ប្រធានសមាគមសណ្ឋាគារកម្ពុជា លោក ឌិន សុមេធារិទ្ធ បានប្រាប់ខេមបូណូមីសថា ក្រោយពីពេលមានវិបត្តិ Covid 19 មក វិស័យសណ្ឋាគារ ដែលពឹងផ្អែកទាំងស្រុងទៅលើទេសចរក្នុងស្រុក និង ក្រៅស្រុកនៅតែបន្តជួបការលំបាក ដោយសារការបិទជើងហោះហើរស្ទើរតែស្រុង និង ភ្ញៀវទេសចរត្រូវកំណត់ឲ្យធ្វើចត្តាឡីស័ក ១៤ ថ្ងៃបន្ថែមទៀត។ ទាក់ទងនឹងបញ្ហានេះ លោកឌិន សុមេធារិទ្ធ លើកឡើងថា ខាងវិស័យឯកជនដែលអ្នករកស៊ីនៅក្នុងវិស័យទេសចរណ៍ បានសហការជាមួយរដ្ឋាភិបាល ក៏ដូចជាក្រសួងពាក់ព័ន្ធ កំពុងរៀបចំបើកទទួលភ្ញៀវដែលបានចាក់វ៉ាក់សាំងរួច និងតេស្តអវិជ្ជមានកូវីដ-១៩ អាចចូលមកកម្សាន្ដនៅកម្ពុជា ដោយមានការលើកលែងការធ្វើចត្តាឡីស័ក។
អត្ថបទទាក់ទង!
បើតាមប្រធានសមាគមសណ្ឋាគារកម្ពុជាអណត្តិថ្មីនេះ បានគូសបញ្ជាក់ថា បច្ចុប្បន្នក្រសួងទេសចរណ៍ កំពុងរៀបចំគម្រោងបើកសាកល្បងជាលើកដំបូងនៅក្រុងព្រះសីហនុ ដោយទទួលភ្ញៀវទេសចរដែលបានចាក់វ៉ាក់សាំងរួច ដោយមិនចាំបាច់ធ្វើចត្តាឡីស័ក ១៤ ថ្ងៃ និងអាចបន្ដមកនៅរាជធានីភ្នំពេញ និងបណ្ដាខេត្តផ្សេងៗទៀត ហើយតាមរយៈគម្រោងនេះ រំពឹងថាជួយឲ្យវិស័យទេសចរណ៍នឹងវិលមករកប្រក្រតីវិញនៅឆ្នាំ ដើមឆ្នាំ ២០២២ ខាងមុខនេះ។
តាមការគូសបញ្ជាក់របស់លោក ឌិន សុមេធារិទ្ធ គិតមកដល់ពេលនេះ សណ្ឋាគារប្រមាណ ៥០ សណ្ឋាគារ បានបើកភោជនីយដ្ឋានដើម្បីទ្រទ្រង់អាជីវកម្មរបស់ខ្លួន ព្រមទាំងចុះអនុស្សារណៈយោគយល់ជាមួយក្រសួងសុខាភិបាលដើម្បីទទួលភ្ញៀវ ដែលត្រូវធ្វើចត្តាឡីស័ក។
ក្នុងតួនាទីជាប្រធានសមាគមសណ្ឋាគារកម្ពុជាអណត្តិថ្មី លោក ឌិន សុមេធារិទ្ធ អះអាងថា លោកកំពុងរៀបចំផែនការយុទ្ធសាស្រ្ត បីឆ្នាំ ២០២១ដល់ ២០២៣ ដើម្បីប្រមែរប្រមូលសមាជិកដែលបានបាត់បង់ទៅ ព្រមទាំងរៀបចំរចនាសម្ព័ន្ធផ្ទៃក្នុងឡើងវិញ ដើម្បីប្រសិទ្ធិភាពការងាររបស់ខ្លួន និង ជួយដល់វិស័យសណ្ឋាគារ និង ភោជនីយដ្ឋាន ឲ្យប្រសើរឡើងវិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
