មជ្ឈមណ្ឌលស្រាវជ្រាវ កសិកន របស់ថៃ បានរកឃើញថា សង្គ្រាមពាណិជ្ជកម្មនេះ អាចនឹងបន្តអូសបន្លាយរហូតដល់ ២ ទៅ៤ឆ្នាំទៀត ដែលនឹងវាឲ្យកំណើនលូតលាស់សេដ្ឋកិច្ចរបស់ចិន អាចធ្លាក់ចុះ ប្រមាណ ០,៣% ទៅ០,៥% នៅក្នុងឆ្នាំ២០១៨នេះ ប្រសិនបើការសងសឹកគ្នាក្នុងសង្គ្រាមពាណិជ្ជកម្មនេះ នៅតែបន្ត។ ជាមួយគ្នានេះ ផលប៉ះពាល់មកលើការនាំចេញរបស់ប្រទេសថៃ ក៏នឹងមានកាន់តែធំឡើងៗ ផងដែរ ព្រោះអ្វី? ព្រោះថា ទីផ្សារទិសដៅការនាំចេញដ៏ធំរបស់ថៃ គឺជាប្រទេសចិន។
អត្ថបទទាក់ទង!
ថ្លែងនៅក្នុងកាសែតបាងកកប៉ុស្ដិ៍ លោក ស៊ីវ៉ាត់ លូងសំប៊ូន (Siwat Luangsomboon) ជំនួយការអគ្គនាយកគ្រប់គ្រងមជ្ឈមណ្ឌលស្រាវជ្រាវ កសិកន បានឲ្យដឹងថា ប្រសិនបើសង្គ្រាមពាណិជ្ជកម្មនេះ នៅតែអូសបន្លាយទៀត ការប៉ះទង្គិចដោយផ្ទាល់មកលើការទំហំនៃការនាំចេញរបស់ថៃ អាចនឹងមានដល់ ជាង ១.៧០០ លានដុល្លារអាមេរិក ហើយការប៉ះទង្គិចមិនផ្ទាល់វិញ តាមរយៈខ្សែសង្វាក់ផ្គត់ផ្គង់នេះ អាចមានក្នុងទំហំដល់ទៅ ២.៨០០លានដុល្លារអាមេរិក នៅឆ្នាំក្រោយនេះ។
យ៉ាងណាក៏ដោយចុះ គេសង្កេតឃើញថា សកម្មភាពការដឹកនាំទំនិញចេញទៅក្រៅប្រទេសរបស់ថៃនៅតែរក្សាកំណើន ពោលគឺ គិតត្រឹម៥ខែដំបូងឆ្នាំនេះ បានកើនឡើងជាង១៦% ដែលមានអត្រាមួយខ្ពស់ក្នុងរយៈពេល៧ឆ្នាំ ជាមួយនឹងចំនួនទឹកប្រាក់ប្រមាណ ជាង១០០ពាន់ដុល្លារអាមេរិក។
ដ្បិតតែយ៉ាងនេះក្ដី ការស្រាវជ្រាវដដែលបានប៉ាន់ស្មានថា រោងចក្រផលិតរបស់ថៃ អាចនឹងក្លាយជាអ្នកឈ្នះ ហើយក៏អាចនឹងក្លាយជាអ្នកចាញ់ដែរ ក្នុងកាលៈទេសៈដែលជម្លោះពាណិជ្ជកម្មនេះ នៅតែបន្តកើតមានឡើង។
សូមជម្រាបថា ចិន នឹងអាមេរិក មួយរយៈចុងក្រោយ បាននិងកំពុងដំឡើងឫទ្ធិដាក់គ្នា ក្នុងជម្លោះពាណិជ្ជកម្មរវាងប្រទេសទាំងពីរនេះ ហើយប្រទេសនីមួយៗ បានធ្វើការសងសឹកគ្នាទៅវិញទៅមក លើការដកហូតពន្ធលើការនាំចូលមុខទំនិញសំខាន់ៗនៃប្រទេសទាំងពីរ។ ថ្មីៗនេះទៀតសោត សង្គ្រាមពាណិជ្ជកម្មនេះ ក៏បានរាលដាលដល់សហគមន៍អឺរ៉ុបផងដែរ ខណៈដែលអាមេរិក បានប្រកាសដកហូតពន្ធលើទំនិញនាំចូលមួយចំនួនរបស់អឺរ៉ុប។ រីឯ អឺរ៉ុបក៏មិននៅស្ងៀមដែរ ដោយបានកំណត់ដកហូតពន្ធលើទំនិញរបស់អាមេរិកដូចគ្នា។ ជម្លោះនេះ ក៏បាននិងកំពុងធ្វើឲ្យពិភពលោក ដាក់ការចាប់អារម្មណ៍យ៉ាងខ្លាំងផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
