យ៉ាងណាមិញ បើតាមការគូសបញ្ជាក់របស់មន្ត្រីជាន់ខ្ពស់នៃរដ្ឋសភា កាលពីពេលថ្មីៗស្ពានដែលគ្រោងសាងសង់ចេញពីម្តុំផ្សាររាត្រីឆ្ពោះទៅត្រើយនៃម្ដុំសណ្ឋាគារសុខា ហើយបន្តទៅស្វាយជ្រុំនៅតំបន់អរិយក្សត្រនេះ នឹងបើកការដ្ឋានសាងសង់នៅឆ្នាំ២០២៣ ខាងមុខនេះ។ ជុំវិញដំណឹងនៃគម្រោងសាងសង់ស្ពានឆ្លងទន្លេមេគង្គនេះដែរ អ្នកជំនាញក្នុងវិស័យអចលនទ្រព្យបានបង្ហាញក្តីរំពឹងខ្ពស់ថា វានឹងជួយជំរុញឲ្យតម្លៃអចលនទ្រព្យនៅតំបន់អរិយក្សត្រមានការកើនឡើងមួយកម្រិតទៀត។
ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូនបានគូសបញ្ជាក់ថា មកទល់ពេលនេះកម្ពុជាមិនទាន់ទទួលបានកម្ចីពីភាគីកូរ៉េនៅឡើយទេ តែតាមគម្រោងកម្ពុជា និងភាគីកូរ៉េគ្រោងនឹងចុះហត្ថលេខាប្រគល់ និងទទួលហិរញ្ញប្បទានសម្រាប់ការសាងសង់ស្ពានឆ្លងទន្លេមិត្តភាពកម្ពុជា-កូរ៉េនៅអំឡុងខែវិច្ឆិកា ខាងមុខនេះ។ ទោះយ៉ាងណា ឯកឧត្តម មិនបញ្ជាក់លម្អិតពីទំហំហិរញ្ញប្បទាន ដែលកម្ពុជា និងកូរ៉េគ្រោងចុះហត្ថលេខានេះមានទំហំប៉ុន្មាននោះទេ។ បើតាមការគូសបញ្ជាក់របស់មន្ត្រីជាន់ខ្ពស់រូបនេះ ក្រោយចុះហត្ថលេខារួច កម្ពុជានឹងជ្រើសរើសក្រុមហ៊ុនទីប្រឹក្សាបច្ចេកទេសឲ្យចុះសិក្សាលម្អិតលើគម្រោងនេះ។
អត្ថបទគួរអាន
ជុំវិញការអភិវឌ្ឍន៍គម្រោងស្ពានឆ្លងទន្លេនេះដែរ លោកជំទាវកិត្តិសង្គហបណ្ឌិត ឃួន សុដារី អនុប្រធានទី២នៃរដ្ឋសភាបានបញ្ជាក់ក្នុងជំនួបជាមួយឯកឧត្តម ជូ ណាក់យ៉ាំង អភិបាលក្រុងឃ្យុងយូ នៃសាធារណៈរដ្ឋកូរ៉េ កាលពីពេលថ្មីៗនេះថា គម្រោងស្ពានឆ្លងទន្លេមេគង្គ និងទន្លេបាសាបមិត្តភាពកម្ពុជា-កូរ៉េ ដែលជាជំនួយឥតសំណង និងហិរញ្ញប្បទានរបស់កូរ៉េខាងត្បូង នឹងបើកការដ្ឋានសាងសង់នៅឆ្នាំ២០២៣ ខាងមុខនេះ។
ពាក់ព័ន្ធបញ្ហានេះដែរ មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានបញ្ជាក់ប្រាប់ខេមបូណូមីស កាលពីពេលថ្មីៗថា រាជរដ្ឋាបាលកម្ពុជាបានឯកភាពជាគោលការណ៍រួចហើយ ដោយអនុញ្ញាតឲ្យក្រុមហ៊ុនកូរ៉េសាងសង់ស្ពានមិត្តភាពកម្ពុជា-កូរ៉េចំនួនពីរ ក្នុងនោះស្ពានទី១ សាងសង់ចេញពីម្តុំផ្សាររាត្រីក្បែរផ្សារចាស់ឆ្ពោះទៅត្រើយសុខាឆ្លងកាត់ទន្លេសាប និងស្ពានទី២ចេញពីម្តុំត្រើយសុខាឆ្ពោះទៅអរិយក្សត្រឆ្លងកាត់ទន្លេមេគង្គ។
ជុំវិញការអភិវឌ្ឍន៍ស្ពានឆ្លងទន្លេនេះដែរ អ្នកជំនាញក្នុងវិស័យសេដ្ឋកិច្ច និងអចលនទ្រព្យធ្លាប់បានបង្ហាញក្តីរំពឹងថា ក្រោយស្ពាននេះត្រូវបានស្ថាបនាឡើងនឹងជួយផ្លាស់ប្តូរមុខតំបន់អរិយក្សត្យឲ្យក្លាយជាតំបន់ពាណិជ្ជកម្ម ដែលបណ្តុំដោយអគារពាណិជ្ជកម្ម ផ្សារទំនើប ខុនដូ និងអគារលំនៅឋានប្រណិតៗជាដើម។ ជាពិសេសវានឹងជួយជំរុញឲ្យតម្លៃអចលនទ្រព្យនៅតំបន់នោះកាន់តែមានតម្លៃកើនឡើងមួយកម្រិតទៀត៕
