ធនាគារកណ្តាលរុស្ស៊ី បានប្រកាសកាលពីសប្តាហ៍មុនថា ខ្លួននឹងកែសម្រួលអត្រាប្រតិបត្តិការដោះដូររូបិយប័ណ្ណសម្រាប់ការលក់ប្រាក់យន់ ចាប់ពីថ្ងៃទី២៥ ខែមីនា តទៅ។ ជាមួយគ្នានេះ ធនាគារនេះ ក៏នឹងបង្កើនប្រតិបត្តិការដោះដូររូបិយប័ណ្ណប្រចាំថ្ងៃពី១០ពាន់លានយន់ ឬ១,៤ពាន់លានដុល្លារឱ្យឈានដល់២០ពាន់លានយន់ ឬ២,៨ពាន់លានដុល្លារ ផងដែរ ដើម្បីទប់ស្កាត់កុំឱ្យអត្រាប្ដូរប្រាក់ប្រែប្រួលខ្លាំងពេក។
យោងតាមទិន្នន័យរបស់ធនាគារកណ្ដាលរុស្ស៊ី តម្រូវការដោះដូរប្រាក់យន់ពីសំណាក់ធនាគារនានាបានឈានដល់កម្រិតកំណត់ត្រាកាលពីថ្ងៃទី២៩ ខែកុម្ភៈ ឆ្នាំ២០២៤ នៅពេលការដោះដូររូបិយប័ណ្ណបានឈានដល់១០ពាន់លានយន់ ឬ១,៤ពាន់លានដុល្លារ ដែលជាចំនួនកំណត់។
ធនាគារកណ្តាលរុស្ស៊ី បានចាប់ផ្តើមប្រតិបត្តិការដោះដូរប្រាក់យន់ និងប្រាក់រូប៊ល (Ruble) របស់រុស្ស៊ី នៅខែមករា ឆ្នាំ២០២៣។ ផ្អែកតាមរបាយការណ៍របស់ធនាគារកណ្ដាលរុស្ស៊ី បង្ហាញថា ចំនួនទឹកប្រាក់សរុបនៃប្រតិបត្តិការដោះដូររូបិយប័ណ្ណកាលពីឆ្នាំមុន បានឈានដល់ប្រមាណ៦០ពាន់លានយន់ ឬ៨,៤ពាន់លានដុល្លារ។ ធនាគារកណ្ដាលនេះ ក៏និយាយដែរថា ទ្រព្យសកម្មរបស់ខ្លួន ពោលគឺទ្រព្យដែលខ្លួនអាចបំប្លែងទៅជាសាច់ប្រាក់បានងាយស្រួលក្នុងរយៈពេលខ្លី មានគ្រប់គ្រាន់ ដើម្បីរក្សាស្ថិរភាពហិរញ្ញវត្ថុ និងធ្វើប្រតិបត្តិការចាំបាច់នានា។
ធនាគារនេះបាននិយាយទៀតថា ហានិភ័យទាក់ទងនឹងការវិនិយោគលើរូបិយប័ណ្ណ និងឧបករណ៍ហិរញ្ញវត្ថុនៃបណ្ដាប្រទេសមិនមែនជាមិត្តត្រូវបានរឹតត្បិត ហើយថា កត្តាទាំងនេះឆ្លុះបញ្ចាំងពីតួនាទីដ៏សំខាន់នៃរូបិយប័ណ្ណយន់ នៅក្នុងការបង្កើតទ្រព្យសកម្មបម្រុង៕
ដោយ: តែម សុខុម
