បើតាមប្រធានសមាគមម្រេចរបស់វៀតណាមបានឲ្យដឹងថា ផ្ទៃដីដាំដុះម្រេចខ្មៅនឹងត្រូវកាត់បន្ថយពី ១៥ម៉ឺនហិកតា មកនៅត្រឹម ១១ម៉ឺនហិកតាប៉ុណ្ណោះ នៅប៉ុន្មានឆ្នាំខាងមុខនេះ ហើយរដ្ឋាភិបាលវៀតណាម នឹងលើកទឹកចិត្តឲ្យកសិកររបស់ខ្លួន ងាកមកធ្វើការដាំដុះមុខដំណាំផ្សេងទៀត ជំនួសឲ្យការដាំដុះម្រេច។
កាលពីឆ្នាំ២០១៣ ដល់២០១៥ ដែលជាឆ្នាំម្រេចត្រូវប៉ាន់ មានតម្លៃខ្ពស់នោះ កសិករវៀតណាមបានពង្រីកផ្ទៃដីចម្ការដាំដុះរបស់ខ្លួនពី ៥ម៉ឺនហិកតា នៅឆ្នាំ២០១៣ រហូតមកដល់ ១៥ម៉ឺនហិកតា គិតមកទល់បច្ចុប្បន្ននេះ។
ប្រទេសវៀតណាម គឺជាអ្នកនាំចេញម្រេចខ្មៅធំបំផុតលើពិភពលោក ដែលមាន 60-65 ភាគរយនៃពាណិជ្ជកម្មពិភពលោក និងស្ទើរតែពាក់កណ្តាលនៃទិន្នផលសកល។
ការនាំចេញម្រេចខ្មៅរបស់វៀតណាមក្នុងត្រីមាសទី១ឆ្នាំនេះ បានកើនឡើងជាង 17 ភាគរយធៀបនឹងរយៈពេលដូចគ្នាកាលពីឆ្នាំមុន ពោលគឺបានកើនឡើជាង ៦ម៉ឺនតោន ប៉ុន្តែចំណូលដែលបានមកពីការនាំចេញម្រេចវិញ នៅបានធ្លាក់ចុះជាង 31 ភាគរយ ពោលគឺមកនៅត្រឹមតែ 221 លានដុល្លារអាមេរិកប៉ុណ្ណោះ។
តើអ្នកបានអានអត្ថបទនេះហើយ ឬនៅ?
តាមការប៉ាន់ស្មាន ការនាំចេញរបស់វៀតណាមម្រេចសម្រាប់ឆ្នាំ 2018 ត្រូវបានគេព្យាករថា អាចមានចំនួនប្រហាក់ប្រហែលទៅនឹងឆ្នាំមុនដែរ ដែលមានប្រហែលជាង ២១ម៉ឺនតោន។
គួរបញ្ជាក់ថា មិនត្រឹមតែវៀតណាមនោះទេ ដែលកំពុងជួបបញ្ហាទីផ្សារម្រេច នៅកម្ពុជាក៏កំពុងមានការប្រឈមនឹងការធ្លាក់ចុះតម្លៃទីផ្សារម្រេចដែរ ពោលគឺនៅឆ្នាំតម្លៃម្រេចនៅមានត្រឹមតែជុំវិញ ៣ ដុល្លារប៉ុណ្ណោះ ក្នុងមួយគីឡូក្រាម ខណៈដែលកាលពីឆ្នាំមុនៗមានតម្លៃជាង៤ដុល្លារអាមេរិកក្នុងមួយគីឡូក្រាម។ ទោះយ៉ាងណា បើតាមអ្នកជំនាញកសិកម្មកម្ពុជាបានអះអាងថា ប្រសិនបើតម្លៃម្រេចនៅអាចរក្សាបានជុំវិញតម្លៃ ៤ដុល្លារអាមេរិកក៏ជាការល្អប្រសើរសម្រាប់កសិករដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
