អគារពាណិជ្ជកម្មនិងលំនៅដ្ឋានខ្ពស់ជាងគេទាំង១០នៅកម្ពុជា

ការអភិវឌ្ឍសំណង់អគារនៅកម្ពុជាបានបោះជំហានទៅមុខយ៉ាងឆាប់រហ័សនៅក្នុងរយៈពេល៥ឆ្នាំចុងក្រោយនេះ។ កំណើនអគារខ្ពស់ៗទាំងអស់នេះគឺជាការឆ្លុះបញ្ចាំងពីការរីកចម្រើននៃវិស័យសំណង់ និងសេដ្ឋកិច្ចកម្ពុជា ដែលមានការចូលរួមបណ្តាក់ទុនរវាងវិនិយោគិនក្នុងស្រុកនិងបរទេស។

អគារភ្លោះ The Bridge ស្ថិតក្នុងចំណោមអគារពាណិជ្ជកម្មនិងលំនៅដ្ឋានខ្ពស់បំផុតទាំង១០ នៅកម្ពុជា។

គិតចាប់តាំងពីឆ្នាំ២០០០ រហូតមកដល់ឆ្នាំ២០១៧ អគារពាណិជ្ជកម្មនិងលំនៅដ្ឋានខ្ពស់ៗចាប់ពី ៥ជាន់ឡើងទៅ មានសរុបជាង ៩០១អគារនៅរាជធានីភ្នំពេញ។ នេះបើយោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់។ ហើយបើគិតពីគម្រោងអគារដែលមានកម្ពស់ ៥០ជាន់ រហូត ៥៥ជាន់ ៦០ជាន់ ក៏មានច្រើនដែរ ដែលខ្លះស្ថិតនៅក្នុងគម្រោង និងខ្លះកំពុងសាងសង់យ៉ាងមមាញឹក។

សារព័ត៌មានអេឡិចត្រូនិក ខេមបូណូមីស សូមលើកយកតែអគារពាណិជ្ជកម្មនិងលំនៅដ្ឋានខ្ពស់ជាងគេទាំង ១០ នៅប្រទេសកម្ពុជា ដែលកំពុងតែសាងសង់និងសាងសង់រួចរាល់តែប៉ុណ្ណោះ មានដូចខាងក្រោមនេះ៖

ទី១ អគារ The Peak កម្ពស់ ៥៥ជាន់

រូបភាពអគារ The Peak ដែលផ្សព្វផ្សាយនៅលើគេហទំព័រក្រុមហ៊ុន។

The Peak បានបោះទុនវិនិយោគទឹកប្រាក់ចំនួន ៥៨០លានដុល្លារអាមេរិក មានកម្ពស់ចំនួន ៥៥ជាន់ ដែលក្នុងនោះ មានខុនដូ ផ្សារទំនើប កន្លែងការិយាល័យកម្រិត A មាន ៣៥ជាន់ និង ២០ជាន់ នៅខាងលើ នឹងត្រូវរៀបចំសម្រាប់សណ្ឋាគារលំដាប់ផ្កាយ ៥ ឈ្មោះថា Shangri-La ជាសណ្ឋាគារដ៏ល្បីល្បាញនៅលើពិភពលោកដែលមកពីទីក្រុងហុងកុង។

អគារ The Peak សង់ឡើងផុតពីដីបានច្រើនគួរសមហើយ គិតត្រឹមខែមេសា ឆ្នាំ២០១៨។

បច្ចុប្បន្ន គម្រោងវិនិយោគអគារ The Peak កំពុងតែសាងសង់យ៉ាងមមាញឹក វិនិយោគដោយក្រុមហ៊ុន វើលប្រ៊ីដ ឡែនដ៍ (WorldBridge Land) ដែលបានសហការជាមួយនឹងក្រុមហ៊ុនមកពីសិង្ហបុរី Oxley Holdings ដែលជាគម្រោងដ៏ធំជាងគេមួយរបស់លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើល ប្រ៊ីដ គ្រុប ផងដែរ។ អគារ The Peak មានទីតាំងស្ថិតនៅមិនឆ្ងាយពីអគារភ្លោះ The Bridge នោះទេ។

