ភ្នាក់ងារមនុស្សធម៌របស់អង្គការសហប្រជាជាតិ បានប៉ាន់ប្រមាណថា មនុស្សប្រហែល២៧៤លាននាក់នៅទូទាំងពិភពលោកនឹងត្រូវការជំនួយសង្គ្រោះបន្ទាន់នៅឆ្នាំក្រោយនេះ កើនឡើងប្រមាណ១៧% ធៀបនឹងឆ្នាំ២០២១ ដែលធ្លាប់មានក្នុងកម្រិតខ្ពស់បំផុតទៅហើយនោះ។ ក្នុងន័យនេះ គឺមានមនុស្សយ៉ាងហោចណាស់ម្នាក់ ក្នុងចំណោម២៩នាក់ នឹងត្រូវការជំនួយ នៅក្នុងឆ្នាំ២០២២ ហើយបើធៀបនឹងឆ្នាំ២០១៥វិញ ចំនួនអ្នកត្រូវការជំនួយមនុស្សធម៌នេះ គឺការកើនឡើងដល់ទៅ ២៥០%ឯណោះ។
ប្រធានផ្នែកជំនួយមនុស្សធម៌នៃអង្គការសហប្រជាជាតិលោក ម៉ាទីន ហ្គ្រីហ្វីត (Martin Griffiths) បាននិយាយថា ចំនួនមនុស្សដែលនឹងត្រូវការជំនួយនៅឆ្នាំក្រោយនេះ គឺមានខ្ពស់បំផុត មិនធ្លាប់មានពីមុនមកនោះទេ។ ដូច្នេះហើយ លោកបារម្ភថា ការផ្ដល់ជំនួយទៅកាន់មនុស្សក្នុងចំនួនច្រើនយ៉ាងដូច្នេះ វាអាចនឹងមិនមាននិរន្ដរភាពនោះទេ ទោះជាយ៉ាងណា គេត្រូវតែប្រឹងប្រែងធ្វើឲ្យមាននិរន្ដរភាព។
បើតាមទីភ្នាក់ងាររបស់អង្គការសហប្រជាជាតិ និងអង្គការមនុស្សធម៌ផ្សេងទៀតបានឲ្យដឹងថា ការផ្ដល់ជំនួយទៅកាន់មនុស្សយ៉ាងហោចណាស់ ១៨៣លាននាក់ ដែលភាគច្រើនជាជនងាយរងគ្រោះនៅប្រទេសចំនួន៦៣នៅឆ្នាំក្រោយនេះ គេនឹងត្រូវការថវិកាប្រហែល ៤១ពាន់លានដុល្លារ ខណៈដែលកាលពីឆ្នាំ២០២១ មានការស្នើសុំថវិកាត្រឹមតែ៣៥ពាន់លានដុល្លារប៉ុណ្ណោះ។
អត្ថបទគួរអាន
នៅក្នុងរបាយការណ៍របស់អង្គការសហប្រជាជាតិ ក៏បានលើកឡើងពីការកើនឡើនខ្លាំងនូវតម្រូវការជំនួយពីបណ្ដាប្រទេសមួយចំនួនដូចជា អាហ្វហ្កានីស្ថាន, មីយ៉ាន់ម៉ា និងប្រទេស អេត្យូពីជាដើម ដោយសារតែប្រទេសទាំងនេះ កំពុងកើតមាននូវអស្ថិរភាពនយោបាយ និងស្ថានភាពកាន់តែយ៉ាប់យ៉ឺន។ មិនតែប៉ុណ្ណោះ បញ្ហាប្រែប្រួលអាកាសធាតុ និងការបន្ដរីករាលដាលនៃមេរោគកូវីដ១៩ ក៏កំពុងធ្វើឲ្យតម្រូវការជំនួយមនុស្សធម៌កើនឡើងដែរ។
បើតាមអង្គការសហប្រជាជាតិ ប៉ះពាល់ដែលបណ្ដាលមកពីជំងឺរាតត្បាតកូវីដ១៩ ដែលបានសម្លាប់ជីវិតមនុស្សជាង៥លាននាក់នៅទូទាំងពិភពលោកនោះ ក៏បានទាញឲ្យមនុស្សប្រមាណ២០លាននាក់ បានធ្លាក់ចូលទៅក្នុងភាពក្រីក្រផងដែរ។ រីឯបញ្ហា ប្រែប្រួលអាកាសធាតុវិញ ក៏បានធ្វើឲ្យមានការកើនឡើងនូវគ្រោះអត់ឃ្លាន និងអសន្ដិសុខស្បៀងអាហារដូចគ្នាដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
