លោក ហ្វៃសល់ ឌូរ៉ានី (Faisal Durrani) ជាដៃគូ និងជាប្រធានផ្នែកស្រាវជ្រាវសម្រាប់តំបន់មជ្ឈិមបូព៌ា និងអាហ្វ្រិកខាងជើងនៅក្រុមហ៊ុន Knight Frank បាននិយាយថា អគារការិយាល័យ និងអចលនទ្រព្យលំនៅឋានត្រូវបានគេរំពឹងថា នឹងមានតម្លៃកើនឡើងថែមទៀតនៅឆ្នាំក្រោយ ដោយសារតែតម្រូវការខ្ពស់ និងការផ្គត់ផ្គង់តឹងរ៉ឹង។ លោក ឌូរ៉ានី បាននិយាយថា ទីក្រុងឌូបៃបានឈានដល់ចំណុចកំពូលមួយ ហើយទីក្រុងនេះកំពុងប្រឹងប្រែងប្រកួតនឹងមជ្ឈមណ្ឌលហិរញ្ញវត្ថុដ៏ល្បីល្បាញក្នុងពិភពលោកជាយូរមកហើយ ដើម្បីក្លាយជាចំណុចស្រូបទាញសម្រាប់អ្នកមានទ្រព្យសម្បត្តិនៅក្នុងពិភពលោក។
លោកបានបន្ថែមថា ហេដ្ឋារចនាសម្ព័ន្ធដឹកជញ្ជូន ការតភ្ជាប់ជាសាកល និងការដឹកនាំរបស់ទីក្រុងនេះបានធ្វើឱ្យកេរ្តិ៍ឈ្មោះ និងឋានៈរបស់ទីក្រុងឌូបៃល្បីល្បាញនៅទូទាំងពិភពលោក។ ការណ៍នេះបានបង្ហាញឱ្យឃើញពីតម្រូវការគ្មានឈប់ឈររបស់បុគ្គលមានទ្រព្យស្ដុកស្ដមក្នុងពិភពលោក ដែលពួកគេចង់ទិញ ឬកាន់កាប់ផ្ទះ ឬក៏ចង់ទៅរស់នៅទីនោះ។
សម្រាប់ទីផ្សារលំនៅឋាននៅតំបន់សំខាន់ៗជាពិសេសនៅជាប់ជើងភ្នំ និងជាប់ឆ្នេរសមុទ្រ តម្លៃផ្ទះនៅទីនោះទំនងជាអាចកើនឡើង៥%នៅឆ្នាំក្រោយ ចំណែកទីផ្សារនៅន្លែងផ្សេងពីនេះ ត្រូវបានគេរំពឹងថា នឹងកើនឡើងជាង៣% ហើយអចលនទ្រព្យសំខាន់ គឺសំដៅទៅលើអចលនទ្រព្យណាដែលគេចង់បានបំផុត ហើយជាធម្មតាវាតែងតែមានតម្លៃថ្លៃជាងគេផងដែរ។
ក្រុមហ៊ុន Knight Frank បានធ្វើព្យាករថា ទីក្រុងឌូបៃនឹងមានសន្ទុះកំណើនអចលនទ្រព្យលំនៅឋានសំខាន់ៗសម្រាប់ឆ្នាំ២០២៤ យឺតជាងទីក្រុងអូកឡេនរបស់ប្រទេសញូវែលហ្សេឡង់ក្នុងអត្រា១០% និងយឺតជាងទីក្រុងមុមបៃរបស់ប្រទេសឥណ្ឌាក្នុងកម្រិតជាង៥%។
ក្រុមហ៊ុននេះបានបញ្ជាក់ថា ក្នុងរយៈពេល៩ខែដំបូងនៅក្នុងឆ្នាំនេះ ជនជាតិចិន គឺជាអ្នកទិញផ្ទះបរទេសច្រើនជាងគេទី២នៅក្នុងទីក្រុងឌូបៃ ដែលស្នើនឹងអត្រា១៤% ហើយជនជាតិអង់គ្លេសបានជាប់ចំណាត់ថ្នាក់លេខមួយជាមួយនឹងអត្រា១៦% ប៉ុន្តែកាលពីឆ្នាំមុនជនជាតិចិន គឺជាអតិថិជនកំពូលរបស់ទីភ្នាក់ងារនេះ ជាមួយនឹងអត្រា២៣% នៃចំនួនអ្នកទិញផ្ទះសរុប៕
អត្ថបទ៖ សុខ ជា
