នេះបើយោងតាមទិន្នន័យពីអាជ្ញាធរទេសចរណ៍ថៃ ហៅកាត់ថា (TAT)។ យោងតាមទិន្នន័យពីអាជ្ញាធរថៃបង្ហាញថា ទីក្រុងឆ្នេរភាគខាងត្បូងភូកេត កំពុងប្រឈមមុខនឹងបញ្ហាកង្វះខាតកម្មករប្រមាណជាង ១៧០០០នាក់ សម្រាប់បម្រើក្នុងវិស័យទេសចរណ៍ ខណៈទីក្រុងឈៀងម៉ៃភាគខាងជើងត្រូវការកម្មករចំនួនប្រមាណ៩០០០នាក់បន្ថែមទៀត។ ចំណែកខេត្តឈុនបុរី ដែលស្ថិតនៅភាគខាងត្បូងនៃទីក្រុងបាងកក ត្រូវការកម្មករបំពេញការងារប្រហែល ៣០០០ នាក់។
ក្រុមប្រឹក្សាទេសចរណ៍ថៃហៅកាត់ថា (TCT) រំពឹងដោយសុទិដ្ឋិនិយមថា នឹងមានភ្ញៀវទេសចរបរទេសរហូតដល់ ៣០ លាននាក់នៅឆ្នាំ២០២៣នេះ ជាមួយនឹងប្រាក់ចំណូលសរុបពីទេសចរណ៍ឈានដល់៩១ពាន់លានដុល្លារ។
លោក Chamnan Srisawat ប្រធានក្រុមប្រឹក្សាទេសចរណ៍ថៃបាននិយាយនៅក្នុងសេចក្ដីថ្លែងការណ៍មួយថា ប្រសិនបើបញ្ហាកង្វះខាតកម្មករនេះនៅតែបន្តអូសបន្លាយ គេប្រហែលជាមិនអាចបំពេញតាមការរំពឹងទុកថានឹងមាន អ្នកទេសចរពីចន្លោះ ២៥ ទៅ ៣០ លាននាក់បាននោះទេ ហើយវាក៏មានន័យថា ថៃនឹងខកខានគោលដៅប្រាក់ចំណូលផ្អែកលើប្រភពទេសចរណ៍ផងដែរ។
ប្រធានសមាគមធុរកិច្ច និងទេសចរណ៍ប៉ាតាយ៉ា លោក Ekkasit Ngamphichet បាននិយាយថា ទោះបីជាចំនួនកម្មករអាចបំពេញគ្រប់គ្រាន់តាមតម្រូវការក៏ដោយ ប្រាក់ចំណេញអាចនឹងមានតិចជាងការរំពឹងទុក ដោយសារតម្លៃពលកម្មកាន់តែថ្លៃ ស្របពេលដែលសណ្ឋាគារត្រូវបង់ថ្លៃអគ្គិសនីខ្ពស់ផងនោះ។
អត្ថបទគួរអាន
គួររំឭកថា ចំនួនភ្ញៀវទេសចរណ៍ថៃបានឡើងដល់កម្រិតខ្ពស់ក្នុងឆ្នាំ ២០១៩ ដែលទទួលបានភ្ញៀវទេសចរបរទេសជិត ៤០ លាននាក់។ បន្ទាប់មកកូវីដ១៩បានវាយប្រហារ បណ្ដាលឲ្យចំនួនភ្ញៀវទេសចរបរទេសធ្លាក់ចុះមកត្រឹម ៦,៧ លាននាក់ក្នុងឆ្នាំ២០២០ ហើយបន្តធ្លាក់ចុះមកត្រឹមជាង ៤២ម៉ឺននាក់ក្នុងឆ្នាំ ២០២១។ ចាប់តាំងពីពេលនោះមក ចំនួនភ្ញៀវទេសចរបានហក់ឡើងដល់ ១១ លាននាក់គិតត្រឹមឆមាសទីពីរនៃឆ្នាំ២០២២ បន្ទាប់ពីការបើកប្រទេសឡើងវិញ។
បើយោងតាមការសិក្សារបស់វិទ្យាស្ថានជាតិគ្រប់គ្រងការអភិវឌ្ឍន៍ថៃ ការធ្លាក់ចុះយ៉ាងគំហុកក្នុងវិស័យទេសចរណ៍បានរំខានដល់កម្លាំងកម្មករប្រមាណ ៣,៩លាននាក់នៅក្នុងវិស័យមួយនេះ ដែលវាធ្លាប់តែមានចំនួនកម្មករប្រហែល ៧,៧ លាននាក់ កាលពីមុនពេលមានជំងឺរាតត្បាត។ ក្នុងអំឡុងពេលមានការរាតត្បាតពីជំងឺកូវីត១៩ ប្រជាពលរដ្ឋថៃប្រមាណ ៦០% ត្រូវបានបញ្ឈប់ពីការងារហើយត្រឡប់ទៅស្រុកកំណើតវិញ ដើម្បីធ្វើការក្នុងវិស័យកសិកម្ម។ ដោយឡែក ២០% ផ្សេងទៀតបានស្វែងរកការងារថ្មីនៅក្នុងឧស្សាហកម្ម ខណៈដែល ២0% ទៀតបានចាប់ផ្តើមអាជីវកម្មផ្ទាល់ខ្លួនរបស់ពួកគេតែម្តង។
ជាការឆ្លើយតបទៅនឹងបញ្ហានេះ លោក ចំណាន និយាយថា ក្រុមប្រឹក្សាទេសចរណ៍ថៃ កំពុងសហការជាមួយស្ថាប័នអប់រំទូទាំងប្រទេស ដើម្បីនាំយកសិក្ខាកាមមកពីសាលា ដែលមានជំនាញផ្តោតលើវិស័យទេសចរណ៍ និងការគ្រប់គ្រងសណ្ឋាគារ ដើម្បីមកបំពេញការងារទៅតាមមុខដំណែងដែលកំពុងខ្វះខាត។ លោកយល់ថាវាជាវិធានការឈ្នះឈ្នះ ព្រោះសិក្ខាកាមនឹងទទួលបានការងារដែលត្រូវនឹងជំនាញដែលពួកគេកំពុងសិក្សា ខណៈក្រុមហ៊ុនក៏ទទួលបានកម្លាំងពលកម្មដែលគេត្រូវការ។ លើសពីនេះ TCT ក៏ទទួលបានការគាំទ្រពីធនាគារសន្សំប្រាក់របស់រដ្ឋាភិបាលថៃចំនួន ១៤៩ លានដុល្លា សម្រាប់សណ្ឋាគារខ្នាតតូច និងមធ្យមទៀតផង៕
