ក្រុមហ៊ុន ឃូ ឡុង បានចាប់ផ្តើមធ្វើការពិភាក្សាជាមួយ អាជ្ញាធរនៅក្នុងតំបន់ដីសណ្តទន្លេមេគង្គ ក្នុងទីក្រុង ចាន់ ធូ និងខេត្ត ហៅ គាំង ដើម្បីជជែកវែកញែកគ្នាពី ជម្រើសសម្រាប់ការសាងសង់ផ្លូវល្បឿនលឿន ចៅ ឌុក- ចាន់ ធូ - ស៊ូ ត្រាង ដែលវារត់ស្របតាម ទន្លេ ហួរ ចេញពីទីក្រុង ចៅ ឌុក ក្បែរព្រំប្រទល់កម្ពុជា ចូលទៅកាន់ទីក្រុង ស៊ូ ត្រាង ដោយឆ្លងកាត់ទីក្រុង ចាន់ ធូ ផងដែរ។
សម្រាប់ដំណាក់កាលដំបូង ការសាងសង់ផ្លូវនេះ គឺមានទទឹង ១៧ម៉ែត្រ មុននឹងបន្ថែមដល់ ២៤ម៉ែត្រ នឹងមានល្បឿនកំណត់ ១២០គីឡូម៉ែត្រក្នុងមួយម៉ោង ហើយគម្រោងសរុបចំណាយជាង ១,៣ ពាន់លានដុល្លារអាមេរិក នឹងចាប់ផ្តើមនៅឆ្នាំ ២០២៣ ហើយបញ្ចប់នៅឆ្នាំ ២០២៦។
អត្ថបទទាក់ទង!
គម្រោងនេះ ត្រូវបានរដ្ឋាភិបាលវៀតណាម ចាត់ទុកជា ខ្សែផ្លូវដ៏សំខាន់មួយ សម្រាប់ការតភ្ជាប់បណ្តាញដឹកជញ្ជូន និងធ្វើដំណើរ ជាមួយប្រទេសកម្ពុជា និងបណ្តាប្រទេសនានា ក្នុងតំបន់អាស៊ីអាគ្នេយ៍។
យ៉ាងណាមិញ នៅក្នុងគម្រោងនេះ ក៏មានស្ពានចំនួន ១៣០កន្លែង និងផ្លូវឆ្លងកាត់ ៥០កន្លែង ដើម្បីតភ្ជាប់ទៅកាន់ផ្លូវជាតិសំខាន់ៗ ហើយការសិក្សា ក៏បញ្ចៀសមិនឲ្យប៉ះពាល់ តំបន់ឧស្សាហកម្ម និងតំបន់លំនៅដ្ឋានរបស់ប្រជាពលរដ្ឋផងដែរ។
គួរជម្រាបដែរថា គម្រោងផ្លូវល្បឿនលឿននេះ ត្រូវបានអនុម័តយល់ព្រមរួចហើយ ដោយរដ្ឋាភិបាលវៀតណាម តាមរយៈក្រសួងដឹកជញ្ជូន ផែនការ និងវិនិយោគវៀតណាម នឹងបានចាត់ទុកជា គម្រោងអាទិភាព៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
