គួរបញ្ជាក់ថា របរពេស្យា គឺជារបរដែលច្បាប់ហាមឃាត់នៅក្នុងប្រទេសវៀតណាម។
លោក ភុង កុក ហៀន អនុប្រធាននៃរដ្ឋសភានីតិប្បញ្ញត្តិ បានលើកជាសំណើដូចខាងលើ នៅក្នុងកិច្ចប្រជុំគណៈកម្មាធិការអចិន្ត្រៃយ៍ ដោយនិយាយថា វៀតណាមគួរពិចារណាបង្កើតសង្កាត់ភ្លើងក្រហម (ប្លុកផ្ទះបនស្រី) នៅតាមតំបន់សេដ្ឋកិច្ចជាក់លាក់មួយចំនួន ដែលនៅទីនោះ គេអនុញ្ញាតឲ្យបើកកាស៊ីណូដោយស្របច្បាប់ជាការសាកល្បង។ នោះបើយោងតាមការផ្សាយរបស់ VN Express។
អាជ្ញាធរវៀតណាមនៅតាមតំបន់សេដ្ឋកិច្ច ធ្លាប់បានស្នើឲ្យបង្កើតតំបន់ផ្ទះបនស្រី ដូចនៅ សិង្ហបុរី ដែលគេអាចប្រើច្បាប់គ្រប់គ្រងទៅលើរបរពេស្យាបាន។
វៀតណាមកំពុងត្រៀមរៀបចំសេចក្ដីសម្រេចចុងក្រោយដើម្បីផ្ដល់ការលើកទឹកចិត្តមួយចំនួន ដល់តំបន់សេដ្ឋកិច្ចពិសេសចំនួន ៣ គឺតំបន់សេដ្ឋកិច្ចពិសេស វ៉ាន់ ដន នៅខេត្តកាងនិញ ភាគខាងជើង តំបន់សេដ្ឋកិច្ចពិសេស វ៉ាន់ ភុង នៅខេត្តខាញ់ហួ និងតំបន់សេដ្ឋកិច្ចពិសេស កោះភូកុក (កោះត្រល់)។
តើអ្នកបានអានអត្ថបទនេះ ឬនៅ?
រដ្ឋាភិបាលវៀតណាមគ្រោងប្រែក្លាយតំបន់សេដ្ឋកិច្ចពិសេសទាំងនេះ ឲ្យក្លាយជាតំបន់ទាក់ទាញវិនិយោគ ដូចគ្នាទៅនឹងសិង្ហបុរី និងហុងកុង ដែលនៅតាមតំបន់ទាំងនេះ កាស៊ីណូត្រូវបានអនុញ្ញាតឲ្យបើកដំណើរការរួចស្រេចទៅហើយ។
ល្បែងស៊ីសង និងអំពើពេស្យា ត្រូវបានចាត់ទុកជាអំពើបាបដែលគេហាមឃាត់នៅក្នុងប្រទេសវៀតណាមជាយូរលង់មកហើយ ប៉ុន្តែ ទើបតែថ្មីៗនេះទេ ដែលវៀតណាមហាក់បន្ធូរឥរិយាបថចំពោះអំពើពីរមុខនេះ។
នៅទូទាំងពិភពលោក មានប្រទេសប្រមាណ ៧០ប្រទេស ដែលដាក់អំពើពេស្យាឲ្យស្ថិតក្រោមច្បាប់ ក្នុងនោះរួមទាំង អូស្ត្រាលី និងអាល្លឺម៉ង់ ផង។
វិធានការថ្មីៗរបស់វៀតណាម ក្នុងការអនុញ្ញាតឲ្យបើកកាស៊ីណូ និងសំណើដាក់ឲ្យស្របច្បាប់សង្កាត់ពេស្យានេះ ក៏ត្រូវគេមើលឃើញថា អាចនឹងជាប់ទាក់ទងនឹងការស្រាវជ្រាវមួយ ដែលគេរកឃើញថា វៀតណាមបានបង់ចំណូលពន្ធក្នុងមួយឆ្នាំ ៨០០លានដុល្លារ ដោយសារតែប្រជាជនវៀតណាមឆ្លងដែនមកលេងល្បែងនៅកាស៊ីណូក្នុងប្រទេសកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
