ការកាត់បន្ថយអត្រាការប្រាក់នៅអាម៉េរិក បន្តស្ថិតក្នុងភាពស្រពេចស្រពិល ក្រោយអតិផរណាកញ្ជ្រោលឡើងកាលពីខែកុម្ភៈ

របាយការណ៍សន្ទស្សន៍អតិផរណាចុងក្រោយបង្អស់នៅសហរដ្ឋអាម៉េរិក បានបង្ហាញថា អត្រាអតិផរណានៅសហរដ្ឋអាម៉េរិកកាលពីខែកុម្ភៈ បានកើនឡើងបន្តិចដល់២,៥% ផ្ទុយពីអ្វី ដែលធនាគារកណ្តាលរបស់ប្រទេសនេះបានព្យាករទុកដោយរំពឹងមានក្នុងកម្រិត២%។ កម្រិតអត្រាអតិផរណានេះមានកើនឡើង០,១% បើធៀបនឹងកម្រិតអត្រាអតិផរណានៅក្នុងខែមករា ដែលមានក្នុងកម្រិត២,៤%។ សន្ទស្សន៍អតិផលណា គឺជាមូលដ្ឋានគ្រឹះដ៏ចម្បងរបស់ធនាគារកណ្តាលសហរដ្ឋអាម៉េរិក ក្នុងការសម្រេចចិត្តកាត់បន្ថយអត្រាការប្រាក់ ដែលបានពន្យាពេលជាបន្តបន្ទាប់។

ជុំវិញបញ្ហានេះលោក ជេរូម ផូវែល (Jerome Powell) ប្រធានធនាគារកណ្តាលសហរដ្ឋអាម៉េរិកបានគូសបញ្ជាក់ថា ការកាត់បន្ថយអត្រាការប្រាក់នៅមិនទាន់ខិតជិតចូលមកដល់នៅឡើយទេ ហើយធនាគារកណ្តាលក៏មិនចាំបាច់ប្រញាប់ប្រញាល់ក្នុងការកាត់បន្ថយអត្រាការប្រាក់នោះដែរ។ បើតាមអ្នកជំនាញរូបនេះ ធនាគារកណ្តាលអាម៉េរិកនៅបន្តត្រូវការពេលវេលាបន្ថែមទៀត ដើម្បីរង់ចាំរហូតដល់កម្រិតអត្រាអតិផរណាមានភាពប្រសើរឡើង។

លោកបានបន្តថា សន្ទស្សន៍អត្រាអតិផរណាបានកើនឡើងកាលពីខែកុម្ភៈ ដល់២,៥% គឺខុសពីគោលដៅ២% ដែលធនាគារបានគ្រោងទុក។ ទោះជាយ៉ាងណាថ្នាក់ដឹកនាំធនាគារកណ្តាលអាម៉េរិករូបនេះស្នើកុំឱ្យមានការព្រួយបារម្ភចំពោះការកើនឡើងកម្រិតអត្រាអតិផរណានេះ ដ្បិតវានៅតែមាននិន្នាការស្របតាមការរំពឹងទុករបស់ធនាគារកណ្តាល។ ការស្ទុះងើបឡើងនៃអត្រាអតិផរណានៅខែកុម្ភៈ នេះ អាចបណ្តាលមកពីការកើនឡើងនូវតម្លៃថាមពល២,៨% កំណើននៃតម្លៃស្បៀងអាហារឡើង២,៩%ជាដើម៕

ដោយៈ សរ សុជាតិ