អគារនេះស្ថិតនៅក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។ អគារ The Peak គ្រោងនឹងបញ្ចប់ការសាងសង់រួចរាល់នៅក្នុងឆ្នាំ២០២០ ខាងមុខនេះ។

ទី២ អគារភ្លោះ The Bridge ៤៥ជាន់

អគារភ្លោះ The Bridge នេះ ជាការសហការវិនិយោគរួមគ្នារវាងក្រុមហ៊ុន Worldbridge Land របស់លោកឧកញ៉ា សៀ ឫទ្ធី និងក្រុមហ៊ុនអភិវឌ្ឍន៍អចលនទ្រព្យមកពីប្រទេសសិង្ហបុរី ដែលមានឈ្មោះថា Oxley Holdings ដោយបានបោះទុនវិនិយោគក្នុងទឹកប្រាក់ប្រមាណ ៣០០លានដុល្លារអាមេរិក ស្ថិតនៅតំបន់ពិសេសតាមបណ្តោយវិថីរដ្ឋសភា និងជិតស្ថានទូតអូស្រ្តាលី ក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។

The Bridge មានលក្ខណៈពិសេសនិងមុខងារប្រើប្រាស់ចម្រុះ ដូចជា ផ្សារទំនើបកម្ពស់ ៤ជាន់ ខុនដូ ដែលមាន ៧០០យូនីត ការិយាល័យ និង Home Office ចំនួន ៩០០ប្លុក។

អគារ The Bridge ដ៏ស្កឹមស្កៃ គ្រោងនឹងសម្ពោធឲ្យប្រើប្រាស់នៅឆ្នាំ២០១៨នេះ។

អគារការិយាល័យ អគារស្នាក់នៅរួមដ៏ធំទំនើបមិនធ្លាប់មាននៅកម្ពុជា សាងសង់លើផ្ទៃដីចំនួន១០០៩០ម៉ែត្រការ៉េ ដោយមានអគារភ្លោះចំនួន២ កម្ពស់៤៥ជាន់ ដែលបច្ចុប្បន្នរាប់ចាត់ទុកថា ជាអគារខ្ពស់ជាងគេបង្អស់នៅប្រទេសកម្ពុជា។ Home Office (Soho) ជាការិយាល័យដែលប្រើប្រាស់សម្រាប់ធ្វើជាផ្ទះស្នាក់នៅផង និងអាចធ្វើជាកន្លែងធ្វើការផង។

ប៉ុន្តែ បើគិតពីអគារបច្ចុប្បន្នដែលសាងសង់ខ្ពស់ជាងគេបង្អស់នៅកម្ពុជា គឺអគារភ្លោះ The Bridge ដែលមានកម្ពស់ ៤៥ជាន់។ លោក ឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើល ប្រ៊ីដ គ្រុប ធ្លាប់បានប្រាប់ ខេមបូណូមីស ថា អគារភ្លោះខ្ពស់ The Bridge នឹងបើកទ្វារប្រតិបត្តិការអាជីវកម្មនៅក្នុងឆ្នាំ២០១៨ នេះហើយ ដើម្បីឆ្លើយតបទៅនឹងតម្រូវការចាំបាច់របស់អតិថិជន។

លោកឧកញ៉ា សៀ ឫទ្ធី បានបញ្ជាក់យ៉ាងដូច្នេះថា៖ «សូមអរគុណដល់អតិថិជនដែលតែងតែគាំទ្រ តាំងពីគម្រោងទី១ ទី២ និងអាចរហូតទី៣ទៀត ដោយសារតែភាពជឿជាក់ ដូច្នេះ ក្នុងនាមខ្ញុំជាអ្នកអភិវឌ្ឍ ខ្ញុំមិនធ្វើឲ្យអតិថិជនខកចិត្តនោះទេ»។

