ជាក់ស្ដែង ក្នុងអំឡុង៦ខែចុងក្រោយនេះ អ្នកជំនាញផ្នែកអចលនទ្រព្យ ឲ្យដឹងថា វិស័យសំណង់និងអចលនទ្រព្យ គឺបន្តរីកលូតលាស់ឥតឈប់ឈរ ដោយក្នុងនោះ គេឃើញសំណង់បុរី ខុនដូ អគារពាណិជ្ជកម្ម ផ្ទះល្វែង វីឡា ជាដើម រីកស្គុសស្គាយគ្រប់ប្រភេទ។
លោកឧកញ៉ា ចេង ខេង អគ្គនាយកក្រុមហ៊ុនសេវាអចលនទ្រព្យ CPL ដែលរកស៊ីខាងវិស័យនេះជាង ២០ឆ្នាំមកហើយ ឲ្យដឹងថា ការអភិវឌ្ឍគម្រោងសំណង់លំនៅដ្ឋាន គឺរីករាលដាលទៅគ្រប់ទិសនៃរាជធានីភ្នំពេញ។
ក្នុងនោះ លោកឧកញ៉ា ចេង ខេង និយាយថា ខណ្ឌចំនួនពីរនៃរាជធានីភ្នំពេញ ដែលមានសកម្មភាពទិញលក់អចលនទ្រព្យ ពោលគឺផ្ទះបែបបុរី និងផ្ទះល្វែងពុះកញ្ជ្រោលខ្លាំងជាងគេ គឺ ខណ្ឌព្រែកព្នៅ និង ខណ្ឌសែនសុខ។
លោកឧកញ៉ា ចេង ខេង ឲ្យដឹងយ៉ាងដូច្នេះ ថា «ប៉ុន្មានខែចុងក្រោយនេះ យើងឃើញថា ខណ្ឌសែនសុខ និងខណ្ឌព្រែកព្នៅ លក់ច្រើនជាងគេ ពោល ការទិញដូរនៅខណ្ឌទាំងពីរនេះ មានសន្ទុះច្រើនជាងខណ្ឌផ្សេងៗ»។
លោកឧកញ៉ា ចេង ខេង អគ្គនាយកក្រុមហ៊ុនសេវាអចលនទ្រព្យ CPL
តើអ្នកបានអានអត្ថបទនេះ ឬនៅ?
សន្ទុះខ្លាំងនៃការទិញផ្ទះល្វែង ផ្ទះបុរី និងវីឡា គឺដោយសារតែម្យ៉ាង គឺប្រជាជនរស់នៅទីក្រុងភ្នំពេញមានជីវភាពប្រសើរឡើង ពោលពួកគាត់កាន់តែមានលទ្ធភាពជាងមុន និងម្យ៉ាងទៀត គឺការប្រកួតប្រជែងនៃទីផ្សារ ដែលនាំឲ្យអ្នកអភិវឌ្ឍគម្រោងលំនៅដ្ឋានប្រដេញគ្នាក្នុងផ្ដល់លក្ខខណ្ឌទិញដែលកាន់តែបង្កភាពងាយស្រួលដល់អ្នកទិញ។ នេះបើតាមការបញ្ជាក់របស់លោកឧកញ៉ា ចេង ខេង។
លោកឧញ៉ាបន្តថា ការរីកចម្រើននៃវិស័យសំណង់និងអចលនទ្រព្យនេះ ក៏បានឆ្លុះបញ្ចាំងឲ្យឃើញតាមរយៈកំណើននៃវិនិយោគទុន ទាំងក្នុងស្រុក ទាំងក្រៅស្រុក ដែលបានចាក់ចូលក្នុងវិស័យនេះ រួមទាំងកំណើននៃអ្នកអភិវឌ្ឍ និងក្រុមហ៊ុនបម្រើសេវាអចលនទ្រព្យ ដែលលោកថា កាលពី២០ឆ្នាំមុន មានក្រុមហ៊ុនបម្រើសេវាអចលនទ្រព្យតែពីរបីប៉ុណ្ណោះ ប៉ុន្តែ បច្ចុប្បន្ន គឺក្រុមហ៊ុនបម្រើសេវាអចលនទ្រព្យ មានរហូតដល់ទៅជាង ២០០ក្រុមហ៊ុន។
បើនិយាយពីសំណង់អចលនទ្រព្យសព្វថ្ងៃ គេនឹងអាចចោទសួរថា បើសង់ច្រើនម្ល៉ឹងៗ តើអ្នកណាខ្លះជាអ្នកទិញ?
លោកឧកញ៉ាដែលមានពិសោធន៍ចាស់វស្សាខាងរបរអចលនទ្រព្យ ចេង ខេង និយាយថា សម្រាប់សំណង់ផ្ទះល្វែង ផ្ទះបុរី និងផ្ទះវីឡា អ្នកទិញភាគច្រើនគឺជាប្រជាជនក្នុងស្រុក ដោយឡែកលំនៅដ្ឋានបែបអាផាតមិន និងខុនដូទំនើប អ្នកទិញ ឬជួល ភាគច្រើនជាជនបរទេស និងមួយភាគតូច ជាប្រជាជនខ្មែរដែលមានជីវភាពធូរធារខ្លាំង៕
