នៅក្នុងបទសម្ភាសន៍ជាមួយសារព័ត៌មាន CBS រយៈពេល៦០នាទី ដែលត្រូវបានចាក់ផ្សាយកាលពីថ្ងៃអាទិត្យ ទី ១៨ កញ្ញា លោកចូ បៃដិន ដែលជាប្រធានាធិបតីអាមេរិកបានថ្លែងថា «កងទ័ពអាមេរិកនឹងត្រៀមធ្វើការការពារដែនកោះប្រជាធិបតេយ្យតៃវ៉ាន់ បើចិនបើកការឈ្លានពាននៅទីបំផុតមែននោះ»។
លោកបានបន្ថែមថា «វានឹងមិនដូចអ៊ុយក្រែននោះទេ ហើយកងកម្លាំងសហរដ្ឋអាមេរិកទាំងប្រុស ទាំងស្រីនឹងការពារតៃវ៉ាន់មិនឲ្យចិនចូលឈ្លានពាន ដូចដែលរុស្សីចូលវាយលុកអ៊ុយក្រែននោះឡើយ»។
យ៉ាងណាមិញ កិច្ចសម្ភាសន៍នេះហាក់បីសបង្ហាញពីវោហាសាស្ត្ររបស់លោក បៃដិន នាពេលចុងក្រោយនេះប៉ុណ្ណោះ ព្រោះវាហាក់ដើរហួសពីគោលនយោបាយរបស់ទីក្រុងវ៉ាស៊ីនតោន ដែលចែងជាមួយកោះតៃវ៉ាន់ថា អាមេរិកត្រូវតែផ្តល់មធ្យោបាយការពារខ្លួនដល់កោះនេះ មិនមែនជួយការពារផ្នែកយោធានោះឡើយ។
មែនទែនទៅ សហរដ្ឋអាមេរិកបានបង្ហាញពី «ភាពមិនច្បាស់លាស់នៃយុទ្ធសាស្រ្ត» ចំពោះគោលយោបាយនៅកោះតៃវ៉ាន់ ដោយខ្លួនតែងលើកឡើងថា អាមេរិកនៅតែប្រកាន់ភ្ជាប់នូវ «គោលការចិនតែមួយ»។ ជាក់ស្តែង សេតវិមានអាមេរិកនៅតែសន្យាគាំទ្រទីក្រុងតៃប៉ិទាំងផ្នែកយោធា និងសេដ្ឋកិច្ច ហើយថាគោលជំហរនេះ នឹងមិនមានការផ្លាស់ប្តូរនោះទេ។
អត្ថបទគួរអាន
ជុំវិញនឹងការលើកឡើងរបស់លោកចូ បៃឌិន ដែលថានឹងប្ដេជ្ញាការពារតៃវ៉ាន់នេះដែរ ក្រសួងការបរទេសចិន បាននិយាយនៅថ្ងៃចន្ទទី១៩ខែកញ្ញាថា បានចេញមុខឆ្លើយតប ដោយ«ប្រឆាំងយ៉ាងតឹងរ៉ឹង» ចំពោះសហរដ្ឋអាមេរិក។
លោកស្រី Mao Ning អ្នកនាំពាក្យក្រសួងការបរទេសចិន បាននិយាយនៅក្នុងសន្និសីទសារព័ត៌មានថា ប្រទេសចិនមានសិទ្ធិក្នុងការចាត់វិធានការចាំបាច់ទាំងឡាយណា ដើម្បីឆ្លើយតបទៅនឹងសកម្មភាពមានបំណងចង់បំបែកបំបាក់ប្រទេសចិន។
លោកស្រីបានបន្ថែមថា «មានប្រទេសចិនតែមួយគត់នៅលើពិភពលោក ហើយតៃវ៉ាន់គ្រាន់តែជាផ្នែកមួយនៃប្រទេសចិន ហើយរដ្ឋាភិបាលនៃសាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់របស់ប្រទេសចិន»។
ជុំវិញការថ្លែងលើកឡើងរបស់លោកចូបៃឌិនពាក់ព័ន្ធនឹងកោះតៃវ៉ាន់នេះដែរ លោកស្រី Bonnie Glaser អ្នកជំនាញកិច្ចការអាស៊ីនៅសហរដ្ឋអាមេរិក បាននិយាយថា ប្រសិនបើលោក Biden ធ្វើការសន្យាបែបនេះ គាត់ត្រូវតែធានាថា អាមេរិកអាចធ្វើវាជាក់ស្តែងដូច្នោះមែន។ លោកស្រីបានលើកឡើងថា «ប្រសិនបើប្រធានាធិបតីអាមេរិក លោក Biden សច្ចាការពារតៃវ៉ាន់ នោះលោកគួរតែធ្វើឱ្យប្រាកដថា យោធាសហរដ្ឋអាមេរិកមានសមត្ថភាពធ្វើដូច្នេះ» ហើយការប្រើវោហាសាស្ត្រដើម្បីគាំទ្រ ដោយមិនធ្វើសកម្មភាពពិតប្រាកដ គឺទំនងជាមិនអាចការពារចេតនាឈ្លានពានរបស់ចិននោះទេ»៕
