លោក លី ឡាវីល អ្នកគ្រប់គ្រងទូទៅផ្នែកចិញ្ចឹមជ្រូក នៃក្រុមហ៊ុន ម៉ុង ឬទ្ធី គ្រុបយល់ឃើញថា កសិករចិញ្ចឹមមាន់សាច់ទ្រង់ទ្រាយតូចនៅតែជួបបញ្ហាប្រឈម និងងាយរងគ្រោះពីការប្រកួតប្រជែងជាមួយក្រុមហ៊ុនមានកសិដ្ឋានធំៗ ដែលមានទុនច្រើន និងមានលទ្ធភាពខ្ពស់។ បើតាមអ្នកជំនាញរូបនេះ ការនាំចូលកូនមាន់ច្រើនពីប្រទេសជិតខាងដោយមិនមានការគ្រប់គ្រងច្បាស់លាស់ កំពុងធ្វើឱ្យកសិករខ្នាតតូចរងផលប៉ះពាល់យ៉ាងខ្លាំង។ បើតាមលោក លី ឡាវីល មកទល់ពេលនេះ សកម្មភាពភ្ញាស់កូនមាន់របស់ក្រុមហ៊ុនក្នុងស្រុកមានលទ្ធភាពជិតគ្រប់គ្រាន់សម្រាប់ផ្គត់ផ្គង់តម្រូវការដល់កសិករ ខណៈការទប់ស្កាត់ការនាំចូលកូនមាន់ពីប្រទេសជិតខាងហាក់ពុំទាន់មានប្រសិទ្ធភាពនោះទេ។ សម្រាប់អ្នកជំនាញរូបនេះ ដើម្បីដោះស្រាយបញ្ហាប្រឈមដល់កសិករបានលុះត្រាតែមានការជំរុញការបង្កើតស្ថានីយភ្ញាក់កូនមាន់ក្នុងស្រុកឱ្យបានគ្រប់តម្រូវការ និងរឹតបន្តឹងការលួចនាំចូលខុសច្បាប់។
ជាមួយគ្នានេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានគូសបញ្ជាក់ថា នៅក្នុងស្ថានភាពនេះ ក្រុមហ៊ុនចិញ្ចឹមសត្វដែលមានកសិដ្ឋានធំៗគួរកាត់បន្ថយបរិមាណចិញ្ចឹម ដើម្បីសង្រ្គោះទីផ្សារ ខណៈការចិញ្ចឹមច្រើនពេកបានធ្វើឱ្យតម្លៃមានការធ្លាក់ចុះ និងប្រឈមការខាតបង់។ បើតាមអ្នកជំនាញរូបនេះ សមាគមបានសម្របសម្រួលជាមួយអ្នកពាក់ព័ន្ធជាបន្តបន្ទាប់ ខណៈតម្លៃមាន់សាច់ចាប់ផ្ដើមឡើងថ្លៃវិញជាបណ្ដើរៗហើយ។
គួររំលឹកថា វិបត្តិធ្លាក់ថ្លៃមាន់សាច់នាពេលកន្លងមកបានធ្វើឱ្យកសិករជាច្រើនខាតបង់ដើមទុនយ៉ាងដំណំ។ គិតត្រឹមថ្ងៃទី២០ ខែវិច្ឆិកា ឆ្នាំ២០២៦ តម្លៃមាន់សាច់រស់នៅតាមកសិដ្ឋានបានងើបឡើងដល់ប្រមាណ ៤,៦០០រៀលក្នុងមួយគីឡូក្រាម ប៉ុន្តែកសិករអះអាងថា កម្រិតតម្លៃនេះគ្រាន់តែជួយសម្រាលការខាតបង់ប៉ុណ្ណោះ ពោលគឺនៅមិនទាន់អាចផ្តល់ផលចំណេញដូចពេលមុននៅឡើយទេ៕
អត្ថបទ៖ បូ ដូឡា