តំណាងមកពីសភាអឺរ៉ុប និងក្រុមប្រឹក្សាអឺរ៉ុប ដែលមាន ២៧ប្រទេស បានឯកភាពលើកិច្ចព្រមព្រៀងប្រព័ន្ធអ៊ីនធើណែតផ្កាយរណបតម្លៃជាង ៦ពាន់លានដុល្លារនេះ កាលពីថ្ងៃទី១៧ ខែវិច្ឆិកា ឆ្នាំ២០២២។
ក្រុមប្រឹក្សាអឺរ៉ុបបានប្រកាសពីគំនិតផ្តួចផ្តើមក្នុងការបង្កើត និងប្រតិបត្តិការប្រព័ន្ធអ៊ីនធើណែតផ្កាយរណប តាំងពីខែកុម្ភៈមកម្ល៉េះ។ គម្រោងរបស់នេះ ធ្វើឡើងដោយសារតែសហភាពអឺរ៉ុប មានការបារម្ភអំពីភាពឈានមុខរបស់យោធារុស្ស៊ី និងចិន នៅទីអវកាស និងការកើនឡើងយ៉ាងខ្លាំងក្នុងការបង្ហោះផ្កាយរណប។
ការមានប្រព័ន្ធអ៊ីនធើណែតផ្កាយរណបផ្ទាល់ខ្លួន អាចជួយឱ្យតំបន់អឺរ៉ុប បង្កើនល្បឿនអ៊ីនធើណែតទាំងនៅក្នុងតំបន់ខ្លួនឯង និងនៅអាហ្វ្រិកផងដែរ ពោលគឺផ្តល់នូវជម្រើសប្រភពផ្គត់ផ្គង់អ៊ីនធើណែតមួយ ក្រៅពីប្រទេសចិន។
អត្ថបទគួរអាន
ជាមួយគ្នានេះដែរ បណ្តាញទីអវកាសមួយនេះ ក៏អាចគាំទ្រដល់បណ្តាញនានា ក្នុងករណីមានការដាច់ភ្លើង ឬគ្រោះមហន្តរាយធំៗកើត និងផ្តល់នូវការតភ្ជាប់ក្នុងកន្លែងដែលអត់មានសេវាផងដែរ។
សូមបញ្ជាក់ថា ក្នុងចំណោមកិច្ចព្រមព្រៀងតម្លៃជាង ៦ពាន់លានដុល្លារនេះ ក្នុងនោះជាង ២ពាន់៤រយលានដុល្លារ ជាទឹកប្រាក់របស់ EU ដែលបង្វែរចេញពីកម្មវិធី និងគម្រោងផ្សេងៗ និងជាង ៣ពាន់៧រយលានដុល្លារទៀត រ៉ាប់រងដោយវិស័យឯកជន។
ការអភិវឌ្ឍគម្រោងនេះ អាចនឹងចាប់ផ្តើមនៅឆ្នាំក្រោយ ហើយនឹងអាចផ្តល់សេវាពេញលេញនៅឆ្នាំ២០២៨៕
អត្ថបទ៖ នៅ សំភី
