ពេលនេះ វៀតណាម ផលិតបានបន្ទះឈីបសុវត្ថិភាពដំបូងជាប្រវត្តិសាស្ត្រហើយ ដោយបន្ទះឈីបនេះមានឈ្មោះថា VGC v1.0 ដែលត្រូវបានអភិវឌ្ឍរួមគ្នាដោយគណៈកម្មាធិការកូដនីយកម្មរដ្ឋាភិបាលវៀតណាម និងក្រុមហ៊ុន Viettel Group ដែលជាក្រុមហ៊ុនទូរគមនាគមន៍ និងឧស្សាហកម្មយោធា។ បន្ទះឈីបនេះត្រូវបានដាក់បង្ហាញជាផ្លូវការនៅទីស្ដីការក្រសួងការពារជាតិ ក្នុងទីក្រុងហាណូយ។ គណៈកម្មាធិការកូដនីយកម្មរដ្ឋាភិបាលវៀតណាម គឺជាស្ថាប័នទទួលខុសត្រូវលើបច្ចេកវិទ្យាបំប្លែងព័ត៌មានទៅជាកូដសម្ងាត់ ដើម្បីការពារព័ត៌មានសម្ងាត់របស់រដ្ឋាភិបាល និងយោធា។
គម្រោងនេះមានការចូលរួមពីវិស្វករ អ្នកវិទ្យាសាស្ត្រ និងអ្នកជំនាញវៀតណាមជាង៤០នាក់។ លទ្ធផលធ្វើតេស្តបានបង្ហាញថា បន្ទះឈីបនេះអាចបំប្លែងព័ត៌មានទៅជាកូដសម្ងាត់ និងបកស្រាយកូដឱ្យត្រឡប់ទៅជាព័ត៌មានដើមវិញបានលឿនជាងប្រព័ន្ធ ដែលប្រើកម្មវិធីកុំព្យូទ័រតែមួយមុខរហូតដល់ប្រមាណ១៥ដង។ មន្ត្រីវៀតណាម បានចាត់ទុកសមិទ្ធផលនេះថា ជាជំហានដ៏សំខាន់ក្នុងការធ្វើជាម្ចាស់លើបច្ចេកវិទ្យាស្នូល និងការពារអធិបតេយ្យភាពឌីជីថលរបស់ប្រទេស។
បច្ចុប្បន្នបន្ទះឈីបនេះត្រូវបានយកទៅប្រើប្រាស់ក្នុងឧបករណ៍ផ្ទុកទិន្នន័យ USB ដែលមានប្រព័ន្ធសុវត្ថិភាពខ្ពស់សម្រាប់ស្ថាប័នគណបក្ស រដ្ឋាភិបាល និងវិស័យការពារជាតិ។ វាក៏ត្រូវបានរំពឹងថា នឹងអាចគាំទ្រប្រព័ន្ធផ្ទៀងផ្ទាត់ហត្ថលេខាឌីជីថលរបស់វៀតណាម ដែលបច្ចុប្បន្នមានវិញ្ញាបនបត្រឌីជីថលជាង២លានច្បាប់។ នៅពេលអនាគត បច្ចេកវិទ្យានេះអាចត្រូវបានប្រើដើម្បីការពារប្រតិបត្តិការធនាគារ ទិន្នន័យអតិថិជន កាមេរ៉ាសុវត្ថិភាព និងហេដ្ឋារចនាសម្ព័ន្ធសំខាន់ៗដូចជាប្រព័ន្ធអគ្គិសនី ទឹកស្អាត និងទូរគមនាគមន៍។
ទោះជាយ៉ាងណា មន្ត្រីវៀតណាមបានបញ្ជាក់ថា បន្ទះឈីបនេះនៅត្រូវការការអភិវឌ្ឍ សាកល្បង និងទទួលវិញ្ញាបនបត្របច្ចេកទេសបន្ថែមទៀត មុននឹងអាចប្រើប្រាស់ទូលំទូលាយ ជាពិសេសក្នុងប្រព័ន្ធដែលពាក់ព័ន្ធការសម្ងាត់របស់រដ្ឋ។ ការបង្ហាញផលិតផលបន្ទះឈីបនេះ គឺជាជំហានដំបូងដ៏សំខាន់របស់វៀតណាម ដែលផ្នែកមួយនៃមហិច្ឆតាកសាងឧស្សាហកម្មបន្ទះឈីបសុវត្ថិភាពផ្ទាល់ខ្លួន ដើម្បីពង្រឹងសមត្ថភាពបច្ចេកវិទ្យា និងការពារសន្តិសុខជាតិក្នុងយុគសម័យឌីជីថល៕
ដោយ: តែម សុខុម
