិនិយោគ ២,៥ពាន់លានដុល្លារនៅត្រីមាសទី១ឆ្នាំនេះ

អ្នកជំនាញសេដ្ឋកិច្ចមើលឃើញថា នៅឆ្នាំ២០២២នេះ ស្ថានភាពនៃលំហូវិនិយោគនៅកម្ពុជាហាក់កំពុងមានសកម្មភាពល្អប្រសើរឡើងវិញជាបណ្ដើរៗហើយ ស្របពេលដែលសេដ្ឋកិច្ចកម្ពុជា បើកចំហរពេញលេញឡើងវិញ ហើយកម្ពុជាក៏មានភាពទាក់ទាញតាមរយៈច្បាប់វិនិយោគ និងកិច្ចព្រមព្រៀងពាណិជ្ជកម្មសេរីទ្វេភាគី និងកិច្ចព្រមព្រៀងពាណិជ្ជកម្មថ្នាក់តំបន់ RCEPជាដើម។

បើតាមរបាយការណ៍ ដែលផ្ដល់ដោយក្រុមប្រឹក្សាអភិវឌ្ឍន៍កម្ពុជាបានបង្ហាញថា ដំណើរការនៃការចុះបញ្ជីគម្រោងវិនិយោគថ្មីៗនៅកម្ពុជា ហាក់មិនសូវមានភាពខុសគ្នាខ្លាំងប៉ុន្មាននោះទេ ពោលគឺនៅ៣ខែដំបូងឆ្នាំនេះ CDC បានអនុម័តគម្រោងថ្មីៗ និងគម្រោងពង្រីកផលិតកម្មសរុបចំនួន ៤៧គម្រោងមានទំហំទឹកប្រាក់សរុបជាង២ពាន់៥រយលានដុល្លារ ធៀបនឹងរយៈពេលដូចគ្នាកាលពីឆ្នាំមុន ឃើញថា ចំនួនគម្រោងវិនិយោគមានការថយចុះ ២គម្រោង និងចំនួនទុនវិនិយោគមានការថយចុះជាង២០លានដុល្លារ។ 

ទោះជាបែបនេះក្ដី ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានកត់សម្គាល់ឃើញថា សេដ្ឋកិច្ចកម្ពុជា កាន់តែបង្ហាញនូវសញ្ញាណវិជ្ជមាន ដោយផ្អែកលើគម្រោងវិនិយោគកម្ពុជា នៅត្រីមាសទី១ ឆ្នាំ២០២២នេះ ហាក់មានសញ្ញាល្អ ទាំងនៅក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ ក៏ដូចជា នៅក្រុមប្រឹក្សាអភិវឌ្ឍន៍កម្ពុជាជាដើម។

ឧកញ៉ា លឹម ហេង នៅតែបង្ហាញនូវក្ដីរំពឹងយ៉ាងមុតមាំចំពោះវិស័យសេដ្ឋកិច្ចកម្ពុជា នៅឆ្នាំនេះ និងឆ្នាំបន្តបន្ទាប់ ថានឹងនៅតែបន្តមានកំណើន ដោយសារការចូលរួមនូវកិច្ចព្រមព្រៀងពាណិជ្ជកម្មសេរីកម្ពុជា-ចិន,កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង និងកិច្ចសហប្រតិបត្តិការនានា ពិសេសគម្រោងវិនិយោគថ្មីៗនានា ដែលធ្វើឲ្យកម្ពុជាមិនចាំបាច់ពឹងផ្អែកតែលើវិស័យកាត់ដេរតែមួយមុខទៀតនោះទេ។

សូមបញ្ជាក់ថា នៅពេញមួយឆ្នាំ២០២១កន្លងទៅនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបជាង១៦០គម្រោង ដោយគិតជាទឹកប្រាក់ប្រមាណ៤ពាន់លានដុល្លារអាមេរិក។ អ្នកជំនាញនៅតែមានក្ដីរំពឹងខ្ពស់ថា នៅឆ្នាំ២០២២ ការវិនិយោគនឹងបន្ដកើនខ្ពស់ឡើងវិញ ស្របពេលដែលកំណើនសេដ្ឋកិច្ចរបស់កម្ពុជានេះ ក៏ត្រូវបានធនាគារពិភពលោកព្យាករថា នឹងកើនឡើង៤,៥% ៕