ក្រសួងរៀបចំដែនដី ដាក់ឱ្យប្រើប្រាស់សេវាទិញលក់អចលនទ្រព្យតាមប្រព័ន្ធឌីជីថល

ឯកឧត្តម សាយ សំអាល់ ឧបនាយករដ្ឋមន្ដ្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានគូសបញ្ជាក់ងថា ប្រព័ន្ធផ្តល់សេវាសាធារណៈ តាមប្រព័ន្ធឌីជីថល ដែលដាក់ឱ្យដំណើរការនៅថ្ងៃទី៩ ខែមេសា ឆ្នាំ២០២៤នេះ អាចឱ្យអ្នករកស៊ីនៅក្នុងវិស័យអចលនទ្រព្យអាចទិញ-លក់អចលនទ្រព្យផ្សេងៗនៅក្នុងប្រព័ន្ធឌីជីថលបាន ដោយមិនចាំបាច់ទៅបញ្ជាក់ជាមួយអាជ្ញាធរមូលដ្ឋានផ្ទាល់ ពោលគឺអចលនទ្រព្យដែលបានចុះបញ្ជីត្រឹមត្រូវរួចរាល់ហើយនោះ គឺអាចទិញ-លក់បានដោយគ្រាន់តែប្រើប្រាស់ទូរសព្ទដៃប៉ុណ្ណោះ។

​បើតាមឯកឧត្តមឧបនាយករដ្ឋមន្ត្រី សាយ សំអាល់ ការដាក់ឱ្យប្រើប្រាស់នូវសេវាសាធារណៈ តាមប្រព័ន្ធឌីជីថលរបស់ក្រសួងរៀបចំដែនដី នគរូបនីយកម្ម និងសំណង់នេះ គឺធ្វើឡើងក្នុងគោលបំណងដើម្បីបម្រើឱ្យការទិញ-លក់អចលនទ្រព្យរបស់ប្រជាពលរដ្ឋ ក៏ដូចជាអ្នករកស៊ីក្នុងវិស័យអចលនទ្រព្យកាន់តែមានភាពងាយស្រួល រហ័ស ចំណេញពេលវេលា និងស្របទៅតាមភាពរីកចម្រើននៃយុគសម័យឌីជីថលផងដែរ។ មិនតែប៉ុណ្ណោះ ថ្នាក់ដឹកនាំរូបនេះអះអាងដែរថា ការធ្វើប្រតិបត្តិការទិញ-លក់អចលនទ្រព្យនៅក្នុងប្រព័ន្ធឌីជីថលនេះ គឺធានាបាននូវសុវត្ថិភាព និងឯកជនភាពបុគ្គលផងដែរ។

​ជាមួយគ្នានេះឯកឧត្តម សាយ សំអាល់ ក៏បានបញ្ជាក់ដែរថា នៅពេលខាងមុខ ក្រសួងរៀបចំដែនដី នគរូបនីយកម្ម និងសំណង់ ក៏នឹងរៀបចំដាក់ចេញនូវប្រព័ន្ធច្រកចេញចូលតែមួយតាមប្រព័ន្ធអនឡាញផងដែរ ដើម្បីផ្តល់ភាពងាយស្រួលដល់ប្រជាពលរដ្ឋក្នុងការស្វែងរកដំណោះស្រាយ និងបញ្ហាផ្សេងៗ៕