តាមផែនការ គម្រោងនេះ ដំណាក់កាលដំបូងនឹងសាងសង់រួចនៅចុងឆ្នាំ ២០១៩ និងគ្រោងសាងសង់បញ្ចប់រួចរាល់ នៅចុងឆ្នាំ២០២០។
ឯកឧត្តម ហ៊ឺ បាវី ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ បានលើកឡើងថា គម្រោងអភិវឌ្ឍន៍មជ្ឈមណ្ឌលពាណិជ្ជកម្មនេះ ត្រូវបានចូលរួមគាំទ្រដោយកំពង់ផែស្វយ័តភ្នំពេញ ដោយទីតាំងគម្រោងដែលមានផ្ទៃដី ១០ហិកតា និងចម្ងាយ៤គីឡូម៉ែត្រពីរាជធានីភ្នំពេញនេះ ដើមឡើយជាទីតាំងសម្រាប់ស្ដុកទុកសម្បកកុងតឺន័ររបស់កំពង់ផែស្វយ័តភ្នំពេញ ប៉ុន្ដែ តាំងពីឆ្នាំ២០១៣មក ទីតាំងនេះ ពុំមានការប្រើប្រាស់ច្រើននោះទេ ដោយសារតែកំពង់ផែស្វយ័តភ្នំពេញ បានផ្ទេរប្រតិបត្តិការលើកដាក់កុងតឺនឺរបស់ខ្លួនស្ទើរតែទាំងស្រុង ទៅចំណតនៅស្រុកកៀនស្វាយ ខេត្តកណ្ដាលវិញ។
អត្ថបទទាក់ទង!
ឯកឧត្តម បន្ថែមថា លុះក្រោយមក ខាងកំពង់ផែស្វយ័តភ្នំពេញបានចាប់ដៃគ្នាជាមួយនឹងក្រុមហ៊ុនចិន YUNNAN SHENGMAO INVESTMENT ដោយបានជួលទីតាំងដែលមានទំហំដី ១០ហិកតានេះ ទៅឲ្យក្រុមហ៊ុនចិន ដើម្បីអភិវឌ្ឍគម្រោងមជ្ឈមណ្ឌលពាណិជ្ជកម្មដ៏ធំនៅកម្ពុជា។
បើតាមប្រធានអគ្គនាយកកំពង់ផែស្វយ័តភ្នំពេញដដែលរូបនេះ បានបញ្ជាក់ឲ្យដឹងថា គម្រោងនេះ គឺបានសិក្សាអស់រយៈពេល ២ឆ្នាំមកហើយ ទើបឈានដល់ការបើកសាងសង់នៅពេលនេះ ហើយឯកឧត្តមសង្ឃឹមថា វានឹងផ្ដល់អត្ថប្រយោជន៍ជាច្រើនដល់ពាណិជ្ជករ ក្នុងស្រុក ក៏ដូចជាពលរដ្ឋទូទៅតាមរយៈការផ្ដល់ការងារ និងមុខរបរ ដែលមាននៅក្នុងគម្រោងនេះ។
រូបគម្រោងមជ្ឈមណ្ឌលពាណិជ្ជកម្ម TRIUMPH
លោក Chen TAI AN ប្រធានអគ្គនាយកក្រុមហ៊ុន YUNNAN SHENGMAO INVESTMENT បានឲ្យដឹងថា គម្រោងអភិវឌ្ឍន៍មជ្ឈមណ្ឌលពាណិជ្ជកម្ម TRIUMPH នេះ ត្រូវបានសម្រេចចាប់ផ្ដើមសាងសង់ឡើង ក្រោយពីមានកិច្ចព្រមព្រៀងចុះហត្ថលេខារវាងក្រុមហ៊ុន និងកំពង់ផែស្វយ័តភ្នំពេញ កាលពីឆ្នាំ២០១៦ មកម្លេះ ហើយគម្រោងនេះ គឺធ្វើឡើងស្របតាមគម្រោងយុទ្ធសាស្ត្រខ្សែក្រវាត់មួយ ផ្លូវមួយរបស់រដ្ឋាភិបាលចិនផងដែរ។
រូបគម្រោងមជ្ឈមណ្ឌលពាណិជ្ជកម្ម TRIUMPH
