សារព័ត៌មាន Vietnam News បានរាយការណ៍ថា នៅក្នុងរយៈពេល១០ខែឆ្នាំនេះ វៀតណាមអាចទាក់ទាញគម្រោងវិនិយោគបរទេសថ្មីៗរហូតដល់ជាង២ពាន់៦រយគម្រោង កើនឡើង៦៦ភាគរយបើធៀបនឹងរយៈពេលដូចគ្នាកាលពីឆ្នាំមុន។
គម្រោងវិនិយោគបរទេសថ្មីៗទាំងនេះបានទាក់ទាញទុនវិនិយោគមានតម្លៃជាង១៥ពាន់លានដុល្លារចូលក្នុងប្រទេសមួយនេះ មានការកើនឡើង៥៤% បើធៀបនឹងរយៈពេលដូចគ្នាកាលពីឆ្នាំមុន។
នៅក្នុងរយៈពេលដូចគ្នានេះវៀតណាមទទួលបានលំហូរមូលនិធិវិនិយោគបរទេសសរុបជិត២៦ពាន់លានដុល្លារ កើនឡើងជិត១៥% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះទុនវិនិយោគជាង១៥ពាន់លានដុល្លារ ត្រូវបានចូលតាមរយៈគម្រោងថ្មីៗ ហើយក្រៅពីនេះត្រូវបានហូរចូលតាមរយៈគម្រោងដែលមានស្រាប់។
បើតាមទីភ្នាក់ងារវិនិយោគទុនបរទេស ក្នុងចំណោមលំហូរទុនវិនិយោគបរទេសសរុប ភាគច្រើនត្រូវបានចាក់បញ្ចូលទៅក្នុងវិស័យឧស្សាហកម្មកែច្នៃ និងផលិតកម្ម ដែលមានគម្រោងថ្មីដល់ទៅជិត៣៣% នៃគម្រោងសរុប ហើយបន្ទាប់មកគឺនៅក្នុងវិស័យសេវាកម្ម និងការលក់ទំនិញ។
បច្ចុប្បន្នដៃគូវិនិយោគធំៗរបស់វៀតណាម រួមមាន សិង្ហបុរី កូរ៉េខាងត្បូង ហុងកុង កោះតៃវ៉ាន់ ជប៉ុន និងចិន។ ស្ថិតិបានបង្ហាញថា ទំហំវិនិយោគសរុបរបស់វិនិយោគទុនទាំងនេះបានរួមចំណែកជិត៨២ភាគរយនៃទុនវិនិយោគសរុបរបស់វៀតណាម ចាប់ពីខែមករា ដល់ខែតុលា។
អត្ថបទគួរអាន
ក្នុងចំណោមអ្នកវិនិយោគទាំងនេះ វិនិយោគទុនមកពីប្រទេសសិង្ហបុរី ជាប់ចំណាត់ថ្នាក់លេខមួយ ដែលមានទឹកប្រាក់ជិត៥ពាន់លានដុល្លារ ឫស្មើនឹង១៨% នៃគម្រោងវិនិយោគសរុប ដែលតាមពីក្រោយដោយវិនិយោគទុនកូរ៉េខាងត្បូង ជាមួយទុនវិនិយោគជិត៤ពាន់លានដុល្លារ ឬស្មើនឹង១៥% និងហុងកុងជាង៣ពាន់លានដុល្លារ ឬជិត១៤%នៃគម្រោងវិនិយោគសរុប។
ខេត្តដែលទាក់ទាញគម្រោងវិនិយោគបានច្រើនជាងគេ គឺខេត្តក្វាងនិញ ដោយទទួលទឹកប្រាក់វិនិយោគជាង៣ពាន់លានដុល្លារ ឬស្មើនឹងជិត១២%នៃទុនវិនិយោគសរុប ខណៈទីក្រុងហៃផុង ឈរលេខរៀងទី២ មានទឹកប្រាក់ជិត៣ពាន់លានដុល្លារ ស្មើនឹងជិត១១% បន្ទាប់មកគឺនៅទីក្រុងហាណូយ ទីក្រុងហូជីមិញ និងខេត្តបាកយ៉ាង។
ក្នុងជំនួបជាមួយអ្នកវិនិយោគបរទេសនៅទីក្រុងហាណូយ ក្នុងខែនេះ លោក ផាម មិញជិញ នាយករដ្ឋមន្ត្រីវៀតណាម បានគួសបញ្ជាក់ថា វៀតណាមនឹងបន្តកសាងបរិយាកាសធុរកិច្ច និងវិនិយោគប្រកបដោយសុវត្ថិភាព តម្លាភាព និងប្រកួតប្រជែងខ្ពស់ ផ្តល់លទ្ធភាពឱ្យធុរកិច្ច និងវិនិយោគិនរួមទាំងបរទេសធ្វើប្រតិបត្តិការក្នុងរយៈពេលវែងនៅក្នុងប្រទេស។
ទន្ទឹមនឹងនេះ លោកនាយករដ្ឋមន្ត្រីវៀតណាម បានស្នើឱ្យអាជ្ញាធរគ្រប់កម្រិត បន្តអនុវត្តប្រកបដោយប្រសិទ្ធភាពនូវគោលនយោបាយ និងច្បាប់ទាក់ទងនឹងការកែលម្អបរិយាកាសវិនិយោគ និងធុរកិច្ច ក៏ដូចជាពិនិត្យ កែសម្រួល និងបន្ថែមគោលនយោបាយសហប្រតិបត្តិការបរទេសឱ្យសមស្របទៅនឹងការពិត ព្រមទាំងស្តាប់គំនិតរបស់ធុរកិច្ច និងវិនិយោគិនជាតិ និងអន្តរជាតិ ដើម្បីដោះស្រាយរាល់បញ្ហាដែលកើតឡើង។
បន្ថែមលើនេះ លោក ស្នើឱ្យសហគមន៍ធុរកិច្ចបន្តកសាងយុទ្ធសាស្រ្តអាជីវកម្មរយៈពេលវែង និរន្តរភាព បរិស្ថាន កំណែទម្រង់ផលិតកម្ម និងគំរូអាជីវកម្មឆ្ពោះទៅរកសេដ្ឋកិច្ចបៃតង សេដ្ឋកិច្ចឌីជីថល និងការឆ្លើយតបទៅនឹងការប្រែប្រួលអាកាសធាតុ៕
ដោយៈ សរ សុជាតិ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