ទី៣ អគាពាណិជ្ជកម្ម Olympia CITY

អគារ Olympia City ដែលអភិវឌ្ឍដោយឧកញ៉ា ពុង ឃាវសែ។

គម្រោងអគារពាណិជ្ជកម្ម Olympia City ជាគម្រោងរបស់អ្នកឧកញ៉ា ពុង ឃាវសែ ប្រធានក្រុមប្រឹក្សាក្រុមហ៊ុនកាណាឌីយ៉ា គ្រុប និងក្រុមហ៊ុនអភិវឌ្ឍន៍អចលនទ្រព្យ OCIC កំពុងមមាញឹកសាងសង់សំណង់លំនៅដ្ឋាន និងអគារពាណិជ្ជកម្ម និងសណ្ឋាគារ ដែលមានកម្ពស់រហូតដល់ ៥៥ជាន់ ស្ថិតនៅជុំវិញបរិវេណពហុកីឡដ្ឋានជាតិអូឡាំពិក។

ទី៤ គម្រោងមជ្ឈមណ្ឌល Sino Plaza

គម្រោងមជ្ឈមណ្ឌល Sino Plaza ជាគម្រោងវិនិយោគរបស់ចិន។ គម្រោងនេះមានអគារកម្ពស់៤៥ជាន់ចំនួន៤ វិនិយោគក្នុងទឹកប្រាក់ជាង ២៥០លានដុល្លារ សាងសង់ស្ថិតនៅទីតាំងអតីតផ្សារបឹងត្របែក ក្នុងសង្កាត់បឹងត្របែក ខណ្ឌចម្ការមន ដែលគ្រោងនឹងបញ្ចប់ការសាងសង់នៅចុងឆ្នាំ២០១៨ ខាងមុខនេះ។

គម្រោងមជ្ឈមណ្ឌល Sino Plaza នឹងក្លាយជាបណ្ដុំអគារលំនៅដ្ឋាន ខុនដូទំនើប និងពាណិជ្ជកម្មដ៏ធំបំផុតនៅរាជធានីភ្នំពេញ ដែលគម្រោងនេះបង្កើតឡើងដោយក្រុមហ៊ុន CYTS នៅប្រទេសចិន សហការជាមួយក្រុមហ៊ុន Natural Lucky Real Estate។

ទី៥ អគារវឌ្ឍនៈ ថោវើរ ៣៩ជាន់

អគារ វឌ្ឍនៈ ថៅវើ កម្ពស់ ៣៩ជាន់ នៅកណ្ដាលរាជធានីភ្នំពេញ។

អគារវឌ្ឍនៈ Vattanac Capital ចាប់ផ្តើមបើកដំណើរការ ឆ្នាំ២០០៤។ អគារ Vattanac Capital ដែលមានរាងដូចដងខ្លួនសត្វនាគ មានកម្ពស់សរុបចំនួន ១៨៨ម៉ែត្រ និងមាន ៣៩ជាន់ ត្រូវបានគេចាត់ចូលជាអគារដ៏ខ្ពស់មួយក្នុងប្រទេសកម្ពុជានាពេលបច្ចុប្បន្ននេះ។ អគារនេះត្រូវគេបែងចែកចេញជា ៤ផ្នែកសំខាន់ៗ គឺតំបន់ការិយាល័យកម្រិត A ដែលមានចំនួន ២១ជាន់ តំបន់លក់វត្ថុប្រណីតៗ សណ្ឋាគារលំដាប់ផ្កាយ ៥ Rosewood និងកន្លែងកម្សាន្ត។

អ្នកជំនាញផ្នែកអចលនទ្រព្យ បានអះអាងថា ការសាងសង់សំណង់អគារធំៗ និងទំនើបៗនៅក្នុងរាជធានីភ្នំពេញ មិនត្រឹមតែបង្ហាញពីការរីកចម្រើនរបស់ប្រទេសជាតិប៉ុណ្ណោះទេ ប៉ុន្តែ អគារទាំងអស់នោះ នឹងចូលរួមចំណែកដ៏សំខាន់មួយដើម្បីលើកស្ទួយកិត្យានុភាពវិស័យសំណង់ និងស្ថាបត្យកម្មនៅកម្ពុជា ក៏ដូចជាលើកមុខមាត់រាជធានីភ្នំពេញផងដែរ៕