តាមការអះអាងពី ប្រធានអគ្គនាយកក្រុមហ៊ុនចិនដដែលនេះ បានគូសបញ្ជាក់ទៀតថា គម្រោងនេះ នឹងក្លាយជាមជ្ឈមណ្ឌលបោះដុំអន្តរជាតិដ៏ធំមួយនៅកម្ពុជា និងជាមជ្ឈមណ្ឌលទេសចរណ៍ និងកម្សាន្តខ្នាតអន្តរជាតិដ៏ធំមួយផងដែរ ខណៈដែលគម្រោងនេះ នឹងមានក្រុមហ៊ុនជាង ១ម៉ឺនក្រុមហ៊ុន និងមុខទំនិញជាង ១០ម៉ឺនមុខ នឹងមានប្រតិបត្តិការលក់នៅក្នុងមជ្ឈមណ្ឌលពាណិជ្ជកម្មនេះ។
បើតាមព័ត៌មានពីក្រុមហ៊ុនអភិវឌ្ឍន៍គម្រោងមជ្ឈមណ្ឌលពាណិជ្ជកម្ម TRIUMPH នេះ បានឲ្យដឹងថា ការជួលដីពីកំពង់ផែស្វយ័តភ្នំពេញមានរយៈពេល ៥០ឆ្នាំ ប៉ុន្ដែ តម្លៃនៃការជួលប៉ុន្មាននោះ មិនមានព័ត៌មានបង្ហាញនៅឡើយទេ។
រូបគម្រោងមជ្ឈមណ្ឌលពាណិជ្ជកម្ម TRIUMPH
រូបគម្រោងមជ្ឈមណ្ឌលពាណិជ្ជកម្ម TRIUMPH
ប៉ុន្ដែ កាលពីពេលកន្លងទៅថ្មីៗនេះដែរ កំពង់ផែស្វយ័តភ្នំពេញ
ដែលមានចុះបញ្ចីក្នុងផ្សារហ៊ុនកម្ពុជានោះ ក៏ទើបតែបានចុះកិច្ចព្រមព្រៀងជួលដី
តាមបណ្ដោយបឹងទន្លេសាប ដែលមានទំហំ ជិត១០ហិកតា ទៅឲ្យក្រុមហ៊ុនចិនមួយផងដែរ
ដែលមានកុងត្រារយៈពេល ៥០ឆ្នាំ ក្នុងតម្លៃជាទឹកប្រាក់ ១៦,៥លានដុល្លារអាមេរិក។
ហើយបើតាម ការដាក់ស្លាកប៉ាណូផ្សព្វផ្សាយរបស់ក្រុមហ៊ុន ដែលដាក់ព័ទ្ធជុំវិញដីនោះ
ក្រុមហ៊ុនចិនដែលបានជួលដីនេះ ទំនងនឹងធ្វើការសាងសង់អគារសណ្ឋាគារលំដាប់ផ្កាយ៥
នៅទីនោះ។
គួរបញ្ជាក់ដែរថា កាលពីខែមេសាកន្លងទៅនេះ បើតាមការផ្សព្វផ្សាយរបស់គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ក្រុមហ៊ុន YUNNAN SHENGMAO INVESTMENT (CAMBODIA) CO.,LTD ត្រូវបានក្រុមប្រឹក្សាអភិវឌ្ឍន៍កម្ពុជា បានសម្រេចចេញ វិញ្ញាបនប័ត្រចុះបញ្ជីជាស្ថាពរ សម្រាប់គម្រោងសំណើសុំវិនិយោគមជ្ឈមណ្ឌលពាណិជ្ជកម្ម TRIUMPH កម្ពុជា។ គម្រោងនេះ មានទីតាំងវិនិយោគស្ថិតនៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ មានទុនវិនិយោគចំនួន ៩៩លានដុល្លារអាមេរិក និងអាចបង្កើតការងារបានចំនួន ១.១០១កន្លែង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
