ទោះបីមានព្រឹត្តិការណ៍ចក្រភពអង់គ្លេសផ្ដាច់ខ្លួនចេញពីសហភាពអឺរ៉ុប (Brexit) ការបោះឆ្នោតប្រធានាធិបតីអាមេរិកឆ្នាំ២០១៦ និងព្រឹត្តិការណ៍នយោបាយ-សង្គមផ្សេងៗទៀតក្ដី និស្សិតវ័យក្មេងរបស់ប្រទេសវៀតណាម នៅតែបន្តសម្រុកទៅរៀននៅក្រៅប្រទេសក្នុងចំនួនដ៏ច្រើន។
ជាការពិត វៀតណាមស្ថិតក្នុងចំណោមប្រទេសចំនួន ១០ ដែលបញ្ជូននិស្សិតទៅរៀននៅស្រុកអាមេរិក ច្រើនជាងគេបំផុត។ ហើយសហរដ្ឋអាមេរិក គឺជាប្រទេសទទួលនិស្សិតវៀតណាមច្រើនជាងគេបំផុតទី២ នៅទូទាំងពិភពលោក បន្ទាប់ពីប្រទេសជប៉ុន ដោយនៅក្នុងសហរដ្ឋអាមេរិក មាននិស្សិតវៀតណាមជាង ៣ម៉ឺននាក់ ដែលសិក្សានៅគ្រប់កម្រិតថ្នាក់។
នេះបើយោងតាមការចុះផ្សាយដ៏លម្អិតមួយរបស់សារព័ត៌មានអនឡាញរបស់វៀតណាម ឈ្មោះ VN Express។
តើអ្នកបានអានអត្ថបទនេះ ឬនៅ?
តួលេខពីក្រសួងអប់រំនិងបណ្ដុះបណ្ដាលរបស់វៀតណាម បង្ហាញថា វៀតណាមមាននិស្សិតប្រមាណ ១សែន ៦ម៉ឺន ៥ពាន់នាក់ សិក្សានៅក្នុងប្រទេសធំៗចំនួន ១០ នៅលើពិភពលោក ក្នុងនោះ ៨៣% សិក្សានៅក្នុងប្រទេសធំបំផុតចំនួន ៥ គឺ ជប៉ុន សហរដ្ឋអាមេរិក អូស្ត្រាលី ចិន និងអង់គ្លេស និងក្រៅពីនោះ គឺសិក្សានៅក្នុងប្រទេស៥ផ្សេងទៀត រួមមាន សិង្ហបុរី អាល្លឺម៉ង់ បារាំង រុស្ស៊ី និងកាណាដា។
របាយការណ៍ក្រសួងអប់រំវៀតណាម ក៏បង្ហាញផងដែរថា ៩៦% នៃនិស្សិតវៀតណាមដែលសិក្សានៅក្រៅប្រទេស គឺរ៉ាប់រងហិរញ្ញប្បទានដោយខ្លួនឯង។
និយាយពីសហរដ្ឋអាមេរិកតែមួយ បច្ចុប្បន្ន វៀតណាមមាននិស្សិត ៣ម៉ឺន ២៧៩នាក់ នៅក្នុងគ្រប់រដ្ឋទាំង ៥០ នៃសហរដ្ឋអាមេរិក និងរដ្ឋមួយទៀត នៅ Puerto Rico។
កត្តាមួយដែលជំរុញការហូរចេញនូវនិស្សិតវៀតណាមទៅសិក្សានៅក្រៅប្រទេស ជាពិសេស អាមេរិក គឺកំណើននៃលទ្ធភាពបង់ថ្លៃសាលារបស់ប្រជាជនវៀតណាម។ គេព្យាករថា នៅឆ្នាំ២០២៦ ចំនួនសេដ្ឋីប្រាក់លានដុល្លារ (អ្នកដែលមានទ្រព្យសម្បត្តិពី ៣០លានដុល្លារ ឡើងទៅ) នឹងកើនឡើងជាង ២ដងកន្លះ គឺពី ១ម៉ឺន ៤ពាន់ ៣រយនាក់ ដល់ ៣ម៉ឺន ៨ពាន់ ៦០០នាក់៕
